ਫਗਵਾੜਾ 26 ਜੁਲਾਈ (ਲਾਲੀ ਦਾਦਰ )

* ਐੱਸ.ਐਮ.ਓ ਡਾ. ਲਹਿੰਬਰ ਰਾਮ ਨੇ ਕੀਤੀ ਉਪਰਾਲੇ ਦੀ ਸ਼ਲਾਘਾ

: ਸਿਵਲ ਹਸਪਤਾਲ ਫਗਵਾੜਾ ਦੇ ਬਾਰੇ ਬਹੁਤੇ ਲੋਕਾਂ ਵਿੱਚ ਅਕਸਰ ਇਹ ਗਲਤ ਧਾਰਨਾ ਰਹਿੰਦੀ ਹੈ ਕਿ ਇੱਥੇ ਇਲਾਜ ਲਈ ਲੋਕਾ ਨੂੰ ਕਾਫੀ ਖੱਜਲ ਖੁਆਰ ਹੋਣਾ ਪੈਂਦਾ ਹੈ ਅਤੇ ਇੱਥੇ ਇਲਾਜ ਵੀ ਸਹੀ ਨਹੀਂ ਹੁੰਦਾ ਹੈ, ਪਰ ਇਸ ਧਾਰਨਾ ਨੂੰ ਇੱਥੋਂ ਦੇ ਸਰਜਨ ਡਾ. ਰਵੀ ਕੁਮਾਰ ਨੇ ਗਲਤ ਸਾਬਿਤ ਕਰਦੇ ਹੋਏ ਇਕ ਮਹਿਲਾ ਮਰੀਜ ਦਾ ਸਫਲ ਆਪ੍ਰੇਸ਼ਨ ਕਰਕੇ ਉਸ ਦੇ ਢਿੱਡ ਵਿਚੋਂ 30 ਕਿੱਲੋ ਵਜਨ ਦੀ ਰਸੋਲੀ ਕੱਢਣ ਦਾ ਅਚੰਭਾ ਕਰ ਦਿਖਾਇਆ ਹੈ। ਡਾ. ਰਵੀ ਕੁਮਾਰ ਦੇ ਇਸ ਉਪਰਾਲੇ ਦੀ ਸ਼ਲਾਘਾ ਕਰਦੇ ਹੋਏ ਸਿਵਲ ਹਸਪਤਾਲ ਦੇ ਐਸ.ਐਮ.ਓ. ਡਾ. ਲਹਿੰਬਰ ਰਾਮ ਨੇ ਦੱਸਿਆ ਕਿ ਅਜਿਹੀ ਹਾਈ ਰਿਸਕ ਸਰਜਰੀ ਵੱਡੇ ਪ੍ਰਾਈਵੇਟ ਹਸਪਤਾਲਾਂ ‘ਚ ਵੀ ਡਾਕਟਰਾਂ ਵਲੋਂ ਬਹੁਤ ਸੋਚ ਵਿਚਾਰ ਕੇ ਕੀਤੀ ਜਾਂਦੀ ਹੈ ਅਤੇ ਬਹੁਤ ਵੱਡੀ ਰਕਮ ਖਰਚ ਹੁੰਦੀ ਹੈ। ਡਾ. ਰਵੀ ਕੁਮਾਰ ਨੇ ਦੱਸਿਆ ਕਿ ਰਵੀਨਾ ਖਾਤੂਨ (25) ਪਤਨੀ ਸਾਹਿਲ ਵਾਸੀ ਉੱਪਲਾਂ ਜਿਲ੍ਹਾ ਲੁਧਿਆਣਾ ਦੇ ਢਿੱਡ ਦਾ ਸਾਈਜ ਪਿਛਲੇ ਦੋ ਢਾਈ ਸਾਲਾ ਤੋਂ ਵੱਡਾ ਹੋ ਰਿਹਾ ਸੀ ਅਤੇ ਹਮੇਸ਼ਾ ਦਰਦ ਰਹਿੰਦਾ ਸੀ। ਜਿਸਨੇ ਲੁਧਿਆਣਾ ਤੋਂ ਇਲਾਵਾ ਕਈ ਹੋਰ ਪ੍ਰਾਇਵੇਟ ਹਸਪਤਾਲਾਂ ‘ਚ ਚੈਕਅਪ ਕਰਵਾਇਆ। ਡਾਕਟਰਾਂ ਵਲੋਂ ਉਸ ਦੇ ਇਲਾਜ ‘ਤੇ ਇੱਕ ਲੱਖ ਰੁਪਏ ਖ਼ਰਚਾ ਦੱਸਿਆ। ਜੋ ਗ਼ਰੀਬ ਪਰਿਵਾਰ ਹੋਣ ਕਾਰਣ ਉਹ ਅਪਣਾ ਇਲਾਜ ਕਰਵਾਉਣ ਚ ਅਸਮਰੱਥ ਸੀ। ਜਿਸ ਤੇ ਸਿਵਲ ਹਸਪਤਾਲ ਫਗਵਾੜਾ ਦਾ ਰੁੱਖ ਕੀਤਾ ਤਾਂ ਮੁੱਢਲੀ ਜਾਂਚ ਵਿਚ ਮਰੀਜ ਦਾ ਬਲੱਡ ਘੱਟ ਹੋਣ ਅਤੇ ਗਰੁੱਪ ਏ-ਨੈਗੇਟਿਵ ਹਾਸਲ ਕਰਨ ‘ਚ ਵੀ ਕਾਫੀ ਦਿੱਕਤ ਆਈ। ਅਖੀਰ ਪਠਾਨਕੋਟ ਤੋਂ ਬਲੱਡ ਲਿਆ ਕੇ ਉਸ ਦੇ ਸਮੂਚੇ ਟੈਸਟ ਕੀਤੇੇ ਗਏ। ਫਿਰ ਕਰੀਬ ਪੰਦਰਾਂ ਦਿਨਾਂ ਬਾਅਦ ਅੱਜ ਸਫਲ ਸਰਜਰੀ ਕਰਕੇ ਰਸੋਲੀ ਕੱਢੀ ਗਈ ਹੈ। ਮਹਿਲਾ ਦੇ ਪਤੀ ਸਾਹਿਲ ਨੇ ਡਾ. ਰਵੀ ਕੁਮਾਰ ਦਾ ਧੰਨਵਾਦ ਕੀਤਾ ਅਤੇ ਕਿਹਾ ਕਿ ਸਰਕਾਰੀ ਹਸਪਤਾਲਾਂ ਪ੍ਰਤੀ ਉਸ ਦੇ ਮੰਨ ਵਿਚ ਜੋ ਵੀ ਸ਼ੰਕੇ ਸੀ, ਅੱਜ ਉਹ ਸਾਰੇ ਦੂਰ ਹੋ ਗਏ ਹਨ।
ਤਸਵੀਰ 001, ਤਸਵੀਰ – ਫਗਵਾੜਾ ਦੇ ਸਿਵਲ ਹਸਪਤਾਲ ‘ਚ ਮਹਿਲਾ ਮਰੀਜ ਦੇ ਢਿੱਡ ਵਿਚੋਂ ਆਪ੍ਰੇਸ਼ਨ ਰਾਹੀਂ ਕੱਢੀ ਗਈ 30 ਕਿਲੋ ਵਜਨੀ ਰਸੋਲੀ ਦਿਖਾਉਂਦੇ ਹੋਏ ਐਸ.ਐਮ.ਓ. ਡਾ. ਲਹਿੰਬਰ ਰਾਮ ਦੇ ਨਾਲ ਸਰਜਨ ਡਾ. ਰਵੀ ਕੁਮਾਰ ਅਤੇ ਹੋਰ।