ਫਗਵਾੜਾ 5 ਸਤੰਬਰ (ਲਾਲੀ)

: ਪੈਰਿਸ ਪੈਰਾਉਲੰਪਿਕ ਖੇਡਾਂ ਵਿੱਚ ਭਾਰਤੀ ਦਿਵਿਆਂਗ ਅਥਲੀਟਾਂ ਨੇ ਤਗਮਿਆਂ ਦੀਆਂ ਝੜੀਆਂ ਲੱਗਾ ਕੇ ਹੁਣ ਤੱਕ 21 ਤਗਮੇ ਜਿੱਤਕੇ ਭਾਰਤ ਦਾ ਨਾਮ ਰੌਸ਼ਨ ਹੀ ਨਹੀਂ ਕੀਤਾ ਸਗੋਂ ਪਿੱਛਲੇ ਰਿਕਾਰਡ ਨੂੰ ਤੋੜ ਕੇ ਇੱਕ ਨਵਾਂ ਇਤਿਹਾਸ ਰਚਣ ਲਈ ਡੱਟੇ ਹੋਏ ਹਨ। ਇਸਦੇ ਬਾਵਜੂਦ ਵੀ ਸਾਡੇ ਤਗਮਾ ਜੇਤੂ ਅਥਲੀਟਾਂ ਨੂੰ ਪੂਰਾ ਬਣਦਾ ਮਾਨ ਸਤਿਕਾਰ ਸਰਕਾਰਾਂ ਵੱਲੋਂ ਨਹੀਂ ਦਿੱਤਾ ਜਾਂਦਾ। ਲੇਕਿਨ ਕੁੱਝ ਦਿਨ ਚੱਲਦੇ ਸਨਮਾਨ ਸਮਾਰੋਹ ‘ਤੇ ਵਧਾਈਆਂ ਦੇਣ ਦੇ ਦੌਰ ਤੋਂ ਬਾਅਦ ਸਾਡੇ ਤਗਮਾ ਜੇਤੂ ਅਥਲੀਟਾਂ ਨੂੰ ਨੌਕਰੀਆਂ ਲਈ ਲੇਲੜੀਆਂ ਕੱਢਣੀਆਂ ਪੈਂਦੀਆਂ ਹਨ l ਇਸ ਦੌਰਾਨ ਇੱਕਾ ਦੁੱਕਾ ਅਥਲੀਟਾਂ ਨੂੰ ਤਾਂ ਅਡਜਸਟਮੈਂਟ ਕਰ ਦਿੱਤਾ ਜਾਂਦਾ ਹੈ ਬਾਕੀ ਦਿਵਿਆਂਗ ਅਥਲੀਟਾਂ ਨੂੰ ਝੂਠੇ ਸਬਰ ਨਾਲ ਜ਼ਿੰਦਗੀ ਜਿਊਣ ਲਈ ਮਜਬੂਰ ਹੋਣਾ ਪੈਂਦਾ ਹੈ। ਉਪਰੋਕਤ ਸ਼ਬਦਾਂ ਦਾ ਪ੍ਰਗਟਾਵਾ ਕਰਦਿਆਂ ਪੰਜਾਬ ਦਿਵਿਆਂਗ ਐਕਸ਼ਨ ਕਮੇਟੀ ਦੇ ਸੂਬਾ ਪ੍ਰਧਾਨ ਲਖਵੀਰ ਸਿੰਘ ਸੈਣੀ ਨੇ ਭਾਰਤ ਸਰਕਾਰ ਅਤੇ ਪੰਜਾਬ ਸਰਕਾਰ ਅੱਗੇ ਗੁਹਾਰ ਲਗਾਉਂਦਿਆਂ ਕਿਹਾ ਕਿ ਸਾਡੇ ਅਥਲੀਟਾਂ ਲਈ ਅਜਿਹੀ ਨਵੀਂ ਖੇਡ ਨੀਤੀ ਤਿਆਰ ਕਰਨੀ ਚਾਹੀਦੀ ਹੈ ਕਿ ਜੋ ਵੀ ਪੈਰਾ ਉਲੰਪਿਕ ਖੇਡਾਂ ਵਿੱਚ ਤਗਮਾ ਜਿੱਤਦਾ ਹੈ ਉਸਨੂੰ ਦੇਸ਼ ਪਰਤਦਿਆਂ ਹੀ ਯੋਗਤਾ ਅਨੁਸਾਰ ਰੁਜ਼ਗਾਰ ਲਈ ਵੱਡੇ ਅਹੁਦੇ ਤੇ ਸਨਮਾਨ ਚਿੰਨ੍ਹ ਦੇ ਨਾਲ ਹੀ ਸਰਕਾਰੀ ਨੌਕਰੀ ਦਾ ਨਿਯੁਕਤੀ ਪੱਤਰ ਦਿੱਤਾ ਜਾਵੇ। ਜ਼ਿਕਰਯੋਗ ਹੈ ਕਿ ਪਿੱਛਲੇ ਮਹੀਨੇ ਹੋਈਆਂ ਪੈਰਿਸ ਉਲੰਪਿਕ ਖੇਡਾਂ ਵਿੱਚ ਭਾਰਤ ਦੇ 117 ਖਿਡਾਰੀਆਂ ਨੇ ਸਿਰਫ਼ 1 ਚਾਂਦੀ ਤੇ 5 ਕਾਂਸ਼ੀ ਦੇ ਤਗਮੇ ਜਿੱਤੇ ਸਨ। ਇਨ੍ਹਾਂ ਤੰਦਰੁਸਤ ਖਿਡਾਰੀਆਂ ਲਈ 500/ ਕਰੋੜ ਰੁਪਏ ਤੋਂ ਵੀ ਵੱਧ ਦਾ ਖ਼ਰਚ ਕੀਤਾ, ਇਸਦੇ ਬਾਵਜੂਦ ਪੈਰਾ ਉਲੰਪਿਕ ਦਿਵਿਆਂਗ ਖਿਡਾਰੀਆਂ ਨੇ ਹੁਣ ਤੱਕ 21 ਤਗਮੇ ਜਿੱਤ ਲਏ ਹਨ ਅਤੇ ਰਹਿੰਦੇ ਬਾਕੀ ਦਿਨਾਂ ਵਿੱਚ ਵੀ ਹੋਰ ਤਗਮੇ ਜਿੱਤਣ ਦੀ ਆਸ ਹੈ, ਇਨ੍ਹਾਂ ਪੈਰਾਉਲੰਪਿਕ ਵਿੱਚ ਭਾਗ ਲੈਣ ਵਾਲੇ 84 ਪੈਰਾ੍ ਅਥਲੀਟਾਂ ‘ਤੇ ਭਾਰਤ ਸਰਕਾਰ ਵੱਲੋਂ ਸਿਰਫ਼ 20 ਕਰੋੜ ਰੁਪਏ ਰੱਖੇ ਗਏ ਹਨ। ਸੋ ਭਾਰਤ ਸਰਕਾਰ ਨੂੰ ਚਾਹੀਦਾ ਹੈ ਕਿ ਦੇਸ਼ ਦਾ ਨਾਮ ਸੁਨਹਿਰੀ ਅੱਖਰਾਂ ਵਿੱਚ ਲਿਖਣ ਵਾਲੇ ਇਨ੍ਹਾਂ ਦਿਵਿਆਂਗ ਅਥਲੀਟਾਂ ਨੂੰ ਵੀ ਬਾਕੀ ਤੰਦਰੁਸਤ ਤਗਮਾ ਜੇਤੂ ਅਥਲੀਟਾਂ ਵਾਂਗ ਹੀ ਬਜ਼ਟ ਅਤੇ ਸਹੂਲਤਾਂ ਦੇਣ ਤਾਂ ਜੋ ਉਹ ਵਧੇਰੇ ਹੌਸਲੇ ਨਾਲ ਬੁਲੰਦੀਆਂ ਛੂਹਣ ਵਿੱਚ ਕਾਮਯਾਬ ਹੋ ਸਕਣ।