ਫਗਵਾੜਾ 31 ਅਕਤੂਬਰ (ਲਾਲੀ )

* ਕਿਹਾ- ਆਈ ਨੋ ਮਾਈ ਡਿਊਟੀ, ਨੋ ਨੀਡ ਟੂ ਟੀਚ ਮੀ

:  ਆਮ ਆਦਮੀ ਪਾਰਟੀ ਹਲਕਾ ਵਿਧਾਨਸਭਾ ਫਗਵਾੜਾ ਦੇ ਇੰਚਾਰਜ ਜੋਗਿੰਦਰ ਸਿੰਘ ਮਾਨ ਨੇ ਉਹਨਾਂ ਦੇ ਕੰਮਾਂ ਨੂੰ ਲੈ ਕੇ ਨੁਕਤਾ-ਚੀਨੀ ਕਰਨ ਵਾਲੇ ਵਿਰੋਧੀਆਂ ਨੂੰ ਅੱਜ ਤਿੱਖਾ ਜਵਾਬ ਦਿੱਤਾ। ਉਹਨਾਂ ਕਿਹਾ ਕਿ ‘ਆਈ ਨੋ ਮਾਈ ਡਿਊਟੀ, ਨੋ ਨੀਡ ਟੂ ਟੀਚ ਮੀ’ (ਮੈਂ ਆਪਣਾ ਫਰਜ਼ ਜਾਣਦਾ ਹਾਂ, ਮੈਨੂੰ ਸਿਖਾਉਣ ਦੀ ਕੋਈ ਲੋੜ ਨਹੀਂ)। ਉਹਨਾਂ ਕਿਹਾ ਕਿ ਸਿਆਸਤ ਵਿਚ ਮੈਨੂੰ ਅੱਧੀ ਸਦੀ ਦਾ ਤਜ਼ੁਰਬਾ ਹੈ। ਮੈਂ ਬੇਸ਼ਕ ਸਰਕਾਰ ਵਿਚ ਸ਼ਾਮਲ ਰਿਹਾ ਹੋਵਾਂ ਜਾਂ ਨਾ, ਪਰ ਜਨਤਾ ਦਾ ਸੇਵਕ ਬਣ ਕੇ ਆਪਣੀ ਡਿਊਟੀ ਨੂੰ ਪੂਰੀ ਤਨਦੇਹੀ ਦੇ ਨਾਲ ਨਿਭਾਇਆ ਹੈ। ਜੋ ਲੋਕ ਮੈਨੂੰ ਗਿਆਨ ਦੇਣ ਦੀ ਕੋਸ਼ਿਸ਼ ਕਰ ਰਹੇ ਹਨ, ਉਹਨਾਂ ਵਰਗੇ ਵੀਹ ਅਫਸਰ ਮੇਰੇ ਮੰਤਰੀ ਰਹਿੰਦਿਆਂ ਹੇਠਾਂ ਕੰਮ ਕਰਦੇ ਰਹੇ ਹਨ। ਮਾਨ ਨੇ ਤਲਖ ਲਹਿਜੇ ਵਿਚ ਕਿਹਾ ਕਿ ਵਿਰੋਧੀ ਧਿਰ ਦੇ ਆਗੂ ਅੱਜਕਲ ਸਿਆਸੀ ਤੌਰ ਤੇ ਬੇਰੁਜਗਾਰ ਹਨ ਕਿਉਂਕਿ ਸੂਬੇ ਵਿਚ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਹੇਠ ਇਕ ਹਰਮਨ ਪਿਆਰੀ ਅਤੇ ਤਾਕਤਵਰ ਸਰਕਾਰ ਕਾਇਮ ਹੈ। ਜਿਸ ਪਾਸ ਭਾਰੀ ਬਹੁਮਤ ਹੈ ਅਤੇ ਅਗਲੀਆਂ ਵਿਧਾਨਸਭਾ ਚੋਣਾਂ ਵਿਚ ਵੀ ਵਿਰੋਧੀਆਂ ਨੂੰ ਉੱਮੀਦ ਦੀ ਕੋਈ ਕਿਰਨ ਨਜ਼ਰ ਨਹੀਂ ਆਉਂਦੀ ਕਿਉਂਕਿ ਭਗਵੰਤ ਮਾਨ ਸਰਕਾਰ ਅਤੇ ਉਹਨਾਂ ਦੇ ਮੰਤਰੀ ਹੀ ਨਹੀਂ ਬਲਕਿ ਹਲਕਾ ਇੰਚਾਰਜ ਵੀ ਲੋਕ ਸੇਵਾ ਨੂੰ ਸਮਰਪਿਤ ਹਨ। ਇਸ ਲਈ ਇਹ ਵਿਰੋਧੀ ਆਗੂ ਅਖ਼ਬਾਰੀ ਸੁਰਖੀਆਂ ਵਿਚ ਬਣੇ ਰਹਿਣ ਲਈ ਅਜਿਹੀ ਬਿਆਨਬਾਜੀ ਕਰਦੇ ਹਨ। ਪਰ ਉਹਨਾਂ ਨੂੰ ਕੁੱਝ ਵੀ ਹਾਸਲ ਹੋਣ ਵਾਲਾ ਨਹੀਂ ਹੈ। ਫਗਵਾੜਾ ਦੀ ਜਨਤਾ ਆਪ ਸਰਕਾਰ ਅਤੇ ਉਸਦੇ ਲੀਡਰਾਂ ਦੀਆਂ ਕਾਰਗੁਜਾਰੀਆਂ ਤੋਂ ਪੂਰੀ ਤਰ੍ਹਾਂ ਸੰਤੁਸ਼ਟ ਹੈ। ਜਿਸਦਾ ਸਬੂਤ ਹੈ ਕਿ ਸਾਰੀਆਂ ਵਿਰੋਧੀ ਧਿਰਾਂ ਇਸ ਸਮੇਂ ਆਪਣੇ ਭਵਿੱਖ ਨੂੰ ਲੈ ਕੇ ਚਿੰਤਤ ਅਤੇ ਨਮੋਸ਼ੀ ਵਿਚ ਹਨ ਤੇ ਉਹਨਾਂ ਦੇ ਪਾਰਟੀ ਵਰਕਰ ਆਮ ਆਦਮੀ ਪਾਰਟੀ ਵਿਚ ਸ਼ਾਮਲ ਹੋਣ ਲਈ ਬੇਤਾਬ ਹਨ।
ਤਸਵੀਰ – ਜੋਗਿੰਦਰ ਸਿੰਘ ਮਾਨ।