ਸਿਵਲ ਹਸਪਤਾਲ ‘ਚੋਂ ਮਰੀਜ਼ ਦੀ ਐਕਟਿਵਾ ਚੋਰੀ

ਗੜ੍ਹਸ਼ੰਕਰ, 19 ਮਈ (ਜਤਿੰਦਰ ਪਾਲ ਸਿੰਘ ਕਲੇਰ )-ਗੜ੍ਹਸ਼ੰਕਰ ਸ਼ਹਿਰ ਤੇ ਇਲਾਕੇ ‘ਚ ਚੋਰੀਆਂ ਦਾ ਸਿਲਸਿਲਾ ਰੁਕਣ ਦਾ ਨਾਂਅ ਨਹੀਂ ਲੈ ਰਿਹਾ | ਇੱਥੇ ਪੁਲਿਸ ਨਾਲੋਂ ਵਧੇਰੇ ਚੋਰ ਚੁਸਤ ਨਜ਼ਰ ਆ ਰਹੇ ਹਨ | ਚੋਰੀ ਦਾ ਤਾਜ਼ਾ ਮਾਮਲਾ ਸਿਵਲ ਹਸਪਤਾਲ ਚੋਂ ਸਾਹਮਣੇ ਆਇਆ ਹੈ ਜਿੱਥੇ ਦਵਾਈ ਲੈਣ ਗਏ ਇਕ ਮਰੀਜ਼ ਨੂੰ ਆਪਣੀ ਐਕਟਿਵਾ ਤੋਂ ਹੱਥ ਧੋਣਾ ਪੈ ਗਿਆ | ਪਿੰਡ ਭੰਮੀਆਂ ਨਿਵਾਸੀ ਕਮਲਜੀਤ ਪੁੱਤਰ ਹੁਕਮ ਚੰਦ ਨੇ ਦੱਸਿਆ ਕਿ ਉਹ ਸਵੇਰੇ ਕਰੀਬ 11 ਕੁ ਵਜੇ ਸਥਾਨਕ ਸਿਵਲ ਹਸਪਤਾਲ ਦੇ ਕੰਪਲੈਕਸ ਵਿਚ ਐਕਟਿਵਾ ਨੰਬਰ ਪੀ.ਬੀ. 07 ਬੀ.ਐੱਨ.-9330 ਖੜ੍ਹੀ ਕਰਕੇ ਦਵਾਈ ਲੈਣ ਗਿਆ ਸੀ | ਕਮਲਜੀਤ ਨੇ ਦੱਸਿਆ ਕਿ ਜਦੋਂ ਅੱਧੇ ਕੁ ਘੰਟੇ ਬਾਅਦ ਮੈਂ ਬਾਹਰ ਆਇਆ ਤਾਂ ਐਕਟਿਵਾ ਗ਼ਾਇਬ ਸੀ, ਜਿਸ ਦੀ ਆਲੇ-ਦੁਆਲੇ ਭਾਲ ਕਰਨ ਤੋਂ ਬਾਅਦ ਚੋਰੀ ਦੀ ਘਟਨਾ ਬਾਰੇ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ ਹੈ | ਕਮਲਜੀਤ ਨੇ ਦੱਸਿਆ ਕਿ ਐਕਟਿਵਾ ਵਿਚ 6 ਹਜ਼ਾਰ ਰੁਪਏ ਦੀ ਨਕਦੀ ਵੀ ਰੱਖੀ ਹੋਈ ਸੀ |