ਫਗਵਾੜਾ (ਲਾਲੀ ਦਾਦਰ )

*ਨੌਜਵਾਨਾਂ ‘ਚ ਨਜ਼ਰ ਆਈ ਉਤਸ਼ਾਹ ਦੀ ਘਾਟ

8 ਮਾਰਚ :  ਫਗਵਾੜਾ ਸਬ-ਡਵੀਜਨ ‘ਚ ਹੋਲੀ ਦਾ ਤਿਓਹਾਰ ਹਰ ਸਾਲ ਦੀ ਤਰ੍ਹਾਂ ਇਸ ਵਾਰ ਵੀ ਬੱਚਿਆਂ ਤੇ ਔਰਤਾਂ ਵਲੋਂ ਪੂਰੇ ਜੋਸ਼ੋ ਖਰੋਸ਼ ਦੇ ਨਾਲ ਮਨਾਇਆ ਗਿਆ। ਹਾਲਾਂਕਿ ਇਸ ਵਾਰ ਸ਼ਹਿਰੀ ਇਲਾਕਿਆਂ ਤੇ ਪਿੰਡਾਂ ਦੇ ਨੌਜਵਾਨਾਂ ਨੇ ਹੋਲੀ ਨੂੰ ਲੈ ਕੇ ਖਾਸ ਉਤਸ਼ਾਹ ਨਹੀਂ ਦਿਖਾਇਆ। ਜਿਸਦਾ ਕਾਰਨ ਸ਼ਾਇਦ ਸੂਬੇ ਦੀ ਮੋਜੂਦਾ ਕਾਨੂੰਨ ਵਿਵਸਥਾ ਹੋ ਸਕਦੀ ਹੈ। ਬੇਸ਼ਕ ਪੁਲਿਸ ਵਲੋਂ ਸੁਰੱਖਿਆ ਦੇ ਲਿਹਾਜ ਨਾਲ ਮੁੱਖ ਚੌਕਾਂ ਵਿਚ ਹਮੇਸ਼ਾ ਦੀ ਤਰ੍ਹਾਂ ਨਾਕਾਬੰਦੀ ਕੀਤੀ ਗਈ ਸੀ ਪਰ ਨੌਜਵਾਨਾਂ ਦੇ ਟੋਲੇ ਸੜਕਾਂ ਤੇ ਨਜ਼ਰ ਨਹੀਂ ਆਏ ਨਾ ਹੀ ਕਿਸੇ ਤਰ੍ਹਾਂ ਦੀ ਹੁੱਲੜਬਾਜੀ ਦੀ ਕਿਸੇ ਘਟਨਾ ਦੀ ਸੂਚਨਾ ਪ੍ਰਾਪਤ ਹੋਈ ਹੈ। ਮਾਪਿਆਂ ਵਲੋਂ ਵੀ ਨੌਜਵਾਨਾ ਨੂੰ ਘਰਾਂ ਵਿਚ ਰਹਿ ਕੇ ਹੀ ਹੋਲੀ ਦਾ ਸ਼ਗੁਨ ਕਰਨ ਲਈ ਪ੍ਰੇਰਿਆ ਗਿਆ। ਦੂਸਰੇ ਪਾਸੇ ਸਵੇਰ ਤੋਂ ਹੀ ਛੋਟੇ ਬੱਚਿਆਂ ਤੇ ਔਰਤਾਂ ਵਿਚ ਹੋਲੀ ਦਾ ਪੂਰਾ ਉਤਸ਼ਾਹ ਦੇਖਣ ਨੂੰ ਮਿਲਿਆ। ਬੱਚਿਆਂ ਨੇ ਜਿੱਥੇ ਪਿਚਕਾਰੀਆਂ ਅਤੇ ਗਿੱਲੇ ਪਾਣੀ ਵਾਲੇ ਰੰਗ ਨਾਲ ਹੋਲੀ ਦੀ ਮਸਤੀ ਕੀਤੀ ਉੱਥੇ ਹੀ ਵੱਡਿਆਂ ਨੇ ਹੋਲੀ ਦੇ ਰੰਗ ਵਿਰੰਗੇ ਸੁੱਕੇ ਰੰਗਾਂ ਨਾਲ ਇਕ ਦੂਸਰੇ ਨੂੰ ਰੰਗ ਕੇ ਵਧਾਈ ਦਿੱਤੀ। ਵੱਖ ਵੱਖ ਸੰਸਥਾਵਾਂ ਅਤੇ ਧਾਰਮਿਕ ਅਸਥਾਨਾ ਉੱਪਰ ਵੀ ਹੋਲੀ ਦਾ ਰੰਗ ਚੜ੍ਹਿਆ ਨਜਰ ਆਇਆ ਜਿਹਨਾਂ ਨੇ ਫੁੱਲਾਂ ਦੀ ਹੋਲੀ ਨੂੰ ਤਰਜੀਹ ਦਿੱਤੀ। ਪੰਜਾਬ ਵਿਚ ਵੱਸਦੇ ਪ੍ਰਵਾਸੀ ਭਾਈਚਾਰੇ ਨੇ ਵੀ ਹੋਲੀ ਮਨਾਈ ਅਤੇ ਉਹਨਾਂ ਵਲੋਂ ਗਾਏ ਭੋਜਪੁਰੀ ਗੀਤਾਂ ਦਾ ਪੰਜਾਬੀਆਂ ਨੇ ਵੀ ਖੂਬ ਆਨੰਦ ਮਾਣਿਆ। ਬੁੱਧੀਜੀਵੀ ਵਰਗ ਨੇ ਆਪਣੇ ਸੁਨੇਹੇ ਵਿਚ ਕਿਹਾ ਕਿ ਹੋਲੀ ਦਾ ਤਿਓਹਾਰ ਸਾਨੂੰ ਭਾਈਚਾਰਕ ਸਾਂਝ ਮਜਬੂਤ ਕਰਨ ਦਾ ਸੁਨੇਹਾ ਦਿੰਦਾ ਹੈ। ਜਿਸ ਤਰ੍ਹਾਂ ਹੋਲੀ ਦੇ ਰੰਗ ਇਕ ਦੂਸਰੇ ਵਿਚ ਮਿਲ ਕੇ ਹੋਰ ਵੀ ਖੂਬਸੂਰਤ ਲੱਗਦੇ ਹਨ ਉਸੇ ਤਰ੍ਹਾਂ ਸਾਰੇ ਸਮਾਜ ਨੂੰ ਜਾਤੀ, ਧਰਮ, ਭਾਸ਼ਾ ਅਤੇ ਖੇਤਰਵਾਦ ਤੋਂ ਉੱਪਰ ਉਠ ਕੇ ਭਾਈਚਾਰੇ ਦੀ ਮਿਸਾਲ ਪੇਸ਼ ਕਰਨੀ ਚਾਹੀਦੀ ਹੈ ਤਾਂ ਹੀ ਇਹ ਦੇਸ਼ ਤੱਰਕੀ ਕਰ ਸਕਦਾ ਹੈ