ਦਸੂਹਾ 24 ਅਪ੍ਰੈਲ (ਚੌਧਰੀ) 

:  ਅੱਜ ਪ੍ਰਦੀਪ ਸਿੰਘ ਬੈਂਸ, ਪੀ.ਸੀ.ਐਸ., ਐਸ.ਡੀ.ਐਮ.. ਦਸੂਹਾ ਵਲੋਂ ਦੱਸਿਆ ਗਿਆ ਕਿ ਮਾਨਯੋਗ ਪੰਜਾਬ ਸਟੇਟ ਟ੍ਰਾਂਸਪੋਰਟ ਕਮਿਸ਼ਨ ਅਤੇ ਸ੍ਰੀਮਤੀ ਕੋਮਲ ਮਿੱਤਲ, ਆਈ.ਏ.ਐਸ., ਡਿਪਟੀ ਕਮਿਸ਼ਨਰ, ਹੁਸ਼ਿਆਰਪੁਰ ਜੀ ਵਲੋਂ ਸਕੂਲੀ ਬੱਚਿਆਂ ਦੀ ਸੁਰੱਖਿਆ ਹਿੱਤ ਜਾਰੀ ਦਿਸ਼ਾ-ਨਿਰਦੇਸ਼ਾਂ ਦੀ ਪਾਲਣਾ ਕਰਦਿਆਂ ਆਰ.ਟੀ.ਏ. ਸਟਾਫ, ਹੁਸ਼ਿਆਰਪੁਰ ਅਤੇ ਟ੍ਰਾਫਿਕ ਪੁਲਿਸ, ਦਸੂਹਾ ਦੀ ਸਹਾਇਤਾ ਨਾਲ ਵੱਖ ਵੱਖ ਸਕੂਲਾਂ ਦੇ ਵਾਹਨਾਂ ਦੀ ਸਾਂਝੀ ਚੈਕਿੰਗ ਮੁਹਿੰਮ ਸੁਰੂ ਕੀਤੀ ਗਈ । ਇਸ ਮੁਹਿੰਮ ਤਹਿਤ ਸਕੂਲ ਮੁੱਖੀਆਂ ਅਤੇ ਵਾਹਨ ਕਰਮਚਾਰੀਆਂ ਨੂੰ ਬੱਚਿਆਂ ਦੀ ਸੁਰੱਖਿਆ ਨੂੰ ਮੁੱਖ ਰੱਖਦਿਆਂ ਵਾਹਨ ਨਿਯਮਾਂ ਦੀ ਪਾਲਣਾ ਨੂੰ ਯਕੀਨੀ ਬਨਾਉਣ ਲਈ ਨਿਰਦੇਸ਼ ਦਿੱਤੇ ਗਏ। ਜਿਸਦੇ ਤਹਿਤ ਸਕੂਲ ਵਾਹਨਾਂ ਵਿੱਚ ਲੋੜੀਂਦੇ ਮੁਕੰਮਲ ਦਸਤਾਵੇਜ਼, ਸੀ.ਸੀ.ਟੀਵੀ ਕੈਮਰੇ, ਸਪੀਡ ਕੰਟਰੋਲਰ, ਬਗੈਰ ਟੇਪ ਰਿਕਾਡਰ/ਸੀ.ਡੀ./ਟੀ.ਵੀ. ਰਹਿਤ, ਸੇਫਟੀ ਜੰਗਲੇ, ਬਗੈਰ ਪ੍ਰੈਸ਼ਰ ਹਾਰਨ, ਬਗੈਰ ਓਵਰ ਲੋਡਿੰਗ, ਸੀਟ ਬੈਲਟ, ਅੱਗ ਬੁਝਾਊ ਯੰਤਰ, ਸ਼ਿਕਾਇਤ ਬਾੱਕਸ, ਸ਼ਿਕਾਇਤ ਕੰਟੈਕਟ ਨੰਬਰ, ਰਿਫਲੈਕਟਰਜ਼, ਹੈਲਪਰ ਆਦਿ ਨਿਯਮਾਂ ਦੀ ਪਾਲਣਾ ਕਰਨ ਲਈ ਕਿਹਾ ਗਿਆ। ਐਸ.ਡੀ.ਐਮ. ਦਸੂਹਾ ਵਲੋਂ ਦੱਸਿਆ ਗਿਆ ਕਿ ਇਸ ਚੈਕਿੰਗ ਦੌਰਾਨ ਸਕੂਲੀ ਵਾਹਨਾਂ ਦੇ ਸਟਾਫ ਨੂੰ ਟ੍ਰਾਫਿਕ ਨਿਯਮਾਂ ਬਾਰੇ ਜਾਣੂ ਕਰਵਾਇਆ ਗਿਆ ਅਤੇ ਮੌਕੇ ‘ਤੇ ਲੋੜੀਂਦੇ ਚਲਾਨ ਵੀ ਕੱਟੇ ਗਏ । ਉਨ੍ਹਾਂ ਵਲੋਂ ਸਕੂਲ ਮੁੱਖੀਆਂ ਅਤੇ ਬੱਚਿਆਂ ਦੇ ਮਾਪਿਆਂ ਨੂੰ ਅਪੀਲ ਕੀਤੀ ਗਈ ਕਿ ਉਹ ਬੱਚਿਆਂ ਦੀ ਸੁਰਖਿਆ ਨੂੰ ਮੁੱਖ ਰੱਖਦਿਆਂ ਵਾਹਨਾਂ ਦੀ ਖੁਦ ਨਿਗਰਾਨੀ ਰੱਖਣ ਅਤੇ ਜੇਕਰ ਕਿਸੇ ਸਕੂਲੀ ਵਾਹਨ ਪ੍ਰਤੀ ਕੋਈ ਸ਼ਿਕਾਇਤ ਹੋਵੇ ਤਾਂ ਉਹ ਐਸ.ਡੀ.ਐਮ. ਦਫਤਰ ਜਾਂ ਸਕੂਲ ਮੁਖੀ ਨੂੰ ਆਪਣੀ ਸ਼ਿਕਾਇਤ ਦਰਜ ਕਰਵਾ ਸਕਦੇ ਹਨ ।