ਫਗਵਾੜਾ (ਲਾਲੀ ਦਾਦਰ)
* ਪਿੰਡ ਲੱਖਪੁਰ ‘ਚ ਡਿਗਿਆ ਟਰਾਂਸਫਾਰਮ ਦਾ ਖੰਭਾ
30 ਮਈ : ਬੀਤੀ ਰਾਤ ਤੇਜ ਹਨੇਰੀ ਤੇ ਬਾਰਿਸ਼ ਨਾਲ ਫਗਵਾੜਾ ਸਬ ਡਵੀਜਨ ਦੇ ਪੇਂਡੂ ਇਲਾਕਿਆਂ ‘ਚ ਬਿਜਲੀ ਦੇ ਪੋਲ ਅਤੇ ਦਰਖ਼ਤ ਡਿੱਗਣ ਨਾਲ ਜਿੱਥੇ ਕਈ ਘੰਟੇ ਤੱਕ ਬਿਜਲੀ ਪ੍ਰਭਾਵਿਤ ਰਹੀ। ਉੱਥੇ ਹੀ ਰਾਹਗੀਰਾਂ ਨੂੰ ਵੀ ਭਾਰੀ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪਿਆ। ਪਿੰਡ ਲੱਖਪੁਰ ਵਿਖੇ ਇਕ ਖੇਤ ‘ਚ ਮੋਟਰ ਤੇ ਲੱਗੇ ਟਰਾਂਸਫਾਰਮ ਦਾ ਖੰਭਾ ਡਿਗਣ ਦਾ ਵੀ ਸਮਾਚਾਰ ਹੈ। ਹਾਲਾਂਕਿ ਮਈ ਦੇ ਅਖੀਰੀ ਦਿਨਾਂ ‘ਚ ਬਰਸਾਤ ਹੋਣ ਨਾਲ ਸ਼ਹਿਰੀ ਇਲਾਕਿਆਂ ‘ਚ ਵੱਸਦੇ ਲੋਕਾਂ ਦੇ ਚਿਹਰੀਆਂ ਤੇ ਖੁਸ਼ੀ ਦੀ ਲਹਿਰ ਸੀ ਕਿਉਂਕਿ ਇਹਨਾਂ ਦਿਨਾਂ ‘ਚ ਆਮ ਤੌਰ ਤੇ ਹੁਮਸ ਭਰੀ ਗਰਮੀ ਹੁੰਦੀ ਹੈ ਅਤੇ ਛਬੀਲਾਂ ਲਗਾ ਕੇ ਲੋਕ ਬਾਰਿਸ਼ ਦੀਆਂ ਮੁਰਾਦਾਂ ਮੰਗਦੇ ਹਨ ਪਰ ਇਸ ਵਾਰ ਕੁਦਰਤ ਗਰਮੀ ‘ਚ ਸਰਦੀ ਦਾ ਅਹਿਸਾਸ ਕਰਵਾ ਰਹੀ ਹੈ ਅਤੇ ਲੋਕ ਘਰਾਂ ‘ਚ ਲੱਗੇ ਏ.ਸੀ. ਚਲਾਉਣ ਦੀ ਬਜਾਏ ਕੁਦਰਤੀ ਠੰਡੀਆਂ ਤੇ ਸ਼ੁੱਧ ਹਵਾਵਾਂ ਦਾ ਆਨੰਦ ਮਾਣ ਰਹੇ ਹਨ। ਦੂਸਰੇ ਪਾਸੇ ਪੇਂਡੂ ਇਲਾਕਿਆਂ ‘ਚ ਤੇਜ ਹਵਾਵਾਂ ਕਈ ਤਰ੍ਹਾਂ ਦੀਆਂ ਮੁਸ਼ਕਲਾਂ ਦਾ ਸਬੱਬ ਬਣ ਰਹੀਆਂ ਹਨ। ਕਈ ਪਿੰਡਾਂ ਦੇ ਵਸਨੀਕਾਂ ਨੇ ਦੱਸਿਆ ਕਿ ਬੀਤੀ ਰਾਤ ਚੱਲੀਆਂ ਤੇਜ ਹਵਾਵਾਂ ਨਾਲ ਬਿਜਲੀ ਦੇ ਖੰਭੇ ਅਤੇ ਦਰਖ਼ਤ ਡਿੱਗਣ ਨਾਲ ਉਹਨਾਂ ਨੂੰ ਜਿੱਥੇ ਰਾਤ ਹਨੇ੍ਹਰੇ ‘ਚ ਕੱਟਣੀ ਪਈ ਉੱਥੇ ਹੀ ਘੁੱਪ ਹਨੇ੍ਹੇਰੇ, ਬਰਸਾਤ ਅਤੇ ਤੇਜ ਹਵਾਵਾਂ ਦੇ ਚਲਦਿਆਂ ਰਾਹਗੀਰਾਂ ਨੂੰ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਇਸ ਵਿਗੜੇ ਮੌਸਮ ‘ਚ ਕਈ ਵਾਹਨ ਚਾਲਕਾਂ ਦੇ ਸੱਟਾਂ ਲੱਗਣ ਦਾ ਵੀ ਸਮਾਚਾਰ ਹੈ। ਪਾਵਰਕਾਮ ਦੇ ਜੇਈ ਸ਼ੀਸ਼ਪਾਲ ਨੇ ਦੱਸਿਆ ਕਿ ਜਲਦੀ ਹੀ ਪ੍ਰਭਾਵਿਤ ਹੋਏ ਖੰਭਿਆਂ ਤੇ ਟਰਾਂਸਫਾਰਮਾਂ ਦੀ ਮੁਰੰਮਤ ਕਰਵਾ ਦਿੱਤੀ ਜਾਵੇਗੀ।
ਕੈਪਸ਼ਨ- ਪਿੰਡ ਲੱਖਪੁਰ ਵਿਖੇ ਬੀਤੀ ਰਾਤ ਚੱਲੀ ਤੇਜ ਹਨ੍ਹੇਰੀ ਨਾਲ ਨੁਕਸਾਨਿਆ ਗਿਆ ਇਕ ਟਰਾਂਸਫਾਰਮ ਅਤੇ ਮੌਕੇ ਦਾ ਮੁਆਇਨਾ ਕਰਦੇ ਹੋਏ ਪਾਵਰਕਾਮ ਦੇ ਅਧਿਕਾਰੀ।
