ਥਾਣਾ ਡੈਮ ਚ ਨਹਾਉਣ ਗਏ ਚਾਰ ਲੜਕਿਆਂ ਚੋਂ ਇੱਕ ਦੀ ਪਾਣੀ ਵਿਚ ਡੁੱਬਣ ਨਾਲ ਮੌਤ 

ਗੜ੍ਹਦੀਵਾਲਾ ਅਪ੍ਰੈਲ 10 ਅਪ੍ਰੈਲ (ਚੌਧਰੀ) :   ਹਲਕਾ ਗੜ੍ਹਦੀਵਾਲਾ ਦੇ ਥਾਣਾ ਗੜ੍ਹਦੀਵਾਲਾ ਅਧੀਨ ਪੈਂਦੇ ਥਾਣਾ ਡੈਮ ਤੇ ਨਹਾਉਣ ਗਏ 4 ਨੌਜਵਾਨਾਂ ਚ ਇੱਕ ਨੌਜਵਾਨ ਦੇ ਪਾਣੀ ਵਿਚ ਡੁੱਬਣ ਨਾਲ ਮੌਤ ਹੋ ਜਾਣ ਦਾ ਦੁਖਦ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਨਹਾਉਣ ਗਏ 4 ਨੌਜਵਾਨ ਜਿਨ੍ਹਾਂ ‘ਚ ਤਿੰਨ ਪ੍ਰਵਾਸੀ ਤੇ ਇੱਕ ਪੰਜਾਬੀ ਸੀ।ਜਿਨ੍ਹਾਂ ਵੱਲੋਂ ਡੈਮ ਦੇ ਪਾਣੀ ਚ ਨਹਾਉਣ ਸਮੇਂ ਇੱਕ ਨੌਜਵਾਨ ਦੀ ਪਾਣੀ ਵਿਚ ਡੁੱਬਣ ਨਾਲ ਮੌਤ ਹੋ ਗਈ।ਇਸ ਸਬੰਧੀ ਸੂਚਨਾ ਮਿਲਦਿਆਂ ਥਾਣਾ ਗੜ੍ਹਦੀਵਾਲਾ ਸਬ-ਇੰਸਪੈਕਟਰ ਪਰਮਿੰਦਰ ਸਿੰਘ ਤੇ ਏਐੱਸਆਈ ਦਰਸਨ ਸਿੰਘ ਸਮੇਤ ਪੁਲਿਸ ਫੋਰਸ ਵਲੋਂ ਮੌਕੇ ਤੇ ਪੁੱਜਕੇ ਡੈਮ ਵਿੱਚ ਡੁੱਬੇ ਨੌਜਵਾਨ ਦੀ ਦੇਰ ਰਾਤ ਤੱਕ ਤਲਾਸ਼ ਕੀਤੀ ਗਈ ਪ੍ਰੰਤੂ ਹਨੇਰਾ ਹੋਣ ਕਾਰਨ ਕੁਝ ਵੀ ਹਾਸਲ ਨਹੀਂ ਹੋਇਆ।ਅੱਜ ਸਵੇਰ ਤੋਂ ਪੁਲਸ ਪਾਰਟੀ ਤੇ ਬਾਬਾ ਦੀਪ ਸਿੰਘ ਸੇਵਾ ਦਲ ਦੇ ਮੁੱਖ ਸੇਵਾਦਾਰ ਮਨਜੋਤ ਸਿੰਘ ਤਲਵੰਡੀ ਦੀ ਟੀਮ ਵਲੋਂ ਦੀ ਨੰਗਲ ਡੈਮ ਤੋ ਗੋਤਾਖੋਰ ਮੰਗਵਾਕੇ ਉਨ੍ਹਾਂ ਦੀ ਸਹਾਇਤਾ ਨਾਲ ਡੈਮ ਵਿੱਚ ਨਹਾਉਂਦੇ ਸਮੇਂ ਪਾਣੀ ਵਿੱਚ ਡੁੱਬੇ ਨੌਜਵਾਨ ਦੀ ਮ੍ਰਿਤਕ ਦੇਹ ਲੱਭਣ ਲਈ ਸਰਚ ਅਭਿਆਨ ਚਲਾਇਆ ਗਿਆ। ਕਾਫੀ ਜਦੋਜਹਿਦ ਕਰਨ ਉਪਰੰਤ ਗੋਤਾਖੋਰਾਂ ਵਲੋਂ ਨੌਜਵਾਨ ਦੀ ਲਾਸ਼ ਲੱਭਣ ਵਿਚ ਸਫਲਤਾ ਮਿਲੀ । ਜਿਸਦੀ ਪਹਿਚਾਣ ਅਸ਼ਵਨੀ ਪੁੱਤਰ ਜਗਦੀਸ਼ ਲਾਲ ਵਾਸੀ ਗੁਜਰਾਤੀ ਮੁਹੱਲਾ ਵਾਰਡ ਨੰਬਰ-6 ਗੜ੍ਹਦੀਵਾਲਾ ਵਜੋਂ ਹੋਈ ।ਗੜ੍ਹਦੀਵਾਲਾ ਪੁਲਿਸ ਵਲੋਂ ਉੱਕਤ ਨੌਜਵਾਨ ਦੀ ਲਾਸ਼ ਨੂੰ ਆਪਣੇ ਕਬਜੇ ਵਿੱਚ ਲੈ ਕੇ ਪੋਸਟਮਾਰਟਮ ਕਰਨ ਲਈ ਸਿਵਲ ਹਸਪਤਾਲ ਦਸੂਹਾ ਲਿਜਾਇਆ ਗਿਆ ਅਤੇ ਸਥਾਨਕ ਪੁਲਸ ਵੱਲੋਂ ਅਗਲੇਰੀ ਕਾਰਵਾਈ ਕੀਤੀ ਜਾ ਰਹੀ ਹੈ।