ਗੜ੍ਹਸ਼ੰਕਰ 12 ਫਰਵਰੀ (ਅਸ਼ਵਨੀ ਸ਼ਰਮਾ)– ਗੜ੍ਹਸ਼ੰਕਰ ਪੁਲਿਸ ਨੇ ਹੈਰੋਇਨ, ਪਾਬੰਦੀਸ਼ੁਦਾ ਟੀਕਿਆਂ ਤੇ ਡਰੱਗ ਮਨੀ ਸਮੇਤ ਪਤੀ-ਪਤਨੀ ਨੂੰ ਗਿ੍ਫਤਾਰ ਕਰਨ ਉਪਰੰਤ ਇਸ ਮਾਮਲੇ ‘ਚ ਪੁੱਛ-ਗਿੱਛ ਦੌਰਾਨ ਇਕ ਹੋਰ ਵਿਅਕਤੀ ਨੂੰ ਗਿ੍ਫਤਾਰ ਕੀਤਾ ਹੈ | ਥਾਣਾ ਮੁੱਖੀ ਰਾਜੀਵ ਕੁਮਾਰ ਨੇ ਦੱਸਿਆ ਕਿ ਉਹ ਸਮੇਤ ਪੁਲਿਸ ਪਾਰਟੀ ਵੀ.ਆਈ.ਪੀ. ਡਿਊਟੀ ਦੇ ਸਬੰਧ ਵਿਚ ਬੀਣੇਵਾਲ ਵਿਖੇ ਤਾਇਨਾਤ ਸੀ ਜਿਸ ਦੌਰਾਨ ਮੁਖ਼ਬਰ ਨੇ ਇਤਲਾਹ ਦਿੱਤੀ ਕਿ ਵਿਕਾਸ ਉਰਫ ਵਿੱਕੀ ਸਮੇਤ ਉਸਦੀ ਪਤਨੀ ਸ਼ਿਵਾਨੀ ਪੰਜਾਬ ਅਤੇ ਹਿਮਾਚਲ ਪ੍ਰਦੇਸ਼ ਵਿਚ ਨਸ਼ੇ ਦੀ ਸਮਗਲਿੰਗ ਕਰਦੇ ਹਨ ਜਿਨ੍ਹਾਂ ਪਾਸ ਭਾਰੀ ਮਾਤਰਾ ਵਿਚ ਨਸ਼ੀਲਾ ਪਦਾਰਥ ਮਿਲ ਸਕਦਾ ਹੈ | ਇਸ ਦੇ ਸਬੰਧ ਵਿਚ ਮਕਾਨ ‘ਤੇ ਰੇਡ ਕਰਨ ਮੌਕੇ ਘਰ ਤੋਂ ਸਕੂਟਰੀ ‘ਤੇ ਨਿਕਲਣ ਸਮੇਂ ਪਤੀ ਪਤਨੀ ਨੂੰ ਕਾਬੂ ਕੀਤਾ ਗਿਆ | ਉਨ੍ਹਾਂ ਦੱਸਿਆ ਕਿ ਉਪ ਪੁਲਿਸ ਕਪਤਾਨ ਨਰਿੰਦਰ ਸਿੰਘ ਔਜਲਾ ਦੇ ਮੌਕੇ ‘ਤੇ ਪਹੁੰਚਣ ‘ਤੇ ਦੋਵਾਂ ਦੀ ਤਲਾਸ਼ੀ ਦੌਰਾਨ ਦੋਵਾਂ ਪਾਸੋਂ 50 ਪਾਬੰਦੀਸ਼ੁਦਾ ਟੀਕੇ, 100 ਗ੍ਰਾਮ ਹੈਰੋਇਨ ਅਤੇ ਐਕਟਿਵਾ ਦੀ ਡਿੱਗੀ ਵਿਚੋਂ 3 ਲੱਖ 27 ਹਜ਼ਾਰ ਦੀ ਡਰੱਗ ਮਨੀ ਬ੍ਰਾਮਦ ਕੀਤੀ ਗਈ | ਪੁਲਿਸ ਵਲੋਂ ਵਿਕਾਸ ਸਿੰਘ ਪੁੱਤਰ ਦਵਿੰਦਰ ਸਿੰਘ ਵਾਸੀ ਬੀਣੇਵਾਲ ਅਤੇ ਉਸ ਦੀ ਪਤਨੀ ਸ਼ਿਵਾਨੀ ਖਿਲਾਫ਼ ਐੱਨਡੀਪੀਐੱਸ. ਐਕਟ ਤਹਿਤ ਮਾਮਲਾ ਦਰਜ਼ ਕਰਕੇ ਪੁੱਛ-ਗਿੱਛ ਕੀਤੀ ਗਈ | ਉਨ੍ਹਾਂ ਦੱਸਿਆ ਕਿ ਪੁੱਛ-ਗਿੱਛ ਦੌਰਾਨ ਵਿਕਾਸ ਉਰਫ ਵਿੱਕੀ ਨੇ ਇੰਕਸਾਫ ਕੀਤਾ ਕਿ ਇਸ ਧੰਦੇ ਵਿਚ ਸੁਨੀਲ ਕੁਮਾਰ ਪੁੱਤਰ ਭਜਨ ਦਾਸ ਵਾਸੀ ਟਿੱਬੀਆਂ ਸ਼ਾਮਿਲ ਹੈ ਜਿਸਨੂੰ ਪੁਲਿਸ ਨੇ ਵਾਧਾ ਜੁਰਮ ਕਰਦਿਆਂ ਗਿ੍ਫਤਾਰ ਕੀਤਾ ਹੈ | ਕਾਬੂ ਕੀਤੇ ਕਥਿਤ ਦੋਸ਼ੀਆਂ ਖਿਲਾਫ਼ ਪਹਿਲਾ ਵੀ ਮੁਕੱਦਮੇ ਦਰਜ਼ ਹਨ |