ਦਸੂਹਾ (ਚੌਧਰੀ)
11 ਸਤੰਬਰ : ਸੀਨੀਅਰ ਸਿਟੀਜ਼ਨਜ਼ ਵੈਲਫੇਅਰ ਐਸੋਸੀਏਸ਼ਨ ਰਜਿ. ਦਸੂਹਾ ਦੀ ਮਹੀਨਾਵਾਰ ਮੀਟਿੰਗ ਕਰਨਲ ਜੋਗਿੰਦਰ ਲਾਲ ਸ਼ਰਮਾ ਦੀ ਪ੍ਰਧਾਨਗੀ ਹੇਠ ਹੋਈ। ਮੀਟਿੰਗ ਦੀ ਜਾਣਕਾਰੀ ਦਿੰਦੇ ਹੋਏ ਜਰਨਲ ਸਕੱਤਰ ਚੌਧਰੀ ਕੁਮਾਰ ਸੈਣੀ ਨੇ ਦੱਸਿਆ ਕਿ ਮੀਟਿੰਗ ਵਿੱਚ ਸਰਬ ਸੰਮਤੀ ਨਾਲ ਕੇਂਦਰ ਦੀ ਭਾਰਤ ਸਰਕਾਰ ਵੱਲੋਂ ਜੀ-20 ਅੰਤਰਰਾਸ਼ਟਰੀ ਸੰਮੇਲਨ ਦੇ ਪ੍ਰਧਾਨ ਮਾਣਯੋਗ ਨਰਿੰਦਰ ਮੋਦੀ ਜੀ ਦੀ ਪ੍ਰਧਾਨਗੀ ਹੇਠ ਦਿੱਲੀ ਜੀ-20 ਡੇਕਲਰੇਸ਼ਨ ਪਾਸ ਕਰਨ ਤੇ ਵਧਾਈ ਦਿੱਤੀ। ਇਹ ਭਾਰਤ ਸਰਕਾਰ ਦੀ ਕਾਮਯਾਬ ਕੂਟ ਨੀਤੀ ਦਾ ਨਤੀਜਾ ਹੈ। ਏਸ਼ੀਆ, ਅਰਬ ਦੇਸ਼ ਅਤੇ ਯੂਰਪ ਨੂੰ ਸਿੱਧੇ ਜੋੜਨ ਲਈ ਰੇਲ ਲਾਈਨ ਦਾ ਵਿਸਥਾਰ ਕੀਤੇ ਜਾਣ ਤੇ ਸਭ ਦੀ ਸਹਿਮਤੀ ਨਾਲ ਭਾਰਤ ਨੂੰ ਯੂਰਪ ਅਤੇ ਅਮਰੀਕਾ ਨਾਲ ਵਪਾਰ ਕਰਨ ਦਾ ਬਹੁਤ ਲਾਭ ਹੋਵੇਗਾ। ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੱਲੋਂ ਜੀ-20 ਵਿੱਚ ਅਫਰੀਕਨ ਦੇਸ਼ਾਂ ਨੂੰ ਸ਼ਾਮਲ ਕਰਨਾ ਇੱਕ ਹੋਰ ਬਹੁਤ ਵੱਡੀ ਕਾਮਯਾਬੀ ਹੈ। ਇਸ ਨਾਲ ਚੀਨ ਦੀ ਵਿਸਥਾਰਵਾਦੀ ਨੀਤੀ ਦਾ ਵੀ ਮੁਕਾਬਲਾ ਕੀਤਾ ਜਾਵੇਗਾ।
ਇੱਕ ਹੋਰ ਮਤੇ ਵਿੱਚ ਭਾਰਤ ਸਰਕਾਰ ਅਤੇ ਭਾਰਤ ਦੇ ਈਸਰੋ ਵਿਗਿਆਨੀਆਂ ਨੂੰ ਚੰਦਰ ਯਾਨ 3 ਅਤੇ ਅਦਿੱਤਿਆ ਐਲ-1 ਸੂਰਜ ਯਾਨ ਕਾਮਯਾਬੀ ਨਾਲ ਭੇਜਣ ਤੇ ਵਧਾਈ ਦਿੱਤੀ। ਇੱਕ ਹੋਰ ਮਤੇ ਰਾਹੀਂ ਭਾਰਤ ਰੇਲ ਮੰਤਰੀ ਅਸ਼ਵਨੀ ਵੈਸ਼ਨਵ ਜੀ ਦੁਆਰਾ ਸੀਨੀਅਰ ਸਿਟੀਜ਼ਨਜ਼ ਨੂੰ ਰਾਹਤ ਦੇਣ ਦੀ ਪੁਰਾਣੀ ਮੰਗ ਨੂੰ ਮੰਨੇ ਜਾਣ ਤੇ ਸੀਨੀਅਰ ਸਿਟੀਜ਼ਨਜ਼ ਮੈਂਬਰਾਂ ਵੱਲੋਂ ਖੁਸ਼ੀ ਜਤਾਈ ਗਈ।
ਇਸ ਤੋਂ ਇਲਾਵਾ ਮੀਟਿੰਗ ਵਿੱਚ ਸੀਨੀਅਰ ਸਿਟੀਜ਼ਨਜ਼ ਦਿਵਸ ਦੇ ਮੌਕੇ ਤੇ 8 ਅਕਤੂਬਰ 2023 ਦਿਨ ਐਤਵਾਰ ਸਮਾਂ 10 ਵਜੇ ਤੋਂ 2 ਵਜੇ ਤੱਕ ਆਯੁਰਵੈਦਿਕ ਨਿਸ਼ੁਲਕ ਮੈਡੀਕਲ ਕੈਂਪ ਕੇ.ਐਮ.ਐਸ ਕਾਲਜ ਵਿਖੇ ਲਗਵਾਏ ਜਾਣ ਦਾ ਵੀ ਫੈਸਲਾ ਕੀਤਾ ਗਿਆ। ਇਸ ਕੈਂਪ ਵਿੱਚ ਵੈਦ ਵਿਵੇਕ ਗੁਪਤਾ ਦੇ ਨਾਲ ਡਾ. ਪ੍ਰਿਯੰਕਾ ਬੀ.ਏ.ਐਮ.ਐਸ ਆਯੁਰਵੈਦਿਕ ਵਿਧੀ ਰਾਹੀਂ ਮਰੀਜਾ ਦਾ ਉਪਚਾਰ ਕਰਨਗੇ। ਇਸ ਮੌਕੇ ਤੇ ਹੋਰਨਾਂ ਤੋਂ ਇਲਾਵਾ ਮਾਸਟਰ ਰਾਜਿੰਦਰ ਸਿੰਘ ਟਿੱਲੂਵਾਲ, ਡਾ ਅਮਰੀਕ ਸਿੰਘ ਬਸਰਾ, ਡਾ. ਦਿਲਬਾਗ ਸਿੰਘ ਹੁੰਦਲ, ਸਤੀਸ਼ ਕਾਲੀਆ, ਬ੍ਰਹਮ ਦੇਵ ਰੱਲ੍ਹਣ, ਮਾਸਟਰ ਬਲਵੀਰ ਸਿੰਘ, ਵਿਨੋਦ ਕੁਮਾਰ ਚੌਹਾਨ, ਵਿਨੋਦ ਕੁਮਾਰ ਹੰਸ, ਸ਼ਾਮ ਨਾਥ ਮਹਿਤਾ, ਸੁਰਿੰਦਰ ਨਾਥ ਸ਼ਰਮਾ ਅਤੇ ਹਰਮਿੰਦਰ ਲਾਲ ਆਦਿ ਹਾਜ਼ਰ ਸਨ।
ਫੋਟੋ : ਤਸਵੀਰ ਵਿੱਚ ਕਰਨਲ ਜੋਗਿੰਦਰ ਲਾਲ ਸ਼ਰਮਾ, ਚੌਧਰੀ ਕੁਮਾਰ ਸੈਣੀ, ਡਾ. ਅਮਰੀਕ ਸਿੰਘ ਬਸਰਾ, ਡਾ. ਦਿਲਬਾਗ ਸਿੰਘ ਹੁੰਦਲ, ਸਤੀਸ਼ ਕਾਲੀਆ ਅਤੇ ਹੋਰ ਸੀਨੀਅਰ ਸਿਟੀਜ਼ਨਜ਼ ਮੈਂਬਰ।
