ਮਿੰਨੀ ਬੱਸਾਂ ਵਾਲਿਆਂ ਦੇ ਪ੍ਰੈਸ਼ਰ ਹਾਰਨ ਤੇ ਆਪ ਹੁੰਦਰੀਆਂ ਤੋਂ ਕਸਬਾ ਮਜਾਰੀ ਦੇ ਆਮ ਲੋਕ ਤੇ ਦੁਕਾਨਦਾਰ ਔਖੇ

ਬਲਾਚੌਰ (ਜਤਿੰਦਰ ਪਾਲ ਸਿੰਘ ਕਲੇਰ )– ਕਸਬਾ ਮਜਾਰੀ ਦੇ ਆਮ ਲੋਕ ਤੇ ਦੁਕਾਨਦਾਰ ਮਿੰਨੀ ਬੱਸਾਂ ਵਾਲਿਆਂ ਦੇ ਪ੍ਰੈਸ਼ਰ ਹਾਰਨ ਤੇ ਆਪ ਹੁੰਦਰੀਆਂ ਕਰਕੇ ਸਰਕਾਰੀ ਹੁਕਮਾਂ ਦੀਆਂ ਉਡਾਈਆਂ ਜਾ ਰਹੀਆਂ ਧੱਜੀਆਂ ਤੋਂ ਬਹੁਤ ਦੁਖੀ ਹਨ | ਇਸ ਬਾਰੇ ਮਜਾਰੀ ਵਿਖੇ ਬਲਜੀਤ ਸਿੰਘ ਬੱਲੀ, ਅਮਰਜੀਤ ਸਿੰਘ ਗਿੱਲ, ਨਰਿੰਦਰਪਾਲ ਸਿੰਘ, ਡਾ. ਬਲਿਹਾਰ ਸਿੰਘ ਆਦਿ ਨੇ ਦੱਸਿਆ ਕਿ ਨਵਾਂਸ਼ਹਿਰ ਤੋਂ ਵਾਇਆ ਕਸਬਾ ਮਜਾਰੀ ਹੋ ਕੇ ਵੱਖ-ਵੱਖ ਪਿੰਡਾਂ ਨੂੰ ਜਾਂਦੀਆਂ ਮਿੰਨੀ ਬੱਸਾਂ ਦੇ ਡਰਾਈਵਰਾਂ ਵਲੋਂ ਬੱਸਾਂ ਇੰਨੀਆਂ ਤੇਜ਼ ਤੇ ਗ਼ਲਤ ਢੰਗ ਨਾਲ ਚਲਾਈਆਂ ਜਾਂਦੀਆਂ ਹਨ ਕਿ ਬੱਸ ਵਿਚ ਬੈਠੀਆਂ ਸਵਾਰੀਆਂ ਤੋ ਇਲਾਵਾ ਸੜਕ ਤੇ ਜਾਂਦੇ ਲੋਕ ਵੀ ਭੈਅ ਖਾਂਦੇ ਹਨ | ਉਨ੍ਹਾਂ ਦੱਸਿਆ ਕਿ ਅੱਜ ਸਵੇਰੇ ਮੌਜੋਵਾਲ ਮਜਾਰਾ ਤੋਂ ਕਸਬਾ ਮਜਾਰੀ ਪਹੁੰਚੀ ਇਕ ਮਿੰਨੀ ਬੱਸ ਦੇ ਡਰਾਈਵਰ ਨੇ ਇਕ ਸਕੂਟਰੀ ਸਵਾਰ ‘ਚ ਬੱਸ ਮਾਰ ਕੇ ਲੱਤ ਤੋੜ ਦਿੱਤੀ | ਜਿਸ ਨੂੰ ਲੋਕਾਂ ਨੇ ਚੁੱਕ ਕੇ ਹਸਪਤਾਲ ਪਹੁੰਚਾਇਆ | ਦੂਸਰਾ ਇਨ੍ਹਾਂ ਬੱਸਾਂ ਨੂੰ ਲਗਾਏ ਗਏ ਕੰਨ ਪਾੜਵੀਆਂ ਆਵਾਜ਼ਾਂ ਵਾਲੇ ਪ੍ਰਰੈਸ਼ਰ ਹਾਰਨ ਤੋਂ ਆਮ ਲੋਕ ਤੇ ਦੁਕਾਨਦਾਰ ਇੰਨੇ ਦੁਖੀ ਹਨ ਕਿ ਬੱਸਾਂ ਵਾਲੇ ਕਸਬਾ ਮਜਾਰੀ ਦਾਖਲ ਹੋਣ ਤੋਂ ਪਹਿਲਾਂ ਹੀ ਪ੍ਰੈਸ਼ਰ ਹਾਰਨ ਤੇ ਹੱਥ ਰੱਖ ਲੈਂਦੇ ਹਨ ਤੇ ਬੰਦ ਹੀ ਨਹੀਂ ਹੋਣ ਦਿੰਦੇ | ਜੋ ਸ਼ੋਰ ਪ੍ਰਦੂਸ਼ਣ ਨਾਲ ਸਰਕਾਰੀ ਹੁਕਮਾਂ ਦੀਆਂ ਧੱਜੀਆਂ ਉਡਾ ਰਹੇ ਹਨ, ਪਰ ਪ੍ਰਸ਼ਾਸਨ ਵਲੋਂ ਇਨ੍ਹਾਂ ਵੱਲ ਕਦੇ ਕੋਈ ਧਿਆਨ ਨਹੀਂ ਦਿੱਤਾ ਜਾ ਰਿਹਾ | ਉਨ੍ਹਾਂ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਆਪ ਹੁਦਰੀਆਂ ਕਰਨ ਤੇ ਪ੍ਰੈਸ਼ਰ ਹਾਰਨ ਦੀ ਵਰਤੋਂ ਕਰਨ ਵਾਲਿਆਂ ਨੂੰ ਨੱਥ ਪਾਈ ਜਾਵੇ ਤੇ ਆਮ ਲੋਕਾਂ ਨੂੰ ਰਾਹਤ ਦਵਾਈ ਜਾਵੇ