ਪਰਿਵਾਰ ਦੀ ਸਾਰੀ ਜਮੀਨ ਆਪਣੇ ਕੋਲ ਰੱਖਣ ਦੀ ਚਾਂਹ ਚ ਭੈਣ ਨੇ ਕਿਰਾਏ ਦੇ ਕਾਤਲਾਂ ਰਾਹੀਂ ਭਰਾ ਦਾ ਕਰਵਾਇਆ ਕਤਲ,ਪੁਲਿਸ ਨੇ ਭੈਣ ਨੂੰ ਕੀਤਾ ਗਿਰਫ਼ਤਾਰ 

ਬੰਗਾ 2 ਜੂਨ (ਜਤਿੰਦਰ ਪਾਲ ਸਿੰਘ ਕਲੇਰ) : ਥਾਣਾ ਬੰਗਾ ਸਦਰ ਦੇ ਪਿੰਡ ਸੱਲ ਕਲਾਂ ‘ਚ 25 ਮਈ ਨੂੰ ਦਿਨ ਦਿਹਾੜੇ ਘਰੋਂ ਬੁਲਾ ਕੇ ਗੋਲੀ ਚਲਾਉਣ ਦੇ ਮਾਮਲੇ ‘ਚ ਮ੍ਰਿਤਕ ਦੀ ਭੈਣ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਇਸ ਮਾਮਲੇ ਸਬੰਧੀ ਪੁਲਿਸ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਭੈਣ ਪਰਿਵਾਰ ਦੀ ਸਾਰੀ ਜ਼ਮੀਨ ਆਪਣੇ ਕੋਲ ਰੱਖਣਾ ਚਾਹੁੰਦੀ ਸੀ। ਇਸ ਲਈ ਉਸਨੇ ਕਿਰਾਏ ਦੇ ਕਾਤਲਾਂ ਰਾਹੀਂ ਆਪਣੇ ਭਰਾ ਨੂੰ ਮਰਵਾ ਦਿੱਤਾ।

ਫਿਲਹਾਲ ਪੁਲਿਸ ਇਸ ਮਾਮਲੇ ਵਿੱਚ ਕਾਤਲਾਂ ਦੀ ਭਾਲ ਕਰ ਰਹੀ ਹੈ। ਦੱਸ ਦੇਈਏ ਕਿ 25 ਮਈ ਨੂੰ ਕਥਿਤ ਦੋਸ਼ੀ ਨੌਜਵਾਨ ਅਮਰਜੀਤ ਸਿੰਘ ਨੂੰ ਮੋਟਰਸਾਈਕਲ ‘ਤੇ ਬਿਠਾ ਕੇ ਆਪਣੇ ਨਾਲ ਲੈ ਗਿਆ ਸੀ ਅਤੇ ਪਿੰਡ ਤੋਂ ਕੁਝ ਦੂਰ ਲੈ ਕੇ ਜਾ ਕੇ ਨੇੜੇ ਤੋਂ ਉਸ ਦੀ ਛਾਤੀ ‘ਤੇ ਗੋਲੀ ਮਾਰ ਦਿੱਤੀ ਸੀ। ਜਿਸ ਕਾਰਨ ਉਸ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ। ਇਸ ਘਟਨਾ ਤੋਂ ਬਾਅਦ ਪੂਰੇ ਇਲਾਕੇ ‘ਚ ਸਨਸਨੀ ਫੈਲ ਗਈ।

ਇਸ ਦੌਰਾਨ ਜਦੋਂ ਪੁਲਸ ਨੇ ਮੌਕੇ ‘ਤੇ ਪਹੁੰਚ ਕੇ ਜਾਂਚ ਕੀਤੀ ਤਾਂ ਉਨ੍ਹਾਂ ਨੂੰ ਸੀਸੀਟੀਵੀ ‘ਚ ਦੋ ਦੋਸ਼ੀ ਵੀ ਨਜ਼ਰ ਆਏ, ਜਿਨ੍ਹਾਂ ਦੀ ਪੁਲਸ ਵਲੋਂ ਭਾਲ ਕੀਤੀ ਜਾ ਰਹੀ ਹੈ। ਪਰ ਇਸ ਮਾਮਲੇ ‘ਚ ਪਹਿਲੇ ਦਿਨ ਤੋਂ ਹੀ ਪੁਲਿਸ ਨੂੰ ਅਮਰਜੀਤ ਦੀ ਭੈਣ ਮਨਦੀਪ ਕੌਰ ‘ਤੇ ਵੀ ਸ਼ੱਕ ਸੀ।

ਬੰਗਾ ਡਵੀਜ਼ਨ ਦੇ ਡੀ,ਐਸ,ਪੀ ਗੁਰਪ੍ਰੀਤ ਸਿੰਘ ਨੇ ਮੀਡੀਆ ਨੂੰ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਪਿੰਡ ਸੱਲ ਕਲਾਂ ਦਾ ਰਹਿਣ ਵਾਲਾ ਅਮਰਜੀਤ ਸਿੰਘ (35) ਬੁੱਧਵਾਰ ਨੂੰ ਆਪਣੇ ਘਰ ਮੌਜੂਦ ਸੀ ਕਿ ਮੋਟਰਸਾਈਕਲ ‘ਤੇ ਸਵਾਰ ਦੋ ਨੌਜਵਾਨ ਆਏ ਅਤੇ ਦਰਵਾਜ਼ਾ ਖੜਕਾਇਆ,ਜਿਸ ਨੂੰ ਉਸ ਦੀ 12 ਸਾਲਾ ਬੇਟੀ ਨੇ ਖੋਲ੍ਹਿਆ। ਨੌਜਵਾਨਾਂ ਨੇ ਅਮਰਜੀਤ ਦੀ ਲੜਕੀ ਨੂੰ ਦੱਸਿਆ ਕਿ ਕੈਲੇ ਨੇ ਉਸ ਨੂੰ ਬੁਲਾਇਆ ਹੈ।

ਇਸ ਤੋਂ ਬਾਅਦ ਅਮਰਜੀਤ ਘਰ ਤੋਂ ਬਾਹਰ ਨਿਕਲਿਆ ਅਤੇ ਉਸ ਨੂੰ ਬਾਈਕ ਤੇ ਲੈ ਕੇ ਚਲੇ ਗਏ।ਪਿੰਡ ਬਾਲੋ ਦੇ ਸ਼ਮਸ਼ਾਨ ਘਾਟ ਨੇੜੇ ਉਸਦੀ ਲਾਸ਼ ਮਿਲੀ। ਉਸ ਦੀ ਛਾਤੀ ਵਿਚ ਬਹੁਤ ਨੇੜਿਓਂ ਗੋਲੀ ਲੱਗੀ ਸੀ। ਫੁਟੇਜ ਜਾਂਚ ‘ਚ ਦੋ ਮੋਟਰਸਾਈਕਲ ਸਵਾਰ ਦਿਖਾਈ ਦੇ ਰਹੇ ਹਨ। ਇਸ ਮਾਮਲੇ ਵਿੱਚ ਪੁਲਿਸ ਨੇ ਉਸ ਸਮੇਂ ਪਿੰਡ ਦੇ ਆਲੇ-ਦੁਆਲੇ ਫੋਰੈਂਸਿਕ ਟੀਮ ਅਤੇ ਐਕਟਿਵ ਮੋਬਾਈਲ ਫ਼ੋਨ ਨੰਬਰਾਂ ਨੂੰ ਕਬਜ਼ੇ ਵਿੱਚ ਲੈ ਲਿਆ ਸੀ।