ਛਦੌੜੀ ਤੋਂ ਬਾਬਾ ਨੰਦਾ ਤੇ ਸਰਕਾਰੀ ਸਕੂਲ ਤੱਕ ਸੜਕ ਦੀ ਹਾਲਤ ਖਸਤਾ

ਬਲਾਚੌਰ, 26 ਮਈ (ਜਤਿੰਦਰ ਪਾਲ ਸਿੰਘ ਕਲੇਰ ) ਪਿੰਡ ਛਦੌੜੀ ਤੋਂ ਬਾਬਾ ਨੰਦਾ ਜੀ ਦੇ ਅਸਥਾਨ ‘ਤੇ ਸਰਕਾਰੀ ਹਾਈ ਸਕੂਲ ਨੂੰ ਜਾਂਦੀ ਸੜਕ ਦੀ ਹਾਲਤ ਕਾਫ਼ੀ ਤਰਸਯੋਗ ਬਣੀ ਹੋਈ ਹੈ | ਇਸ ‘ਚ ਥਾਂ-ਥਾਂ ਟੋਏ ਪੈ ਚੁੱਕੇ ਹਨ | ਜਦੋਂ ਬਾਰਸ਼ ਹੋ ਜਾਂਦੀ ਹੈ ਤਾਂ ਇਹ ਸਾਰੇ ਪਾਣੀ ਨਾਲ ਭਰ ਜਾਂਦੇ ਹਨ | ਜਿੱਥੋਂ ਲੰਘਣਾ ਕਾਫ਼ੀ ਮੁਸ਼ਕਲ ਹੋ ਜਾਂਦਾ ਹੈ | ਇਸ ਪਿੰਡ ਤੇ ਇਲਾਕੇ ਦੇ ਲੋਕਾਂ ਦੀ ਬਾਬਾ ਨੰਦਾ ਜੀ ਦੇ ਅਸਥਾਨ ਨਾਲ ਕਾਫ਼ੀ ਆਸਥਾ ਜੁੜੀ ਹੋਣ ਕਰਕੇ ਸੰਗਤਾਂ ਇਸੇ ਟੁੱਟੀ ਹੋਈ ਸੜਕ ਰਾਹੀਂ ਬੜੀ ਮੁਸ਼ਕਲ ਨਾਲ ਇਸ ਅਸਥਾਨ ‘ਤੇ ਪਹੁੰਚਦੇ ਹਨ | ਇਸ ਟੁੱਟੀ ਹੋਈ ਸੜਕ ਰਾਹੀਂ ਹੀ ਵਿਦਿਆਰਥੀ ਸਰਕਾਰੀ ਹਾਈ ਸਕੂਲ ਵਿਖੇ ਪੜ੍ਹਨ ਆਉਂਦੇ ਹਨ | ਜਿਨ੍ਹਾਂ ਨੂੰ ਕਾਫ਼ੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ | ਕਈ ਵਾਰ ਛੋਟੇ ਬੱਚੇ ਡਿੱਗ ਕੇ ਸੱਟਾਂ ਵੀ ਲਗਵਾ ਚੁੱਕੇ ਹਨ | ਇਸ ਸੜਕ ਰਾਹੀਂ ਉੱਪਰਲੇ ਪਿੰਡਾਂ ਦੇ ਲੋਕ ਅੱਗੇ ਹਾਈਵੇਅ ‘ਤੇ ਚੜ੍ਹਦੇ ਹਨ | ਪਿੰਡ ਛਦੌੜੀ ਵਾਸੀ ਕੈਪ. ਹਰਬੰਸ ਸਿੰਘ ਥਿਆੜਾ, ਮਾ. ਤੇਲੂ ਰਾਮ ਤੇ ਕਸ਼ਮੀਰ ਸਿੰਘ ਦੋਵੇਂ ਸਾਬਕਾ ਸਰਪੰਚ, ਨੰਬਰਦਾਰ ਮਹਿੰਦਰ ਸਿੰਘ, ਹਰਜਿੰਦਰ ਸਿੰਘ ਲਾਲੀ, ਕੈਪ. ਹਰਮਿੰਦਰ ਸਿੰਘ, ਜਸਵੀਰ ਸਿੰਘ, ਬਲਵੀਰ ਸਿੰਘ, ਮਾ.ਹਰਬੰਸ ਸਿੰਘ, ਸ਼ਰਨਜੀਤ ਸਿੰਘ, ਜਰਮਨ ਸਿੰਘ ਖ਼ਾਲਸਾ, ਸੁਖਵਿੰਦਰ ਸਿੰਘ, ਹਰਨੇਕ ਸਿੰਘ ਆਦਿ ਨੇ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਇਸ ਸੜਕ ਨੂੰ ਪਹਿਲ ਦੇ ਆਧਾਰ ‘ਤੇ ਠੀਕ ਕਰਵਾਇਆ ਜਾਵੇ |