ਦਸੂਹਾ (ਚੌਧਰੀ)

30 ਸਤੰਬਰ : ਪੰਜਾਬ ਸਰਕਾਰ ਵੱਲੋਂ ਖੇਡਾਂ ਨੂੰ ਪ੍ਰਫੁੱਲਤ ਕਰਨ ਲਈ ਅਨੇਕਾਂ ਯਤਨ ਕੀਤੇ ਜਾ ਰਹੇ ਹਨ ਤਾਂ ਜੋ ਨੌਜਵਾਨ ਪੀੜੀ ਨੂੰ ਨਸ਼ਿਆਂ ਤੋਂ ਦੂਰ ਰੱਖ ਕੇ ਖੇਡਾਂ ਵੱਲ ਪ੍ਰੇਰਿਤ ਕੀਤਾ ਜਾਵੇ। ਇਸੇ ਲੜੀ ਅਧੀਨ ਪੰਜਾਬ ਸਰਕਾਰ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਬਲਾਕ ਦਸੂਹਾ–2 ਵਿੱਚ ਪੈਂਦੇ ਸਰਕਾਰੀ ਐਲੀਮੈਂਟਰੀ ਸੈਂਟਰ ਸਕੂਲ ਪੱਸੀ ਕੰਡੀ ਵਿਖੇ ਸੈਂਟਰ ਪੱਧਰੀ ਖੇਡਾਂ ਜੋ 27 ਸਤੰਬਰ ਤੋਂ 30 ਸਤੰਬਰ ਤੱਕ ਚਲੀਆਂ ਅੱਜ ਸਮਾਪਤ ਹੋ ਗਈਆਂ ਹਨ। ਇਨ੍ਹਾਂ ਖੇਡਾਂ ਵਿੱਚ ਪੱਸੀ ਕੰਡੀ ਸਕੂਲ ਤੋਂ ਇਲਾਵਾ ਨੌ ਹੋਰ ਸਕੂਲਾਂ ਦੇ ਵਿਦਿਆਰਥੀਆਂ ਲੜਕੇ –ਲੜਕੀਆਂ ਨੇ ਵੱਧ ਚੜ ਕੇ ਹਿੱਸਾ ਲਿਆ ਤੇ ਆਪਣੀ ਖੇਡ ਦਾ ਪ੍ਰਦਰਸ਼ਨ ਕੀਤਾ। ਇਸ ਮੌਕੇ 100, 200,400 ਤੇ 600ਮੀ. ਦੌੜ, ਘੋਲ, ਰੱਸਾਕੱਸੀ, ਸਰਕਲ ਸਟਾਈਲ ਕਬੱਡੀ ,ਬੈਡਮਿੰਟਨ ,ਨੈਸ਼ਨਲ ਕਬੱਡੀ, ਖੋ–ਖੋ ਤੋਂ ਇਲਾਵਾ ਆਦਿ ਖੇਡਾਂ ਕਰਵਾਈਆਂ ਗਈਆਂ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਸੈਂਟਰ ਹੈਡ ਟੀਚਰ ਦੇਸ਼ ਰਾਜ ਨੇ ਦੱਸਿਆ ਕਿ ਸ. ਐ. ਸਕੂਲ ਹਰਦੋਨੇਕਨਾਮਾ ਲੜਕੇ , ਸ. ਐ. ਸਕੂਲ ਰੱਤੜੇ ਅਤੇ ਦੁਲਮੀਵਾਲ ਲੜਕੀਆਂ ਖੋ–ਖੋ, ਸ. ਐ. ਸਕੂਲ ਤਿਹਾੜਾ ਰੱਸਾਕੱਸੀ, ਸ. ਐ. ਸਕੂਲ ਕੱਲੋਵਾਲ ਬੈਡਮਿੰਟਨ , 100ਮੀ ਦੌੜ ਸ.ਐ.ਸਕੂਲ ਰਾਘੋਵਾਲ ਤੇ ਬਨਿਆਲ, 400ਮੀ ਦੌੜ ਸ.ਐ.ਸਕੂਲ ਰਾਏਚੱਕ, ਨੈਸ਼ਨਲ ਸਟਾਈਲ ਕਬੱਡੀ ਸ.ਐ.ਸਕੂਲ ਪੱਸੀ ਕੰਡੀ, ਮੋਰੀਆਂ ਤੇ ਹਰਦੋਨੇਕਨਾਮਾ ਜੇਤੂ ਰਹੇ ਇਸ ਤੋਂ ਇਲਾਵਾ ਓਵਰਆਲ ਟਰਾਫੀ ਤੇ ਸ.ਐ.ਸ ਸਕੂਲ ਪੱਸੀ ਕੰਡੀ ਦਾ ਕਬਜ਼ਾ ਰਿਹਾ ।ਇਸ ਮੌਕੇ ਰੁਪਿੰਦਰ ਕੌਰ, ਸੁਮਨ ਕੁਮਾਰੀ, ਸ਼ੁਸਮਾ ਰਾਣੀ, ਹਰਪ੍ਰੀਤ ਕੌਰ, ਬੰਧਨਾਂ ਦੇਵੀ, ਇੰਦਰ ਸੁਖਦੀਪ ਸਿੰਘ, ਮਨਜੀਤ ਸਿੰਘ, ਸੁਰਜੀਤ ਕੌਰ, ਨਵਦੀਪ ਕੌਰ ਤੋਂ ਇਲਾਵਾ ਵੱਖ-ਵੱਖ ਸਕੂਲਾਂ ਦੇ ਵਿਦਿਆਰਥੀ ਹਾਜਰ ਸਨ। ਇਸ ਮੌਕੇ ਜੇਤੂ ਸਕੂਲਾਂ ਦੇ ਵਿਦਿਆਰਥੀਆਂ ਨੂੰ ਮੈਡਲ ਵੀ ਤਕਸੀਮ ਕੀਤੇ ਗਏ।