ਬਟਾਲਾ 22 ਨਵੰਬਰ (ਅਵਿਨਾਸ਼ ਸ਼ਰਮਾ )

14 ਲੱਖ ਤੋਂ ਵੱਧ ਅਣਗਿਣਤ ਰਕਮ ਬਰਾਮਦ, 50 ਹਜ਼ਾਰ ਰਿਸ਼ਵਤ ਦੀ ਰਕਮ ਸਮੇਤ ਗ੍ਰਿਫ਼ਤਾਰੀ
ਵਿਜੀਲੈਂਸ ਬਿਊਰੋ ਨੇ FIR ਦਰਜ ਕਰਕੇ ਕੀਤਾ ਵੱਡਾ ਖੁਲਾਸਾ, ਮਾਮਲਾ ਜਾਂਚ ਅਧੀਨ

: ਵਿਜੀਲੈਂਸ ਬਿਊਰੋ ਵੱਲੋਂ ਭ੍ਰਿਸ਼ਟਾਚਾਰ ਵਿਰੁੱਧ ਵੱਡੀ ਕਾਰਵਾਈ ਕਰਦਿਆਂ ਬਟਾਲਾ ਦੇ ਕਮਿਸ਼ਨਰ ਮਿਉਂਸਪਲ ਕਾਰਪੋਰੇਸ਼ਨ–ਕਮ SDM ਵਿਕਰਮਜੀਤ ਸਿੰਘ ਪੰਥੇ ਨੂੰ ਰਿਸ਼ਵਤ ਲੈਂਦੇ ਰੰਗੇ ਹੱਥੀਂ ਕਾਬੂ ਕਰ ਲਿਆ ਗਿਆ। ਗ੍ਰਿਫ਼ਤਾਰੀ ਦੌਰਾਨ ਉਸਦੇ ਕੋਲੋਂ ₹50,000 ਰਿਸ਼ਵਤ ਦੀ ਰਕਮ ਅਤੇ ਹੋਰ ਤਲਾਸ਼ੀ ਦੌਰਾਨ ₹13,50,000 ਅਣਗਿਣਤ ਰਕਮ ਵੀ ਬਰਾਮਦ ਕੀਤੀ ਗਈ ਹੈ।

ਇਸ ਸੰਬੰਧ ਵਿੱਚ FIR ਨੰਬਰ 44, ਤਾਰੀਖ 21.11.2025 ਭ੍ਰਿਸ਼ਟਾਚਾਰ ਰੋਕਥਾਮ ਕਾਨੂੰਨ 1988 (ਸੰਸ਼ੋਧਿਤ 2018) ਦੇ ਤਹਿਤ ਪੁਲਿਸ ਸਟੇਸ਼ਨ ਵਿਜੀਲੈਂਸ ਬਿਊਰੋ ਰੇਂਜ ਅੰਮ੍ਰਿਤਸਰ ਵਿੱਚ ਦਰਜ ਕੀਤੀ ਗਈ ਹੈ।

ਸ਼ਿਕਾਇਤਕਰਤਾ ਨੇ 10% ਰਿਸ਼ਵਤ ਮੰਗਣ ਦਾ ਲਗਾਇਆ ਦੋਸ਼
ਸ਼ਿਕਾਇਤਕਰਤਾ ਅਮਰਪਾਲ ਸਿੰਘ ਨਿਵਾਸੀ ਬੀਕੋ ਕੰਪਲੈਕਸ ਬਟਾਲਾ ਨੇ ਵਿਜੀਲੈਂਸ ਬਿਊਰੋ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੱਸਿਆ ਕਿ ਉਸ ਨੇ ਮਿਊਂਸਪਲ ਕਾਰਪੋਰੇਸ਼ਨ ਲਈ ਸੜਕਾਂ ਦੀ ਮੁਰੰਮਤ ਅਤੇ ਕੈਮਰਾ ਇੰਸਟਾਲੇਸ਼ਨ ਦਾ ਕੰਮ ਕੀਤਾ ਹੋਇਆ ਸੀ, ਜਿਸਦੇ ਕੁੱਲ ਬਕਾਇਆ ਬਿੱਲ ₹5,54,395 ਬਣਦੇ ਸਨ।

ਸ਼ਿਕਾਇਤ ਮੁਤਾਬਕ ਜਦੋਂ ਉਸਨੇ ਭੁਗਤਾਨ ਲਈ SDM ਵਿਕਰਮਜੀਤ ਸਿੰਘ ਪੰਥੇ ਨਾਲ ਸੰਪਰਕ ਕੀਤਾ ਤਾਂ ਉਸਨੇ 10% ਰਿਸ਼ਵਤ, ਅਰਥਾਤ ₹37,000 ਮੰਗੇ ਅਤੇ ਉਸਨੂੰ SDO ਰੋਹਿਤ ਉੱਪਲ ਕੋਲ ਭੇਜਿਆ। ਬਾਅਦ ਵਿੱਚ ਦਰ ਮੋੜ ਕੇ 9% ਰਿਸ਼ਵਤ ‘ਤੇ ਸਹਿਮਤੀ ਹੋਈ।

ਸ਼ਿਕਾਇਤਕਰਤਾ ਨੇ ਰਿਸ਼ਵਤ ਦੇਣ ਤੋਂ ਇਨਕਾਰ ਕਰਦਿਆਂ ਇਹ ਮਾਮਲਾ ਵਿਜੀਲੈਂਸ ਬਿਊਰੋ ਅੱਗੇ ਰੱਖਿਆ ਅਤੇ ਫ਼ਰਜ਼ੀ ਨੋਟਾਂ ਦੀ ਥਾਂ ਅਸਲ ₹50,000 ਰਿਸ਼ਵਤ ਲਈ ਮੁਹੱਈਆ ਕਰਵਾਏ।

ਰੰਗੇ ਹੱਥੀਂ ਗ੍ਰਿਫ਼ਤਾਰ — ਦੋ ਸਰਕਾਰੀ ਗਵਾਹਾਂ ਦੀ ਮੌਜੂਦਗੀ ਵਿੱਚ ਕਾਰਵਾਈ
ਵਿਜੀਲੈਂਸ ਬਿਊਰੋ ਦੀ ਟੀਮ ਨੇ ਰਚੇ ਜਾਲ ਅੰਦਰ ਜਦੋਂ ਪੈਸੇ ਸੌਂਪਣ ਦੀ ਪ੍ਰਕਿਰਿਆ ਹੋ ਰਹੀ ਸੀ, ਉਸੇ ਸਮੇਂ ਵਿਕਰਮਜੀਤ ਸਿੰਘ ਪੰਥੇ ਨੂੰ ਰੰਗੇ ਹੱਥੀਂ ਗ੍ਰਿਫ਼ਤਾਰ ਕੀਤਾ।
ਤਲਾਸ਼ੀ ਦੌਰਾਨ 13,50,000 ਹੋਰ ਬੇ-ਹਿਸਾਬ ਰਕਮ ਮਿਲਣ ’ਤੇ ਮਾਮਲਾ ਹੋਰ ਗੰਭੀਰ ਹੋ ਗਿਆ।

ਜਾਂਚ ਜਾਰੀ — ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ ਦੋਸ਼ੀ
ਵਿਜੀਲੈਂਸ ਬਿਊਰੋ ਮੁਤਾਬਕ ਮਾਮਲਾ ਇਸ ਵੇਲੇ ਜਾਂਚ ਅਧੀਨ ਹੈ ਅਤੇ ਰਿਕਵਰੀ ਅਤੇ ਬਿਆਨਾਂ ਦੇ ਅਧਾਰ ’ਤੇ ਹੋਰ ਸਰਕਾਰੀ ਅਧਿਕਾਰੀ ਵੀ ਸਕੈਨਰ ਹੇਠ ਆ ਸਕਦੇ ਹਨ। ਦੋਸ਼ੀ ਨੂੰ ਯੋਗ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ।