ਸ਼ਿਵਾਲਕ ‘ਚ ਪਏ ਮੀਂਹ ਨਾਲ ਟੌਂਸਾ ਦੀ ਖੱਡ ‘ਚ ਫਿਰ ਆਇਆ ਭਾਰੀ ਪਾਣੀ
ਸੜਕ ‘ਤੇ ਜਮ੍ਹਾਂ ਰੇਤੇ ‘ਚ ਫਸੇ ਭਾਰੀ ਵਾਹਨ 

ਕਾਠਗਡ਼੍ਹ, 02 ਜੁਲਾਈ (ਜਤਿੰਦਰ ਪਾਲ ਸਿੰਘ ਕਲੇਰ ) ਅੱਜ ਸਵੇਰੇ 6 ਵਜੇ ਦੇ ਕਰੀਬ ਟੌਂਸਾ ਹਲਕੇ ਅਤੇ ਨਾਲ ਲੱਗਦੀਆਂ ਸ਼ਿਵਾਲਿਕ ਦੀਆਂ ਪਹਾੜੀਆਂ ‘ਚ ਭਾਰੀ ਵਰਖਾ ਪੈਣ ਨਾਲ ਟੌਂਸਾ ਦੀ ਖੱਡ ਵਿੱਚ ਕਾਫ਼ੀ ਜ਼ਿਆਦਾ ਪਾਣੀ ਆਇਆ । ਹਾਈਵੇ ਤੋਂ ਅਨਾਜ ਮੰਡੀ, ਸ਼ੈੱਲਰ, ਡਿਸਪੈਂਸਰੀਆਂ ਅਤੇ ਪਿੰਡ ਟੌਂਸਾ ਤੇ ਭੋਲੇਵਾਲ ਨੂੰ ਜੋੜਨ ਵਾਲੀ ਕੰਕਰੀਟ ਦੀ ਬਣੀ ਸੜਕ ‘ਤੇ  ਖੱਡ ਦੇ ਪਾਣੀ ਨਾਲ ਆਈ ਚਿਕੜੀ ਤੇ ਰੇਤ ਬੁਰੀ ਤਰ੍ਹਾਂ ਭਰ ਗਏ।  ਨਿਕਾਸੀ ਬੰਦ ਹੋਣ ਕਰਕੇ ਖੱਡ ਦਾ ਪਾਣੀ ਜਿੱਥੇ ਨਾਲ ਲੱਗਦੀਆਂ ਫੈਕਟਰੀਆਂ ਵਿਚ ਭਰ ਗਿਆ ਉੱਥੇ ਹੀ ਪਾਣੀ ਅਨਾਜ ਮੰਡੀ ਵੱਲ ਨੂੰ ਵੀ ਫੈਲ ਗਿਆ ।
ਖੱਡ ਦੇ ਪਾਣੀ ਨਾਲ ਸੜਕ ‘ਤੇ ਜਮ੍ਹਾਂ ਹੋਈ ਰੇਤ ‘ਚ ਫੈਕਟਰੀਆਂ ਲਈ ਸਾਮਾਨ ਲੈ ਕੇ ਆਏ ਟਰੱਕ ਵੀ ਫਸ ਗਏ ਜਿਨ੍ਹਾਂ ਨੂੰ ਕੱਢਣ ਲਈ ਟਰੈਕਟਰ ਆਦਿ ਮੱਦਦ ਲਈ ਗਈ। ਭਾਰੀ ਮਾਤਰਾ ‘ਚ ਰੇਤ ਜਮ੍ਹਾਂ ਹੋਣ ਨਾਲ ਕੰਕਰੀਟ ਦੀ ਸੜਕ ਇੱਕ ਕੱਚੇ ਰਸਤੇ ਵਾਂਗ ਬਣ ਗਈ। ਖੱਡ ਦੇ ਪਾਣੀ ਦੀ ਨਿਕਾਸੀ ਬੰਦ ਕੀਤੇ ਜਾਣ ਨਾਲ ਪਹਿਲੀਆਂ ਦੋ ਬਾਰਸ਼ਾਂ ਨੇ ਹੀ ਲਿੰਕ ਸੜਕ ਤੇ ਨਾਲ ਲੱਗਦੀਆਂ ਫੈਕਟਰੀਆਂ ਤੇ ਰਿਹਾਇਸ਼ੀ ਆਬਾਦੀ ਨੂੰ ਪ੍ਰੇਸ਼ਾਨੀ ‘ਚ ਪਾ ਦਿੱਤਾ ਹੈ ਲੇਕਿਨ ਅਜੇ ਤਾਂ ਬਰਸਾਤ ਦੀ ਸ਼ੁਰੂਆਤ ਹੈ ਅਤੇ ਜੇ ਇਸੇ ਤਰ੍ਹਾਂ ਬਰਸਾਤ ਪੈਂਦੀ ਰਹੀ ਤਾਂ ਸਥਿਤੀ ਬਦ ਤੋਂ ਬਦਤਰ ਬਣ ਸਕਦੀ ਹੈ । ਲੋਕਾਂ ਨੇ ਪ੍ਰਸ਼ਾਸਨ ਨੂੰ ਗੁਹਾਰ ਲਗਾਈ ਹੈ ਕਿ ਖੱਡ ਦੇ ਪਾਣੀ ਦੀ ਨਿਕਾਸੀ ਨੂੰ ਮੁੜ ਸਹੀ ਕਰਵਾਇਆ ਜਾਵੇ ਤਾਂ ਜੋ ਖੱਡ ਦੇ ਪਾਣੀ ਨਾਲ ਹੋਣ ਵਾਲੇ ਨੁਕਸਾਨ ਤੋਂ ਬਚਾਅ ਹੋ ਸਕੇ ।