ਗੜ੍ਹਦੀਵਾਲਾ (ਚੌਧਰੀ) : ਅੱਜ ਮਿੱਤੀ 3 ਮਾਰਚ, 2022 ਨੂੰ ਖ਼ਾਲਸਾ ਕਾਲਜ, ਗੜ੍ਹਦੀਵਾਲਾ ਵਿਖੇ ਕਾਲਜ ਦੇ ਪੁਰਾਣੇ ਵਿਦਿਆਰਥੀ ਅਸਟਰੇਲੀਆ ਨਿਵਾਸੀ ਸ. ਹਰਕੀਰਤ ਸਿੰਘ ਸੰਪਰ ਦਾ ਸਨਮਾਨ ਕੀਤਾ ਗਿਆ। ਗੜ੍ਹਦੀਵਾਲਾ ਸ਼ਹਿਰ
ਦੇ ਨੇੜਲੇ ਪਿੰਡ ਭਾਨਾ ਦਾ ਜੰਮਪਾਲ ਸ. ਹਰਕੀਰਤ ਸਿੰਘ ਸੰਧਰ ਕਾਲਜ ਦੇ 1997 ਬੈਚ ਦਾ ਵਿਦਿਆਰਥੀ ਰਿਹਾ ਹੈ ਤੇ ਅੱਜ ਕੱਲ ਅਸਟਰੇਲੀਆ ਦੇ ਸ਼ਹਿਰ ਸਿਡਨੀ ਵਿੱਚ ਰਹਿਕੇ ਪੱਤਰਕਾਰੀ ਨਾਲ ਜੁੜਿਆ ਹੋਇਆ ਹੈ।ਉਸਦੀਆਂ ਇਤਿਹਾਸਕ ਦਸਤਾਵੇਜ਼ ਵਰਗੀ ਪੁਸਤਕ ‘ਜਦੋਂ ਤੁਰੇ ਸੀ’ ਪੰਜਾਬੀ ਪਾਠਕਾਂ ਵਲੋਂ ਬਹੁਤ ਸਲਾਹੀ ਗਈ 1 ਹੁਣ ਉਸਦੀ ਦੂਸਰੀ ਪੁਸਤਕ ‘ਕਿਸਾਨ-ਨਾਮਾ’ ਰੀਲੀਜ਼ ਹੋ ਚੁੱਕੀ ਹੈ, ਜਿਸ ਵਿੱਚ ਖ਼ੇਤੀ ਕਾਨੂੰਨਾਂ ਵਿਰੁੱਧ ਕਿਸਾਨ ਅੰਦੋਲਨ ਦੇ ਹਰੇਕ ਪੱਖ ਨੂੰ ਬਹੁਤ ਬਾਰੀਕੀ ਨਾਲ ਛੁਹਿਆ ਗਿਆ ਹੈ।ਪੰਜਾਬੀ ਅਤੇ ਅੰਗਰੇਜ਼ੀ ਵਿੱਚ ਛਪੀ ਇਸ ਪੁਸਤਕ ਵਿੱਚ ਕਿਸਾਨ ਅੰਦੋਲਨ ਦੌਰਾਨ ਜਾਨ ਗਵਾ ਚੁੱਕੇ ਕਿਸਾਨਾਂ ਦੀਆ
ਤਸਵੀਰਾਂ ਤੇ ਨਾਂ-ਪਤੇ ਛਾਪਕੇ ਇਸ ਪੁਸਤਕ ਨੂੰ ਸ. ਸੰਧਰ ਨੇ ਇੱਕ ਇਤਿਹਾਸਕ ਦਸਤਾਵੇਜ਼ ਬਣਾ ਦਿੱਤਾ ਹੈ।ਇਸ ਤੋਂ ਇਲਾਵਾ ਸਾਲ ਭਰ ਚਲੇ ਇਸ ਅੰਦੋਲਨ ਦੇ ਹਰ ਪੜਾਅ ਦਾ ਲੇਖਾ-ਜੋਖਾ ਵੀ ਇਸ ਪੁਸਤਕ ਵਿੱਚ ਕੀਤਾ ਗਿਆ ਹੈ। ਅੱਜ ਸ. ਹਰਕੀਰਤ ਸਿੰਘ ਸੰਧਰ ਨੇ ਕਾਲਜ ਪਹੁੰਚਕੇ ਆਪਣੀ ਪੁਸਤਕ ਕਾਲਜ ਦੇ ਕਾਰਜਕਾਰੀ ਪ੍ਰਿੰਸੀਪਲ ਡਾ.ਮਲਕੀਤ ਸਿੰਘ ਨੂੰ ਭੇਂਟ ਕੀਤੀ ਅਤੇ ਇਸ ਪੁਸਤਕ ਬਾਰੇ ਆਪਣੇ ਵਿਚਾਰ ਸਾਂਝੇ ਕੀਤੇ। ਇਸ ਮੌਕੇ ਡਾ. ਸਤਵੰਤ ਕੌਰ ਨੇ ਆਪਣੇ ਪਿਤਾ ਸ. ਹਰਿੰਦਰ ਸਿੰਘ ਮਹਿਬੂਬ ਦੀਆ ਪੁਸਤਕਾਂ ਸ.ਹਰਕੀਰਤ ਸਿਘ ਸੰਧਰ ਨੂੰ ਭੇਂਟ ਕੀਤੀਆਂ। ਕਾਲਜ ਵਲੋਂ ਸ.ਹਰਕੀਰਤ ਸਿੰਘ ਸੰਧਰ ਨੰੂ ਸਿਰੋਪਾੳ ਤੇ ਕਾਲਜ ਸਨਮਾਨ-ਚਿੰਨ੍ਹ ਨਾਲ ਸਨਮਾਨਤ ਕੀਤਾ ਗਿਆ। ਇਸ ਮੌਕੇ ਕਾਲਜ ਪ੍ਰਿੰਸੀਪਲ ਡਾ. ਮਲਕੀਤ ਸਿੰਘ ਤੋਂ ਇਲਾਵਾ
ਪੰਜਾਬੀ ਵਿਭਾਗ ਦੇ ਅਧਿਆਪਕ ਡਾ.ਦਿਲਬਾਰਾ ਸਿੰਘ ਬਾਜਵਾ, ਡਾ. ਸਤਵੰਤ ਕੌਰ ਤੇ ਵਾਇਸ ਪ੍ਰਿੰਸੀਪਲ ਪ੍ਰੋ. ਸੰਜੀਵ ਸਿੰਘ ਵੀ ਹਾਜ਼ਰ ਸਨ।