ਦਾਤਾਰਪੁਰ ਚ ਇੱਕ ਨਿੱਜੀ ਸਕੂਲ ਦੀ ਬੱਸ ਪਲਟਣ ਨਾਲ, 10 ਦੇ ਕਰੀਬ ਬੱਚੇ ਜਖਮੀ 

ਵੱਡਾ ਹਾਦਸਾ ਹੋਣ ਤੋਂ ਟਲਿਆ,ਹਾਦਸੇ ਦੀ ਵਜਾ ਬ੍ਰੇਕ ਫੇਲ ਹੋਣਾ ਦੱਸਿਆ ਗਿਆ

ਦਾਤਾਰਪੁਰ / ਦਸੂਹਾ (ਬਿਊਰੋ) : ਦਾਤਾਰਪੁਰ ਦੇ ਇੱਕ ਨਿੱਜੀ ਸਕੂਲ ਦੀ ਬਸ ਪਲਟਣ ਕਾਰਨ ਉਸ ਵਿੱਚ ਸਵਾਰ ਕਰੀਬ ਤਿੰਨ ਦਰਜਨ ਬੱਚਿਆਂ ਵਿੱਚੋਂ 10 ਦੇ ਕਰੀਬ ਬੱਚੇ ਫੱਟੜ ਹੋ ਗਏ । ਜਿਨ੍ਹਾਂ ਨੂੰ ਸਧਾਨਕ ਲੋਕਾਂ ਦੀ ਮਦਦ ਨਾਲ ਹਾਜੀਪੁਰ ਦੇ ਸਰਕਾਰੀ ਹਸਪਤਾਲ ਦੇ ਵਿੱਚ ਇਲਾਜ ਲਈ ਲਿਜਾਇਆ ਗਿਆ ।

ਮਿਲੀ ਜਾਣਕਾਰੀ ਮੁਤਾਬਕ ਦਾਤਾਰਪੁਰ ਦੇ ਵਸ਼ੀਸ਼ਟ ਭਾਰਤੀ ਇੰਟਰਨੈਸ਼ਨਲ ਸਕੂਲ ਦੀ ਬਸ ਨੰਬਰ -ਪੀਬੀ 07 ਏਐਸ 6335 ਛੁੱਟੀ ਤੋਂ ਬਾਅਦ ਕਰੀਬ 3 ਵਜੇ ਲਗਭਗ ਤਿੰਨ ਦਰਜਨ ਬੱਚਿਆਂ ਨੂੰ ਘਰ ਛੱਡਣ ਲਈ ਸਕੂਲ ਤੋਂ ਰਵਾਨਾ ਹੋਈ। ਪਰ ਸਕੂਲ ਤੋਂ ਕੁੱਝ ਹੀ ਦੂਰੀ ਤੇ ਮੋੜ ਮੁੜਦਿਆਂ ਹੀ ਬੱਸ ਪਲਟ ਗਈ। ਜਿੱਸ ਵਿੱਚ ਫੱਟੜ ਹੋਏ ਬੱਚਿਆਂ ਨੂੰ ਨੇੜੇ ਦੇ ਸਰਕਾਰੀ ਹਸਪਤਾਲ ਹਾਜੀਪੁਰ ਵਿਖੇ ਪਹੁੰਚਾਇਆ ਗਿਆ। ਜਿਥੇ ਡਾਕਟਰਾਂ ਨੇ ਤਿੰਨ ਬੱਚਿਆਂ ਨੂੰ ਅੱਗੇ ਰੈਫਰ ਕਰ ਦਿੱਤਾ। ਅਤੇ ਬਾਕੀਆਂ ਨੂੰ ਮੁੱਢਲੇ ਇਲਾਜ ਤੋਂ ਬਾਅਦ ਉਨ੍ਹਾਂ ਦੇ ਘਰ ਨੂੰ ਭੇਜ ਦਿੱਤਾ ਗਿਆ ਹੈ । ਬੱਸ ਦੀ ਰਫਤਾਰ ਬਹੁਤ ਘੱਟ ਹੋਣ ਕਾਰਨ ਇਕ ਵੱਡਾ ਹਾਦਸਾ ਹੁੰਦੇ ਹੁੰਦੇ ਟਲਟਲ ਗਿਆ। ਸਰਕਾਰੀ ਹਸਪਤਾਲ ਹਾਜੀਪੁਰ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਜਖਮੀਂ ਬੱਚੀਆਂ ਵਿੱਚ ਕ੍ਰਿਤੀ, ਸ਼ੌਰਯ, ਰੋਹਿਨੀਂ, ਰੋਮੀ, ਗੁਰਨੇਸ਼ ਆਦਿ ਸਨ। ਹਾਦਸੇ ਦੀ ਖਬਰ ਮਿਲਦੇ ਹੀ ਥਾਣਾ ਤਲਵਾੜਾ ਦੀ ਪੁਲਸ ਵੀ ਮੌਕੇ ਤੇ ਪਹੁੰਚ ਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਸਕੂਲ ਦੇ ਪ੍ਰਿੰਸੀਪਲ ਦਿਨਕਰ ਪ੍ਰੈਸ਼ਰ ਨੂੰ ਹਾਦਸੇ ਵਾਰੇ ਪੁੱਛਿਆ ਗਿਆ ਤਾਂ ਉਨ੍ਹਾਂ ਦਾ ਕਹਿਣਾ ਸੀ। ਕਿ ਹਾਦਸੇ ਵਿਚ ਕੁੱਲ ਛੇ ਬੱਚੇ ਜਖਮੀ ਹੋਏ ਸਨ। ਜਿਨ੍ਹਾਂ ਨੂੰ ਜਿਆਦਾ ਸੱਟਾਂ ਲੱਗੀਆਂ ਸਨ। ਅਤੇ ਉਨ੍ਹਾਂ ਨੂੰ ਇਲਾਜ਼ ਕਰਵਾਉਣ ਤੋਂ ਬਾਅਦ ਉਨ੍ਹਾਂ ਦੇ ਮਾਪਿਆਂ ਦੇ ਹਵਾਲੇ ਕਰ ਦਿੱਤਾ ਗਿਆ ਹੈ। ਅਤੇ ਤਿੰਨ ਬੱਚਿਆਂ ਦੇ ਸਿਟੀ ਸਕੈਨ ਕਰਵਾਉਣ ਤੋਂ ਬਾਅਦ ਉਨ੍ਹਾਂ ਨੂੰ ਵੀ ਉਨ੍ਹਾਂ ਦੇ ਮਾਪਿਆਂ ਦੇ ਹਵਾਲੇ ਕਰ ਦਿੱਤਾ ਗਿਆ। ਜੋ ਹੁਣ ਠੀਕ ਹਨ। ਉਨ੍ਹਾਂ ਨੇ ਹਾਦਸੇ ਦਾ ਕਾਰਨ ਮੋੜ ਤੇ ਬਸ ਦੀ ਬ੍ਰੇਕ ਨਾ ਲੱਗਣਾ ਦੱਸਿਆ।