ਫਗਵਾੜਾ  (ਲਾਲੀ ਦਾਦਰ )

11 ਮਈ : ਸ੍ਰੀ ਗੁਰੂ ਤੇਗ ਬਹਾਦਰ ਸਪੋਰਟਸ ਕਲੱਬ ਸਾਹਨੀ ਵਲੋਂ ਪਿੰਡ ਦੇ ਜੱਮਪਲ ਅਤੇ ਰਾਸ਼ਟਰੀ ਪੱਧਰ ਦੇ ਨਾਮਵਰ ਫੁਟਬਾਲ ਖਿਡਾਰੀ ਸਵ. ਰਾਹੁਲ ਕੁਮਾਰ ਦੀ ਨਿੱਘੀ ਯਾਦ ਨੂੰ ਸਮਰਪਿਤ ਦੂਸਰਾ ਸੈਵਨ ਸਾਈਡ ਰਾਤ ਦਾ ਫੁਟਬਾਲ ਟੂਰਨਾਮੈਂਟ ਸ਼ੇਰੇ ਪੰਜਾਬ ਨੌਜਵਾਨ ਸਭਾ ਪਿੰਡ ਸਾਹਨੀ, ਪ੍ਰਵਾਸੀ ਵੀਰਾਂ ਅਤੇ ਸਮੂਹ ਨਗਰ ਨਿਵਾਸੀਆਂ ਦੇ ਸਹਿਯੋਗ ਨਾਲ 13 ਤੋਂ 20 ਮਈ ਤੱਕ ਕਰਵਾਇਆ ਜਾ ਰਿਹਾ ਹੈ। ਵਧੇਰੇ ਜਾਣਕਾਰੀ ਦਿੰਦਿਆਂ ਪ੍ਰਬੰਧਕਾਂ ਨੇ ਦੱਸਿਆ ਕਿ ਸਵ. ਦੇਵੀ ਪ੍ਰਕਾਸ਼ ਨੰਬਰਦਾਰ ਦੇ ਪੋਤਰੇ ਰਾਹੁਲ ਕੁਮਾਰ ਸਪੁੱਤਰ ਵਿਜੇ ਕੁਮਾਰ ਨੇ ਬਤੌਰ ਡਿਫੈਂਡਰ ਮੋਹਨ ਬਗਾਨ, ਜੇਸੀਟੀ ਫਗਵਾੜਾ, ਸੁਲਗਾਉਂਕਰ (ਗੋਆ), ਚਰਚਿਲ ਬ੍ਰਦਰਜ ਫੁਟਬਾਲ ਤੇ ਸਪੋਰਟਿੰਗ ਕਲੱਬ ਗੋਆ ਲਈ ਕਰੀਬ ਪੰਦਰਾਂ ਸਾਲ ਫੁਟਬਾਲ ਖੇਡਦੇ ਹੋਏ ਪਿੰਡ ਤੇ ਪੰਜਾਬ ਦਾ ਨਾਮ ਰੌਸ਼ਨ ਕੀਤਾ ਹੈ। ਉਸਦੀ ਨਿੱਘੀ ਯਾਦ ਨੂੰ ਸਮਰਪਿਤ ਇਸ ਟੂਰਨਾਮੈਂਟ ‘ਚ ਫੁਟਬਾਲ ਪਿੰਡ ਪੱਧਰ ਓਪਨ ਦੀ ਜੇਤੂ ਟੀਮ ਨੂੰ ਪਹਿਲਾ ਇਨਾਮ 31 ਹਜਾਰ ਰੁਪਏ ਨਗਦ ਤੇ ਟਰਾਫੀ, ਦੂਸਰਾ ਇਨਾਮ 21 ਹਜਾਰ ਰੁਪਏ ਨਗਦ ਤੇ ਟਰਾਫੀ ਦਿੱਤਾ ਜਾਵੇਗਾ। ਇਸ ਤੋਂ ਇਲਾਵਾ ਬੈਸਟ ਗੋਲ ਕੀਪਰ, ਪਲੇਅਰ ਆਫ ਦਾ ਟੂਰਨਾਮੈਂਟ ਅਤੇ ਬੈਸਟ ਡਿਫੈਂਡਰ ਨੂੰ ਨੂੰ 1100 ਰੁਪਏ ਨਗਦ ਤੇ ਟਰਾਫੀ ਨਾਲ ਨਵਾਜਿਆ ਜਾਵੇਗਾ। ਟੂਰਨਾਮੈਂਟ ਦੇ ਆਖਰੀ ਜਨਮ ਸਾਲ 2006 ਦੇ ਖਿਡਾਰੀਆਂ ਦਾ ਮੈਚ ਵਿਸ਼ੇਸ਼ ਖਿੱਚ ਦਾ ਕੇਂਦਰ ਹੋਵੇਗਾ। ਉਹਨਾਂ ਸਮੂਹ ਫੁਟਬਾਲ ਪ੍ਰੇਮੀਆਂ ਨੂੰ ਖਿਡਾਰੀਆਂ ਦੀ ਹੌਸਲਾ ਅਫਜਾਈ ਲਈ ਇਸ ਟੂਰਨਾਮੈਂਟ ‘ਚ ਪਹੁੰਚਣ ਦਾ ਖੁੱਲ੍ਹਾ ਸੱਦਾ ਦਿੱਤਾ।
ਕੈਪਸ਼ਨ- ਸਵ. ਰਾਹੁਲ ਕੁਮਾਰ ਦੀ ਫਾਈਲ ਫੋਟੋ।