ਬਟਾਲਾ: (ਅਵਿਨਾਸ਼ ਸ਼ਰਮਾ)
: ਸ਼ਿਵ ਭਗਤੀ ਸੇਵਕ ਸਭਾ ਬਟਾਲਾ ਵੱਲੋਂ ਅੱਜ ਭਗਵਾਨ ਸ਼ਿਵ ਦੀ ਅਸੀਮ ਕਿਰਪਾ, ਅਟੱਲ ਸ਼ਰਧਾ ਅਤੇ ਭਗਤੀ ਭਾਵਨਾ ਨਾਲ ਭਰਪੂਰ ਭੋਲੈਨਾਥ ਦੀ ਪਾਵਨ ਬਾਰਾਤ ਤੀਜੀ ਵਾਰ ਬੜੇ ਹੀ ਧੂਮਧਾਮ, ਸ਼ਾਨ-ਓ-ਸ਼ੌਕਤ ਅਤੇ ਆਤਮਿਕ ਉਲ੍ਹਾਸ ਨਾਲ ਕੱਢੀ ਗਈ। ਇਸ ਪਾਵਨ ਅਵਸਰ ‘ਤੇ ਪੂਰੀ ਬਟਾਲਾ ਨਗਰੀ “ਹਰ ਹਰ ਮਹਾਦੇਵ” ਦੇ ਗੂੰਜਦੇ ਜੈਕਾਰਿਆਂ ਨਾਲ ਗੂੰਜ ਉੱਠੀ।
ਇਹ ਧਾਰਮਿਕ ਅਤੇ ਆਧਿਆਤਮਿਕ ਮਹੱਤਤਾ ਨਾਲ ਭਰਪੂਰ ਬਾਰਾਤ ਨੈਹਰੂ ਗੇਟ ਬਟਾਲਾ ਤੋਂ ਸ਼ੁਰੂ ਹੋ ਕੇ ਸ਼ਹਿਰ ਦੇ ਵੱਖ-ਵੱਖ ਪ੍ਰਮੁੱਖ ਮਾਰਗਾਂ ਵਿਚੋਂ ਹੁੰਦੀ ਹੋਈ ਭਗਵਾਨ ਸ਼ਿਵ ਦੇ ਗੁਣਗਾਨ, ਭਜਨ-ਕੀਰਤਨ ਅਤੇ ਡਮਰੂ ਦੀ ਪਾਵਨ ਧੁਨ ਨਾਲ ਅਚਲੇਸ਼ਵਰ ਮੰਦਰ, ਸ਼ਿਵ ਵਾਟਿਕਾ ਵਿਖੇ ਸੰਪੰਨ ਹੋਈ। ਬਾਰਾਤ ਦੌਰਾਨ ਸ਼ਿਵ ਭਗਵਾਨ ਦੀ ਮਹਿਮਾ ਦਾ ਵਰਣਨ ਕਰਦੇ ਭਜਨਾਂ ਅਤੇ “ਬੋਲੋ ਬਮ”, “ਹਰ ਹਰ ਮਹਾਦੇਵ” ਦੇ ਨਾਅਰਿਆਂ ਨੇ ਸਾਰੇ ਵਾਤਾਵਰਣ ਨੂੰ ਪੂਰਨ ਤੌਰ ‘ਤੇ ਭਕਤੀਮਈ ਅਤੇ ਆਧਿਆਤਮਿਕ ਰੰਗ ਵਿੱਚ ਰੰਗ ਦਿੱਤਾ।
ਭਗਤਾਂ ਨੇ ਹੱਥਾਂ ਵਿੱਚ ਡਮਰੂ, ਤ੍ਰਿਸ਼ੂਲ ਅਤੇ ਕੇਸਰੀ ਝੰਡੇ ਫੜ੍ਹ ਕੇ ਭੋਲੇਨਾਥ ਦੀ ਸ਼ਰਧਾ ਭਰੀ ਆਰਾਧਨਾ ਕੀਤੀ ਅਤੇ ਨੱਚਦੇ-ਗਾਉਂਦੇ ਹੋਏ ਪ੍ਰਭੂ ਸ਼ਿਵ ਦੇ ਚਰਨਾਂ ਵਿੱਚ ਆਪਣੀ ਅਟੱਲ ਭਕਤੀ ਅਰਪਿਤ ਕੀਤੀ। ਬਾਰਾਤ ਦੇ ਸਵਾਗਤ ਲਈ ਸ਼ਹਿਰ ਦੇ ਵੱਖ-ਵੱਖ ਸਥਾਨਾਂ ‘ਤੇ ਫੁੱਲਾਂ ਦੀ ਵਰਖਾ ਕੀਤੀ ਗਈ ਅਤੇ ਭਗਤਾਂ ਲਈ ਲੰਗਰ ਦਾ ਵਿਸ਼ੇਸ਼ ਪ੍ਰਬੰਧ ਕੀਤਾ ਗਿਆ।
ਇਸ ਮੌਕੇ ਸ਼ਿਵ ਭਗਤੀ ਸੇਵਕ ਸਭਾ ਦੇ ਸੇਵਾਦਾਰਾਂ, ਸ਼ਹਿਰ ਦੇ ਨਿਵਾਸੀਆਂ ਅਤੇ ਵੱਡੀ ਗਿਣਤੀ ਵਿੱਚ ਸ਼ਿਵ ਭਗਤਾਂ ਨੇ ਨਤਮਸਤਕ ਹੋ ਕੇ ਭਗਵਾਨ ਸ਼ਿਵ ਦਾ ਅਸ਼ੀਰਵਾਦ ਪ੍ਰਾਪਤ ਕੀਤਾ। ਸਭਾ ਦੇ ਪਦਾਧਿਕਾਰੀਆਂ ਨੇ ਦੱਸਿਆ ਕਿ ਇਸ ਪਵਿੱਤਰ ਧਾਰਮਿਕ ਆਯੋਜਨ ਦਾ ਮੁੱਖ ਉਦੇਸ਼ ਸ਼ਿਵ ਭਗਤੀ ਦਾ ਪ੍ਰਸਾਰ, ਆਪਸੀ ਸਾਂਝ, ਆਤਮਿਕ ਚੇਤਨਾ ਦਾ ਵਿਕਾਸ ਅਤੇ ਸਮਾਜ ਵਿੱਚ ਸ਼ਾਂਤੀ, ਸਤਭਾਵਨਾ ਅਤੇ ਭਾਈਚਾਰੇ ਦੀ ਭਾਵਨਾ ਨੂੰ ਹੋਰ ਮਜ਼ਬੂਤ ਕਰਨਾ ਹੈ।
