ਗੁਰਦਾਸਪੁਰ, 2 ਫਰਵਰੀ ( ਅਸ਼ਵਨੀ )

ਅਣਪਛਾਤੇ ਕਾਰ ਸਵਾਰਾਂ ਵਿਰੁੱਧ ਪੁਲਿਸ ਵਲੋਂ ਮਾਮਲਾ ਦਰਜ

: ਜ਼ਿਲ੍ਹਾ ਗੁਰਦਾਸਪੁਰ ਦੇ ਪਿੰਡ ਜ਼ਫਰਵਾਲ ਵਿੱਚ ਦੇਰ ਰਾਤ ਕਾਰ ਸਵਾਰਾਂ ਵਲੋਂ ਇੱਕ ਅਮਰੀਕਾ ਰਹਿੰਦੇ ਲੜਕੇ ਦੇ ਘਰ ਦੇ ਬਾਹਰ ਫਾਇਰਿੰਗ ਕੀਤੀ ਗਈ । ਇਸ ਤੋਂ ਬਾਅਦ ਮੁਲਜ਼ਮ ਜ਼ਫਰਵਾਲ ਠੱਕਰ ਵੱਲ ਭੱਜ ਗਏ। ਪੁਲਿਸ ਸਟੇਸ਼ਨ ਧਾਰੀਵਾਲ ਦੀ ਪੁਲੀਸ ਵੱਲੋ ਅਣਪਛਾਤੇ ਕਾਰ ਸਵਾਰਾਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਲਿਆ ਹੈ। ਫਿਲਹਾਲ ਦੋਸ਼ੀਆਂ ਦੀ ਪਛਾਣ ਨਹੀਂ ਹੋ ਸਕੀ ਹੈ।

ਨਗੀਨਾ ਸਿੰਘ ਪੁੱਤਰ ਹਰਭਜਨ ਸਿੰਘ ਵਾਸੀ ਜਫਰਵਾਲ ਨੇ ਦੱਸਿਆ ਕਿ ਉਸ ਦਾ ਲੜਕਾ ਪਰਿਵਾਰ ਸਮੇਤ ਅਮਰੀਕਾ ਰਹਿੰਦਾ ਹੈ। ਉਹ ਆਪਣੀ ਪਤਨੀ, ਨੌਕਰਾਣੀ ਅਤੇ ਡਰਾਈਵਰ ਲਵਪ੍ਰੀਤ ਸਿੰਘ ਵਾਸੀ ਬੱਲ ਸਮੇਤ ਘਰ ਵਿੱਚ ਰਹਿੰਦਾ ਹੈ। ਰਾਤ ਨੂੰ ਖਾਣਾ ਖਾ ਕੇ ਪਰਿਵਾਰ ਸੌਂ ਗਿਆ। ਰਾਤ ਕਰੀਬ 2 ਵਜੇ ਘਰ ਦੇ ਬਾਹਰ ਗੋਲੀ ਚੱਲਣ ਦੀ ਆਵਾਜ਼ ਸੁਣਾਈ ਦਿੱਤੀ। ਜਦੋਂ ਉਸ ਦੇ ਡਰਾਈਵਰ ਲਵਪ੍ਰੀਤ ਜੋ ਕਿ ਉਪਰਲੇ ਕਮਰੇ ਵਿੱਚੋਂ ਸੀ, ਨੇ ਖਿੜਕੀ ਵਿੱਚੋਂ ਦੇਖਿਆ ਤਾਂ ਗੋਲੀ ਚਲਾਉਣ ਵਾਲਾ ਅਣਪਛਾਤਾ ਕਾਰ ਸਵਾਰ ਜ਼ਫਰਵਾਲ ਠੱਕਰ ਵੱਲ ਭੱਜ ਰਿਹਾ ਸੀ। ਮਾਮਲੇ ਦੀ ਜਾਂਚ ਕਰ ਰਹੇ ਏਐਸਆਈ ਜਗਦੀਸ਼ ਸਿੰਘ ਨੇ ਦੱਸਿਆ ਕਿ ਮਾਮਲਾ ਦਰਜ ਕਰ ਲਿਆ ਗਿਆ ਹੈ ਅਤੇ ਅਣਪਛਾਤੇ ਮੁਲਜ਼ਮਾਂ ਦੀ ਪਛਾਣ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਉਸ ਨੂੰ ਜਲਦੀ ਹੀ ਗ੍ਰਿਫਤਾਰ ਕਰ ਲਿਆ ਜਾਵੇਗਾ।