ਬਟਾਲਾ, 7 ਜੁਲਾਈ (ਅਵਿਨਾਸ਼ ਸ਼ਰਮਾ)
: ਨਿਊ ਜਾਗਦੀ ਜ਼ਮੀਰ ਪ੍ਰੈਸ ਕਲੱਬ ਵੱਲੋਂ ਇਕ ਅਹੰਮ ਅਤੇ ਨਿਰਣਾਇਕ ਮੀਟਿੰਗ ਕਲੱਬ ਦੇ ਦਫ਼ਤਰ, ਗੁਰਦਾਸਪੁਰ ਰੋਡ, ਬਟਾਲਾ ਵਿਖੇ ਆਯੋਜਿਤ ਕੀਤੀ ਗਈ। ਇਸ ਮੀਟਿੰਗ ਵਿੱਚ ਪੱਤਰਕਾਰਾਂ ਦੀ ਭੂਮਿਕਾ, ਉਨ੍ਹਾਂ ਨੂੰ ਆ ਰਹੀਆਂ ਰੋਜ਼ਾਨਾ ਚੁਣੌਤੀਆਂ ਅਤੇ ਕਲੱਬ ਵੱਲੋਂ ਚਲਾਏ ਜਾ ਰਹੇ ਸਮਾਜ-ਹਿਤੈਸ਼ੀ ਉਪਰਾਲਿਆਂ ‘ਤੇ ਚਰਚਾ ਕੀਤੀ ਗਈ।
ਮੀਟਿੰਗ ਦੀ ਅਗਵਾਈ ਸ਼ਹਿਰੀ ਪ੍ਰਧਾਨ ਐਸ. ਕੇ. ਮਹਾਜਨ ਨੇ ਕੀਤੀ ਜਦਕਿ ਜ਼ਿਲ੍ਹਾ ਪ੍ਰਧਾਨ ਸੰਜੀਵ ਨਈਅਰ ਵਿਸ਼ੇਸ਼ ਤੌਰ ‘ਤੇ ਮੌਜੂਦ ਰਹੇ। ਉਨ੍ਹਾਂ ਨੇ ਕਿਹਾ ਕਿ ਪੱਤਰਕਾਰਤਾ ਦੇ ਮੂਲ ਸਿਧਾਂਤਾਂ — ਸੱਚਾਈ, ਨਿਰਭਿਕਤਾ ਅਤੇ ਲੋਕ ਹਿੱਤ — ਨੂੰ ਕਾਇਮ ਰੱਖਣਾ ਕਲੱਬ ਦੀ ਪਹਿਲੀ ਜ਼ਿੰਮੇਵਾਰੀ ਹੈ। ਉਨ੍ਹਾਂ ਨੇ ਪ੍ਰੈਸ ਦੀ ਆਜ਼ਾਦੀ ਦੀ ਰੱਖਿਆ ਦੀ ਗੱਲ ਨੂੰ ਵੀ ਦੋਹਰਾਇਆ।
ਮੀਟਿੰਗ ਵਿਚ ਇਹ ਸਪੱਸ਼ਟ ਫੈਸਲਾ ਲਿਆ ਗਿਆ ਕਿ ਕਲੱਬ ਸ਼ਹਿਰ ਦੀ ਭਲਾਈ ਲਈ ਪ੍ਰਸ਼ਾਸਨ ਨਾਲ ਮਿਲ ਕੇ ਕੰਮ ਕਰੇਗਾ, ਪਰ ਜਿੱਥੇ ਵੀ ਕੋਈ ਗਲਤ ਜਾਂ ਜਨ-ਵਿਰੋਧੀ ਫ਼ੈਸਲਾ ਲਿਆ ਜਾਂਦਾ ਹੈ, ਉਥੇ ਨਿਊ ਜਾਗਦੀ ਜ਼ਮੀਰ ਕਲੱਬ ਨਿਰਭਿਕ ਰਵੱਈਆ ਅਪਣਾਉਂਦਾ ਹੋਇਆ ਉਸ ਗਲਤ ਕੰਮ ਨੂੰ ਬੇਨਕਾਬ ਕਰੇਗਾ।
ਇਹ ਵੀ ਜ਼ਿਕਰਯੋਗ ਹੈ ਕਿ ਮੀਟਿੰਗ ਦੌਰਾਨ ਪੱਤਰਕਾਰਾਂ ਨੇ ਇਕਜੁੱਟ ਹੋ ਕੇ ਇਹ ਕਸਮ ਖਾਈ ਕਿ ਉਹ ਲੋਕਤੰਤਰ ਦੇ ਚੌਥੇ ਥੰਮ — ਪੱਤਰਕਾਰਤਾ — ਨੂੰ ਮਜ਼ਬੂਤ ਬਣਾਏ ਰੱਖਣਗੇ ਅਤੇ ਕਿਸੇ ਵੀ ਦਬਾਅ ਜਾਂ ਲਾਲਚ ਅੱਗੇ ਝੁਕਣ ਦੀ ਬਜਾਏ ਸੱਚ ਦੇ ਪੱਖ ਵਿੱਚ ਖੜ੍ਹੇ ਰਹਿਣਗੇ।
ਇਸ ਮੌਕੇ ਤੇ ਹਾਜ਼ਰ ਸਦੱਸਾਂ ਵਿੱਚ ਸ਼ਾਮਲ ਸਨ: ਭੁਪਿੰਦਰ ਸੋਢੀ, ਬਲਦੇਵ ਖਾਲਸਾ, ਅਸ਼ੋਕ ਗਰੇਵਾਲ, ਸੁਨੀਲ ਬਟਾਲਵੀ, ਨੀਰਜ ਸ਼ਰਮਾ, ਰਾਜੂ ਲਹੋਰੀਆ, ਲਖਵਿੰਦਰ ਕੁਮਾਰ ਅਤੇ ਅਵਿਨਾਸ਼ ਸ਼ਰਮਾ ਸਮੇਤ ਹੋਰ ਕਈ ਗਰਿਮਾ ਮਈ ਮੈਂਬਰ।
