ਤਲਵਾੜਾ / ਦਸੂਹਾ (ਚੌਧਰੀ) 

–ਕੈਬਨਿਟ ਮੰਤਰੀ ਨੇ 71.12 ਲੱਖ ਰੁਪਏ ਦੀ ਲਾਗਤ ਨਾਲ ਪਿੰਡ ਖਟੀਗੜ੍ਹ ’ਚ ਕੀਤਾ ਜਲ ਸਪਲਾਈ ਸਕੀਮ ਦਾ ਉਦਘਾਟਨ

7 ਸਤੰਬਰ : ਕੈਬਨਿਟ ਮੰਤਰੀ ਪੰਜਾਬ ਬ੍ਰਮ ਸ਼ੰਕਰ ਜਿੰਪਾ ਨੇ ਕਿਹਾ ਕਿ ਸੂਬੇ ਵਿਚ ਨਹਿਰੀ ਜਲ ਯੋਜਨਾ ’ਤੇ ਬੜੀ ਤੇਜ਼ੀ ਨਾਲ ਕੰਮ ਚੱਲ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਕਰੀਬ 200 ਕਰੋੜ ਰੁਪਏ ਦੀ ਲਾਗਤ ਨਾਲ ਚੱਲ ਰਹੀ ਨਹਿਰੀ ਜਲ ਯੋਜਨਾ ਦਾ 25 ਫੀਸਦੀ ਕੰਮ ਮੁਕੰਮਲ ਕੀਤਾ ਜਾ ਚੁੱਕਾ ਹੈ। ਉਹ ਅੱਜ ਬਲਾਕ ਤਲਵਾੜਾ ਦੇ ਪਿੰਡ ਖਟੀਗੜ੍ਹ ਵਿਖੇ 71.12 ਲੱਖ ਰੁਪਏ ਦੀ ਲਾਗਤ ਨਾਲ ਬਾਈਫਰਕੇਸ਼ਨ ਜਲ ਸਪਲਾਈ ਸਕੀਮ ਦਾ ਉਦਘਾਟਨ ਕਰਨ ਦੌਰਾਨ ਇਲਾਕਾ ਨਿਵਾਸੀਆਂ ਨੂੰ ਸੰਬੋਧਨ ਕਰ ਰਹੇ ਸਨ। ਇਸ ਦੌਰਾਨ ਉਨ੍ਹਾਂ ਨਾਲ ਵਿਧਾਇਕ ਦਸੂਹਾ ਕਰਮਬੀਰ ਸਿੰਘ ਘੁੰਮਣ ਅਤੇ ਐਸ.ਡੀ.ਐਮ. ਅਸ਼ੋਕ ਸ਼ਰਮਾ ਵੀ ਮੌਜੂਦ ਸਨ।
ਕੈਬਨਿਟ ਮੰਤਰੀ ਨੇ ਦੱਸਿਆ ਕਿ ਪਹਿਲਾਂ ਪਿੰਡ ਖਟੀਗੜ੍ਹ ਦੀ ਜਲ ਸਪਲਾਈ ਯੋਜਨਾ ਪਿੰਡ ਗੇਰਾ ਬਲਾਕ ਹਾਜੀਪੁਰ ਤਹਿਤ ਕਵਰ ਸੀ। ਇਸ ਯੋਜਨਾ ਤਹਿਤ 7 ਪਿੰਡ ਗੇਰਾ, ਹੰਦਵਾਲ, ਚੱਕੜਿਆਲ, ਲਲੋਤਾ, ਖਟੀਗੜ੍ਹ, ਲੁਧਿਆੜੀ ਤੇ ਉਲਾਹਾ ਸ਼ਾਮਿਲ ਸਨ। ਇਸ ਸਕੀਮ ਵਿਚ 7 ਪਿੰਡ ਹੋਣ ਕਾਰਨ ਪਿੰਡ ਖਟੀਗੜ੍ਹ ਤੇ ਲਲੋਤਾ ਦੇ ਟੇਲ ਐਡ ’ਤੇ ਹੋਣ ਕਾਰਨ ਪਾਣੀ ਦੀ ਸਪਲਾਈ ਪੂਰੀ ਮਾਤਰਾ ਵਿਚ ਨਹੀਂ ਪਹੁੰਚ ਰਹੀ ਸੀ। ਉਨ੍ਹਾਂ ਕਿਹਾ ਕਿ ਹੁਣ ਪਿੰਡ ਖਟੀਗੜ੍ਹ, ਲਲੋਤਾ ਅਤੇ ਚੱਕੜਿਆਲ ਨੂੰ ਵੱਖ ਕਰਕੇ ਜਲ ਸਪਲਾਈ ਯੋਜਨਾ ਖਟੀਗੜ੍ਹ ਤਿਆਰ ਕੀਤੀ ਗਈ ਹੈ ਅਤੇ ਇਸ ਯੋਜਨਾ ਤੋਂ 226 ਘਰਾਂ ਵਿਚ 1037 ਲੋਕਾਂ ਤੱਕ ਪਾਣੀ ਦੀ ਸਪਲਾਈ ਪਹੁੰਚਾਈ ਗਈ ਹੈ।
ਬ੍ਰਮ ਸ਼ੰਕਰ ਜਿੰਪਾ ਨੇ ਦੱਸਿਆ ਕਿ ਇਸ ਯੋਜਨਾ ਤਹਿਤ ਇਕ ਟਿਊਬਵੈਲ, ਪਾਣੀ ਦੀ ਟੰਕੀ, ਪੰਪ ਚੈਂਬਰ, ਮਸ਼ੀਨਰੀ, ਪਾਣੀ ਦੀਆਂ ਪਾਈਪਾਂ ਅਤੇ ਵਾਟਰ ਵਰਕਸ ਕਨੈਕਸ਼ਨ ਦਾ ਕੰਮ ਕੀਤਾ ਗਿਆ ਹੈ। ਇਸ ਮੌਕੇ ’ਤੇ ਚੀਫ ਇੰਜੀਨੀਅਰ (ਉਤਰ) ਜਸਬੀਰ ਸਿੰਘ, ਐਸ.ਈ ਵਿਜੇ ਕੁਮਾਰ, ਐਕਸੀਅਨ ਅਨੁਜ ਸ਼ਰਮਾ, ਐਸ.ਡੀ.ਓ ਰਾਹੁਲ ਤੇ ਜੇ.ਈ ਮਨਜੀਤ ਸਿੰਘ ਤੋਂ ਇਲਾਵਾ ਹੋਰ ਪਤਵੰਤੇ ਵੀ ਮੌਜੂਦ ਸਨ।