ਬਟਾਲਾ, 13 ਸਤੰਬਰ (ਅਵਿਨਾਸ਼ ਸ਼ਰਮਾ)
: ਮਰਿਆਦਾ ਪੁਰਸ਼ੋਤਮ ਭਗਵਾਨ ਸ੍ਰੀ ਰਾਮ ਦੇ ਜੀਵਨ ਆਦਰਸ਼ਾਂ ਅਤੇ ਧਰਮ, ਸੱਚਾਈ ਤੇ ਨੇਕੀ ਦੇ ਸੰਦੇਸ਼ ਨੂੰ ਲੋਕਾਂ ਤੱਕ ਪਹੁੰਚਾਉਣ ਦੇ ਉਦੇਸ਼ ਨਾਲ ਸ੍ਰੀ ਕ੍ਰਿਸ਼ਨਾ ਦੀਵਾਨ ਡਰਾਮੈਟਿਕ ਕਲੱਬ ਪ੍ਰੇਮ ਨਗਰ ਵੱਲੋਂ ਇਸ ਸਾਲ ਦੀ ਰਾਮਲੀਲਾ ਦੇ ਆਯੋਜਨ ਲਈ ਧਾਰਮਿਕ ਰੀਤੀ-ਰਿਵਾਜਾਂ ਨਾਲ ਸ਼ੁਭ ਆਰੰਭ ਕੀਤਾ ਗਿਆ।
ਕਲੱਬ ਦੇ ਡਾਇਰੈਕਟਰ ਰਮਨ ਕੁਮਾਰ ਦੀ ਅਗਵਾਈ ਹੇਠ ਰਾਮਲੀਲਾ ਵਿੱਚ ਵੱਖ-ਵੱਖ ਪਾਤਰਾਂ ਦੀ ਭੂਮਿਕਾ ਨਿਭਾਉਣ ਵਾਲੇ ਕਲਾਕਾਰਾਂ ਅਤੇ ਸੇਵਾਦਾਰਾਂ ਨੇ ਸਭ ਤੋਂ ਪਹਿਲਾਂ ਝੰਡੇ ਸਮੇਤ ਸ੍ਰੀ ਸ਼ਿਵ ਦੁਰਗਾ ਮੰਦਿਰ ਵਿਖੇ ਨਤਮਸਤਕ ਹੋ ਕੇ ਭਗਵਾਨ ਦਾ ਆਸ਼ੀਰਵਾਦ ਪ੍ਰਾਪਤ ਕੀਤਾ। ਇਸ ਮੌਕੇ ਸਮੂਹ ਕਲਾਕਾਰਾਂ ਨੇ ਸ਼ਰਧਾ ਭਾਵਨਾ ਨਾਲ ਰਾਮਲੀਲਾ ਨੂੰ ਪੂਰੀ ਨਿਸ਼ਠਾ, ਮਰਿਆਦਾ ਅਤੇ ਸਮਰਪਣ ਨਾਲ ਕਰਨ ਦਾ ਸੰਕਲਪ ਲਿਆ।
ਇਸ ਉਪਰੰਤ ਰਾਮਲੀਲਾ ਗਰਾਊਂਡ, ਗੂੰਗੀ ਅਹਾਤਾ, ਪ੍ਰੇਮ ਨਗਰ ਵਿਖੇ ਵਿਧੀ-ਵਿਧਾਨ ਅਨੁਸਾਰ ਝੰਡਾ ਪੂਜਨ ਅਤੇ ਝੰਡਾ ਸਥਾਪਨਾ ਦੀ ਰਸਮ ਅਦਾ ਕੀਤੀ ਗਈ। ਸ਼ਾਸਤਰੀ ਸ਼ੰਭੂ ਪ੍ਰਸ਼ਾਦ ਸ਼ਰਮਾ ਵੱਲੋਂ ਮੰਤਰ ਉਚਾਰਣ ਅਤੇ ਧਾਰਮਿਕ ਰੀਤੀ-ਰਿਵਾਜਾਂ ਅਨੁਸਾਰ ਇਹ ਪਾਵਨ ਰਸਮ ਸੰਪੰਨ ਕਰਵਾਈ ਗਈ। ਮਾਹੌਲ ਭਗਤੀਮਈ ਹੋ ਗਿਆ ਅਤੇ ਹਾਜ਼ਰ ਸੰਗਤ ਨੇ ਭਗਵਾਨ ਸ੍ਰੀ ਰਾਮ ਦੇ ਜੈਕਾਰਿਆਂ ਨਾਲ ਪੂਰਾ ਵਾਤਾਵਰਨ ਗੂੰਜਾ ਦਿੱਤਾ।
ਕਲੱਬ ਵੱਲੋਂ ਦੱਸਿਆ ਗਿਆ ਕਿ ਸੋਮਵਾਰ ਤੋਂ ਰਾਮਲੀਲਾ ਦੀਆਂ ਰਿਹਰਸਲਾਂ ਸ਼ੁਰੂ ਕਰ ਦਿੱਤੀਆਂ ਜਾਣਗੀਆਂ, ਜਦਕਿ 11 ਅਕਤੂਬਰ ਤੋਂ ਰਾਮਲੀਲਾ ਦੀਆਂ ਪੇਸ਼ਕਾਰੀਆਂ ਦਾ ਸ਼ੁਭ ਆਰੰਭ ਹੋਵੇਗਾ। ਇਸ ਦੌਰਾਨ ਭਗਵਾਨ ਸ੍ਰੀ ਰਾਮ ਦੇ ਜੀਵਨ ਨਾਲ ਜੁੜੇ ਪ੍ਰਸੰਗਾਂ ਨੂੰ ਭਾਵਪੂਰਨ ਢੰਗ ਨਾਲ ਮੰਚਿਤ ਕਰਕੇ ਦਰਸ਼ਕਾਂ ਨੂੰ ਸੱਚ, ਧਰਮ, ਤਿਆਗ ਅਤੇ ਮਰਿਆਦਾ ਦੇ ਰਾਹ ’ਤੇ ਚੱਲਣ ਦਾ ਸੰਦੇਸ਼ ਦਿੱਤਾ ਜਾਵੇਗਾ।
ਇਸ ਮੌਕੇ ਕਲੱਬ ਪ੍ਰਧਾਨ ਰਕੇਸ਼ ਸਹਿਦੇਵ, ਮੰਦਰ ਪ੍ਰਧਾਨ ਰਾਜੇਸ਼ ਰਾਜੂ, ਸੈਕਟਰੀ ਰੋਹਿਤ ਸਹਿਦੇਵ, ਪ੍ਰਦੀਪ ਚੌਧਰੀ, ਗੋਰੀ ਸ਼ੰਕਰ, ਰਕੇਸ਼ ਸ਼ਰਮਾ, ਵਿਪਨ ਕੁਮਾਰ, ਪ੍ਰਭੋਧ ਕੁਮਾਰ, ਟੀਨੂ ਸ਼ਰਮਾ, ਗਗਨਦੀਪ ਚੋਪੜਾ, ਅਨਿਲ ਕੁਮਾਰ, ਰਾਜੂ, ਮੋਨੂੰ ਸ਼ਰਮਾ, ਸੁਰਿੰਦਰ ਟੇਲਰ, ਰਜੀਵ ਕੁਮਾਰ, ਅਕੁਰ ਅਗਰਵਾਲ, ਸੰਜੀਵ ਕੁਮਾਰ ਸਮੇਤ ਵੱਡੀ ਗਿਣਤੀ ਵਿੱਚ ਮਹੱਲਾ ਵਾਸੀ ਅਤੇ ਰਾਮਲੀਲਾ ਨਾਲ ਜੁੜੇ ਕਲਾਕਾਰ ਹਾਜ਼ਰ ਸਨ।
