ਗੜ੍ਹਦੀਵਾਲਾ 17 ਜਨਵਰੀ (ਚੌਧਰੀ) 

: ਗੁਰਸਿੱਖ ਸਦਾ ਮਰਿਆਦਿਤ ਜੀਵਨ ਬਤੀਤ ਕਰਦਾ ਹੈ। ਉਪਰੋਕਤ ਵਿਚਾਰ ਗੁਰਤੇਜ ਸਿੰਘ ਜੀ ਨੇ ਸੰਤ ਨਿਰੰਕਾਰੀ ਸਤਸੰਗ ਭਵਨ ਟੀ.ਡੀ.ਆਈ. ਮੋਹਾਲੀ ਵਿਖੇ ਪਿੰਡ ਸੋਹਾਣਾ ਦੇ ਨੌਜਵਾਨ ਮਹਾਤਮਾ ਹਰਵਿੰਦਰ ਸਿੰਘ ਬਿੰਦੀ ਦੇ ਜੀਵਨ ਤੋਂ ਪ੍ਰੇਰਨਾ ਲੈਣ ਲਈ ਭਵਨ ਵਿੱਚ ਕਰਵਾਏ ਗਏ ਪ੍ਰੇਰਨਾ ਦਿਵਸ ਸਤਿਸੰਗ ਦੌਰਾਨ ਪ੍ਰਗਟ ਕੀਤੇ, ਜੋ ਕਿ ਹਾਲ ਹੀ ਕੈਨੇਡਾ ਵਿੱਚ ਬ੍ਰਹਮਲੀਨ ਹੋ ਗਿਆ ਸੀ। ਉਨਾਂ ਸਤਿਗੁਰੂ ਮਾਤਾ ਸੁਦੀਕਸਾ ਜੀ ਮਹਾਰਾਜ ਦੀਆਂ ਸਿੱਖਿਆਵਾਂ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਸੇਵਾ, ਸਿਮਰਨ ਅਤੇ ਸਤਿਸੰਗ ਗੁਰਸਿੱਖ ਦੇ ਜੀਵਨ ਦਾ ਹਿੱਸਾ ਹਨ, ਜਿਨਾਂ ਨੂੰ ਸਤਿਗੁਰੂ ਦੀ ਕਿਰਪਾ ਨਾਲ ਜੀਵਨ ਵਿੱਚ ਧਾਰਨ ਕੀਤਾ ਜਾ ਸਕਦਾ ਹੈ। ਨੌਜਵਾਨ ਮਹਾਤਮਾ ਹਰਬਿੰਦਰ ਸਿੰਘ ਬਿੰਦੀ ਨੇ ਵੀ ਸਤਿਗੁਰੂ ਦੀਆਂ ਸਿੱਖਿਆਵਾਂ ਨੂੰ ਆਪਣੇ ਜੀਵਨ ਵਿੱਚ ਅਪਣਾਇਆ ਅਤੇ ਪ੍ਰੇਰਨਾਦਾਇਕ ਜੀਵਨ ਬਤੀਤ ਕਰਕੇ ਆਪਣੀਆਂ ਜਿਮੇਵਾਰੀਆਂ ਨੂੰ ਨਿਭਾਇਆ। ਇਸ ਦੌਰਾਨ ਨੌਜਵਾਨ ਮਹਾਤਮਾ ਹਰਵਿੰਦਰ ਸਿੰਘ ਬਿੰਦੀ ਵੱਲੋਂ ਕੈਨੇਡਾ ਵਿੱਚ ਦਿੱਤੇ ਗਏ ਪ੍ਰਵਚਨ ਵੀ ਸੁਣਾਏ ਗਏ, ਜਿਸ ਵਿੱਚ ਉਨਾਂ ਸਤਿਗੁਰੂ ਦੇ ਬਚਨਾਂ ਨੂੰ ਅਮਲੀ ਰੂਪ ਵਿੱਚ ਜਨ ਜਨ ਤੱਕ ਪਹੁੰਚਾਉਣ, ਮਾਪਿਆਂ ਦਾ ਪੂਰਾ ਸਤਿਕਾਰ ਕਰਨ ਅਤੇ ਹੋਰ ਸਿੱਖਿਆਵਾਂ ਗ੍ਰਹਿਣ ਕਰਨ ਦਾ ਸੰਦੇਸ ਦਿੱਤਾ। ਇਸ ਦੌਰਾਨ ਪਰਿਵਾਰ ਦੀ ਵਲੋਂ ਮੁੱਖੀ ਮਹਾਤਮਾ ਗੁਰਪ੍ਰਤਾਪ ਸਿੰਘ ਜੀ ਨੇ ਸੰਗਤਾਂ ਤੋਂ ਪਰਿਵਾਰ ਲਈ ਅਸ਼ੀਰਵਾਦ ਮੰਗਿਆ। ਇਸ ਮੌਕੇ ਸੁਰਮੁੱਖ ਸਿੰਘ, ਜਸਵੰਤ ਕੌਰ, ਪ੍ਰਦੀਪ ਸਿੰਘ ਲਾਲੀ ਸਮੇਤ ਵੱਡੀ ਗਿਣਤੀ ਵਿੱਚ ਸੰਗਤਾਂ ਹਾਜਰ ਸਨ।