ਗੜ੍ਹਦੀਵਾਲਾ 14 ਸਤੰਬਰ (ਚੌਧਰੀ )

: ਕੰਢੀ ਖੇਤਰ ਦੇ ਪਿੰਡ ਚੱਕਲਾਦਿਆ ਦੇ ਵਸਨੀਕ 23 ਸਾਲਾ ਈਸ਼ਾਨ ਮਿਨਹਾਸ ਨੇ ਭਾਰਤੀ ਫੌਜ ਵਿੱਚ ਲੈਫਟੀਨੈਂਟ ਬਣ ਕੇ ਆਪਣੇ ਪਿੰਡ ਦਾ ਹੀ ਨਹੀਂ, ਸਗੋਂ ਹੁਸ਼ਿਆਰਪੁਰ ਜ਼ਿਲ੍ਹੇ ਦਾ ਵੀ ਮਾਣ ਵਧਾਇਆ ਹੈ। ਲੈਫਟੀਨੈਂਟ ਬਣਨ ਉਪਰੰਤ ਜਦੋਂ ਈਸ਼ਾਨ ਮਿਨਹਾਸ ਆਪਣੀ ਚੌਥੀ ਪੀੜ੍ਹੀ ਦੀ ਫੌਜੀ ਵਿਰਾਸਤ ਨੂੰ ਅੱਗੇ ਵਧਾਉਂਦੇ ਹੋਏ ਆਪਣੇ ਪਿੰਡ ਚੱਕਲਾਦਿਆ ਪਹੁੰਚੇ ਤਾਂ ਪੂਰੇ ਪਿੰਡ ਵਿੱਚ ਖੁਸ਼ੀ ਦਾ ਮਾਹੌਲ ਬਣ ਗਿਆ। ਸੈਂਕੜਿਆਂ ਲੋਕਾਂ ਨੇ ਆਪਣੇ ਪਿੰਡ ਦੇ ਪੁੱਤਰ ਦਾ ਨਿੱਘਾ ਸਵਾਗਤ ਕੀਤਾ।

ਇਸ ਖੁਸ਼ੀ ਦੇ ਪਲ ਵਿੱਚ ਈਸ਼ਾਨ ਦੇ ਦਾਦਾ ਸੇਵਾਮੁਕਤ ਆਨਰੇਰੀ ਕੈਪਟਨ ਪ੍ਰੀਤਮ ਸਿੰਘ ਮਿਨਹਾਸ ਆਪਣੇ ਪੁਸ਼ਤੈਨੀ ਘਰ ਦੀ ਦਹਿਲੀਜ਼ ’ਤੇ ਸ਼ਾਨ ਨਾਲ ਖੜ੍ਹੇ ਸਨ। ਉਨ੍ਹਾਂ ਆਪਣੇ ਪੋਤੇ ’ਤੇ ਫ਼ਖਰ ਮਹਿਸੂਸ ਕਰਦਿਆਂ ਸਲੂਟ ਕਰਕੇ ਉਸ ਦਾ ਸਵਾਗਤ ਕੀਤਾ। ਈਸ਼ਾਨ ਦੇ ਪਿਤਾ ਕਰਨਲ ਸੰਜੀਵ ਮਿਨਹਾਸ, ਮਾਤਾ ਅਮਿਤਾ ਮਿਨਹਾਸ ਅਤੇ ਭੈਣ ਵੀ ਇਸ ਮੌਕੇ ਬੇਹੱਦ ਖੁਸ਼ ਨਜ਼ਰ ਆਏ ਅਤੇ ਆਪਣੀਆਂ ਭਾਵਨਾਵਾਂ ਨੂੰ ਰੋਕ ਨਹੀਂ ਸਕੇ। ਇਸ ਮੌਕੇ ਰਾਜਿੰਦਰ ਸਿੰਘ ਠਾਕੁਰ, ਕਮਲੇਸ਼ ਠਾਕੁਰ, ਸਰਿਤਾ ਰਾਣਾ, ਕੰਚਨ ਕਟੋਰ, ਅਸ਼ਵਨੀ ਸਮੇਤ ਇਲਾਕੇ ਦੀਆਂ ਕਈ ਪ੍ਰਮੁੱਖ ਸ਼ਖ਼ਸੀਅਤਾਂ ਅਤੇ ਪਿੰਡ ਵਾਸੀ ਹਾਜ਼ਰ ਸਨ।