ਬਟਾਲਾ, 27 ਸਤੰਬਰ (ਅਵਿਨਾਸ਼ ਸ਼ਰਮਾ)

: ਬਟਾਲਾ ਪੁਲਿਸ ਨੇ ਅੱਤਵਾਦ ਦੇ ਖ਼ਿਲਾਫ਼ ਵੱਡਾ ਧੱਕਾ ਦਿੰਦੇ ਹੋਏ ਅੰਤਰਰਾਸ਼ਟਰੀ ਪੱਧਰ ’ਤੇ ਫਰਾਰ ਬੱਬਰ ਖਾਲਸਾ ਇੰਟਰਨੈਸ਼ਨਲ (BKI) ਦੇ ਖ਼ਤਰਨਾਕ ਮੈਂਬਰ ਪਰਮਿੰਦਰ ਸਿੰਘ ਉਰਫ ਪਿੰਦੀ ਨੂੰ ਦੁਬਈ (ਅਬੂਧਾਬੀ) ਤੋਂ ਡਿਪੋਰਟ ਕਰਵਾ ਕੇ ਗ੍ਰਿਫਤਾਰ ਕਰ ਲਿਆ ਹੈ।

ਐਸ.ਐਸ.ਪੀ. ਬਟਾਲਾ ਸੁਹੇਲ ਮੀਰ ਕਾਸਿਮ ਨੇ ਪ੍ਰੈਸ ਕਾਨਫਰੰਸ ਵਿਚ ਦੱਸਿਆ ਕਿ ਪਰਮਿੰਦਰ ਸਿੰਘ ਪਿੰਦੀ, ਪੁੱਤਰ ਨਿਰਮਲ ਸਿੰਘ ਵਾਸੀ ਹਰਸੀਆ ਜੇ, ਪਹਿਲਾਂ ਪੰਜਾਬ ਪੁਲਿਸ ਵਿੱਚ ਭਰਤੀ ਸੀ ਪਰ ਹੁਣ ਡਿਸਮਿਸ ਕੀਤਾ ਜਾ ਚੁੱਕਾ ਹੈ। ਉਹ ਪਾਕਿਸਤਾਨ ਆਧਾਰਿਤ ਘੋਸ਼ਿਤ ਅੱਤਵਾਦੀ ਹਰਵਿੰਦਰ ਸਿੰਘ ਉਰਫ ਰਿੰਦਾ ਅਤੇ ਹੈਪੀ ਪੱਛੀਆ ਦਾ ਨਜ਼ਦੀਕੀ ਸਾਥੀ ਹੈ ਅਤੇ ਉਹਨਾਂ ਦੇ ਇਸ਼ਾਰੇ ’ਤੇ ਹੀ ਕਾਰਵਾਈਆਂ ਕਰਦਾ ਰਿਹਾ ਹੈ।

ਪੈਟਰੋਲ ਬੰਬ ਹਮਲਿਆਂ ਤੋਂ ਬਾਅਦ ਭੱਜਿਆ ਸੀ ਦੁਬਈ

ਐਸ.ਐਸ.ਪੀ. ਨੇ ਖੁਲਾਸਾ ਕੀਤਾ ਕਿ ਸਤੰਬਰ 2023 ਵਿੱਚ ਪਰਮਿੰਦਰ ਪਿੰਦੀ ਨੇ ਆਪਣੇ ਸਾਥੀਆਂ ਰਾਹੀਂ ਬਟਾਲਾ ਸ਼ਹਿਰ ਦੀਆਂ ਰਜਿੰਦਰਾ ਵਾਇਨ ਕੰਪਨੀ ਦੀਆਂ ਵੱਖ-ਵੱਖ ਦੁਕਾਨਾਂ ’ਤੇ ਪੈਟਰੋਲ ਬੰਬ ਹਮਲੇ ਕਰਵਾਏ ਸਨ। ਇਹ ਹਮਲੇ ਅੱਤਵਾਦੀ ਰਿੰਦਾ ਅਤੇ ਹੈਪੀ ਪੱਛੀਆ ਦੇ ਕਹਿਣ ’ਤੇ ਕੀਤੇ ਗਏ ਸਨ। ਇਸ ਤੋਂ ਬਾਅਦ ਹੀ ਉਹ ਦੁਬਈ ਫਰਾਰ ਹੋ ਗਿਆ ਸੀ। ਪਿੰਦੀ ਵਿਰੁੱਧ ਹਿੰਸਕ ਹਮਲਿਆਂ, ਜਬਰੀ ਵਸੂਲੀ ਅਤੇ ਅੱਤਵਾਦੀ ਕਾਰਵਾਈਆਂ ਦੇ ਕਈ ਗੰਭੀਰ ਕੇਸ ਦਰਜ ਹਨ।

ਰੈਡ ਕਾਰਨਰ ਨੋਟਿਸ ’ਤੇ ਵੱਡੀ ਕਾਰਵਾਈ

ਪੁਲਿਸ ਨੇ ਪਰਮਿੰਦਰ ਪਿੰਦੀ ਵਿਰੁੱਧ ਰੈਡ ਕਾਰਨਰ ਨੋਟਿਸ ਜਾਰੀ ਕੀਤਾ ਸੀ। ਇਸ ’ਤੇ ਕਾਰਵਾਈ ਕਰਦੇ ਹੋਏ ਬਟਾਲਾ ਪੁਲਿਸ ਨੇ ਕੇਂਦਰੀ ਏਜੰਸੀਆਂ ਦੇ ਸਹਿਯੋਗ ਨਾਲ ਇਕ ਸੀਨੀਅਰ ਅਧਿਕਾਰੀ ਸਮੇਤ 4 ਮੈਂਬਰੀ ਟੀਮ ਦੁਬਈ ਭੇਜੀ। ਕਾਰਵਾਈ ਸਫਲ ਰਹੀ ਅਤੇ ਉਸ ਨੂੰ ਡਿਪੋਰਟ ਕਰਵਾ ਕੇ ਪੰਜਾਬ ਲਿਆਂਦਾ ਗਿਆ। ਹੁਣ ਉਸ ਨੂੰ ਮੁਕੱਦਮਾ ਨੰਬਰ 112 ਮਿਤੀ 30-09-2025 ਧਾਰਾ 307, 436, 427, 506, 148, 149 IPC, ਥਾਣਾ ਸਦਰ ਬਟਾਲਾ ਅਧੀਨ ਗ੍ਰਿਫਤਾਰ ਕਰਕੇ ਰਿਮਾਂਡ ’ਤੇ ਲਿਆ ਗਿਆ ਹੈ। ਪੁੱਛਗਿੱਛ ਜਾਰੀ ਹੈ ਅਤੇ ਹੋਰ ਵੱਡੇ ਖੁਲਾਸਿਆਂ ਦੀ ਉਮੀਦ ਹੈ।ਵੱਖ-ਵੱਖ ਜ਼ਿਲ੍ਹਿਆਂ ਵਿੱਚ ਪਰਮਿੰਦਰ ਸਿੰਘ ਪਿੰਦੀ ਵਿਰੁੱਧ 6 ਮੁਕੱਦਮੇ ਦਰਜ ਹਨ