ਟਾਂਡਾ ਦਾ ਨੌਜਵਾਨ ਉੱਚੀ ਬਸੀ ਨਹਿਰ ਚ ਡੁੱਬਿਆ,ਭਾਲ ਜਾਰੀ

ਦਸੂਹਾ / ਟਾਂਡਾ 12 ਜੂਨ (ਚੌਧਰੀ) : ਸ਼ਹਿਰ ਟਾਂਡਾ ਨਾਲ ਸਬੰਧਤ ਘੁੰਮਣ ਗਏ ਦੋ ਨੌਜਵਾਨਾਂ ਵਿੱਚੋਂ ਇੱਕ ਨੌਜਵਾਨ ਐਤਵਾਰ ਸ਼ਾਮ ਜਲੰਧਰ ਪਠਾਨਕੋਟ ਨੈਸ਼ਨਲ ਹਾਈਵੇ ਤੇ ਪੈਂਦੀ ਉੱਚੀ ਬਸੀ ਨਹਿਰ ਵਿੱਚ ਅਚਾਨਕ ਪੈਰ ਫਿਸਲਣ ਕਰਕੇ ਡੁੱਬਣ ਦੀ ਖਬਰ ਸਾਹਮਣੇ ਆਈ ਹੈ। ਜਿਸਦੀ ਦੇਰ ਸ਼ਾਮ ਤੱਕ ਭਾਲ ਕੀਤੀ ਪਰ ਉਹ ਨਾ ਮਿਲਿਆ । ਡੁੱਬਣ ਵਾਲੇ ਨੌਜਵਾਨ ਦੀ ਪਛਾਣ ਅਵਤਾਰ ਸਿੰਘ ਸੰਨੀ ਪੁੱਤਰ ਸੁਖਦੇਵ ਸਿੰਘ ਵਾਰਡ ਨੰਬਰ 2 ਉੜਮੁੜ ਟਾਂਡਾ ਵਜੋਂ ਹੋਈ ਹੈ । ਮਿਲੀ ਜਾਣਕਾਰੀ ਅਨੁਸਾਰ ਐਤਵਾਰ ਸ਼ਾਮ ਵਕਤ ਕਰੀਬ 4 ਵਜੇ ਅਵਤਾਰ ਸੰਨੀ ਆਪਣੇ ਦੋਸਤ ਕੇਤਨ ਖੋਸਲਾ ਵਾਸੀ ਟਾਂਡਾ ਨਾਲ ਜਲੰਧਰ ਪਠਾਨਕੋਟ ਨੈਸ਼ਨਲ ਹਾਈਵੇ ਤੇ ਪੈਂਦੀ ਉੱਚੀ ਬਸੀ ਨਹਿਰ ਨੇੜੇ ਘੁੰਮਣ ਵਾਸਤੇ ਗਏ ਸਨ ਕਿ ਇਸ ਦੌਰਾਨ ਸੰਨੀ ਦਾ ਪੈਰ ਫਿਸਲ ਗਿਆ ਤੇ ਉਹ ਨਹਿਰ ਵਿੱਚ ਜਾ ਡਿਗਿਆ । ਸੰਨੀ ਦੇ ਦੋਸਤ ਕੇਤਨ ਨੇ ਉਸਨੂੰ ਬਚਾਉਣ ਦੀ ਬਹੁਤ ਕੋਸ਼ਿਸ਼ ਕੀਤੀ ਪਰ ਉਹ ਅਸਫਲ ਰਿਹਾ । ਕੇਤਨ ਵਲੋਂ ਸੂਚਨਾ ਦੇਣ ਤੇ ਸੰਨੀ ਦੇ ਪਰਿਵਾਰਕ ਮੈਂਬਰ ਕੌਸਲਰ ਗੁਰਸੇਵਕ ਮਾਰਸ਼ਲ ਟਾਂਡਾ ਸਮੇਤ ਘਟਨਾ ਸਥਾਨ ਤੇ ਪੁੱਜੇ ਤੇ ਇਸਦੀ ਸੂਚਨਾ ਦਸੂਹਾ ਪੁਲਿਸ ਨੂੰ ਦਿੱਤੀ । ਸੂਚਨਾ ਮਿਲਣ ਤੇ ਦਸੂਹਾ ਪੁਲਿਸ ਮੌਕੇ ਤੇ ਪਹੁੰਚੀ ਤੇ ਸੰਨੀ ਦੀ ਬਹੁਤ ਭਾਲ ਕੀਤੀ , ਪਰ ਪਾਣੀ ਦਾ ਤੇਜ ਬਹਾਅ ਤੇ ਡੂੰਘੇ ਹੋਣ ਕਾਰਨ ਸੰਨੀ ਦਾ ਕੋਈ ਸੁਰਾਗ ਨਾ ਮਿਲਿਆ । ਪ੍ਰਸ਼ਾਸਨ ਵਲੋਂ ਲਗਾਤਾਰ ਭਾਲ ਜਾਰੀ ਹੈ ।

ਫੋਟੋ ਕੈਪਸ਼ਨ : ਅਵਤਾਰ ਸਿੰਘ ਸੰਨੀ