ਮੁਰਗੀਆਂ ਨੂੰ ਦਾਣੇ ਪਾਉਣ ਤੇ ਹੋਏ ਮਾਮੂਲੀ ਝਗੜੇ ਤੋਂ ਬਾਅਦ ਚਚੇਰੇ ਭਰਾ ਨੇ ਗੋਲੀਆਂ ਮਾਰ ਕੀਤਾ ਭਰਾ ਦਾ ਕਤਲ

ਟਾਂਡਾ / ਦਸੂਹਾ(ਚੌਧਰੀ) : ਹਲਕਾ ਵਿਧਾਇਕ ਉੜਮੁੜ ਟਾਂਡਾ ਜਸਵੀਰ ਸਿੰਘ ਰਾਜਾ ਦੇ ਪਿੰਡ ਕੁਰਾਲਾ ਵਿਖੇ ਉਸ ਵੇਲੇ ਦਹਿਸ਼ਤ ਦਾ ਮਹੌਲ ਪੈਦਾ ਹੋ ਗਿਆ ਜਦੋਂ ਚਚੇਰੇ ਭਰਾ ਨੇ ਆਪਣੇ ਹੀ ਵੱਡੇ ਭਰਾ ਨੂੰ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ । ਮ੍ਰਿਤਕ ਦੀ ਪਛਾਣ ਹਰਪ੍ਰੀਤ ਸਿੰਘ ਉਮਰ ਕਰੀਬ 49/50 ਸਾਲ ਵਾਸੀ ਕੁਰਾਲਾ ਵਜੋਂ ਹੋਈ ।ਮੌਕੇ ਤੇ ਜਾਣਕਾਰੀ ਦਿੰਦੇ ਹੋਏ ਮ੍ਰਿਤਕ ਦੇ ਚਾਚੇ ਨੇ ਦੱਸਿਆ ਕਿ ਹਰਪ੍ਰੀਤ ਸਿੰਘ ਦੇ ਮੁਰਗੀ ਖਾਨੇ ਚ ਕੋਈ ਜਹਿਰੀਲੀ ਚੀਜ ਖਾਣ ਨਾਲ ਇੱਕ ਮੁਰਗੀ ਮਰ ਗਈ,ਜਿਸ ਦੀ ਸ਼ੱਕ ਉਹ ਆਪਣੇ ਚਚੇਰੇ ਭਰਾ ਅਮਨਦੀਪ ਸਿੰਘ ਤੇ ਕਰਦਾ ਸੀ । ਵੀਰਵਾਰ ਸਵੇਰੇ ਅਮਨਦੀਪ ਸਿੰਘ ਹਰਪ੍ਰੀਤ ਦੇ ਮੁਰਗੀ ਖਾਨੇ ਵਿੱਚ ਮੁਰਗੀਆਂ ਨੂੰ ਕੋਈ ਚੀਜ ਪਾ ਰਿਹਾ ਸੀ ਤਾਂ ਹਰਪ੍ਰੀਤ ਨੇ ਮੌਕੇ ਤੇ ਫੜ ਲਿਆ , ਜਿਸ ਨੂੰ ਲੈ ਕੇ ਦੋਨਾਂ ਵਿਚਕਾਰ ਕਾਫੀ ਝਗੜਾ ਹੋਇਆ । ਇਸ ਝਗੜੇ ਦੌਰਾਨ ਦੋਨਾਂ ਨੂੰ ਮੌਕੇ ਤੇ ਇਕੱਠੇ ਹੋਏ ਸ਼ਰੀਕੇ ਭਾਈਚਾਰੇ ਵਲੋਂ ਛੁਡਾ ਦਿੱਤਾ ਗਿਆ । ਬਾਅਦ ਵਿੱਚ ਅਮਨਦੀਪ ਸਿੰਘ ਘਰੋਂ ਆਪਣੀ ਦੋਨਾਲੀ ਬੰਦੂਕ ਕੱਢ ਲਿਆਇਆ ਤੇ ਇੱਕ ਹਵਾਈ ਫਾਇਰ ਕਰਨ ਤੋਂ ਬਾਅਦ ਹਰਪ੍ਰੀਤ ਨੂੰ ਸਿੱਧੀ ਗੋਲੀ ਮਾਰ ਦਿੱਤੀ,ਜਿਸ ਵਿੱਚ ਹਰਪ੍ਰੀਤ ਗੰਭੀਰ ਰੂਪ ਚ ਜਖਮੀ ਹੋ ਗਿਆ । ਜਖਮੀ ਹਾਲਤ ਚ ਹਰਪ੍ਰੀਤ ਸਿੰਘ ਨੂੰ ਟਾਂਡਾ ਦੇ ਇੱਕ ਨਿੱਜੀ ਹਸਪਤਾਲ ਲਿਜਾਇਆ ਗਿਆ , ਜਿੱਥੇ ਡਾਕਟਰਾਂ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ । ਵਾਰਦਾਤ ਦੀ ਸੂਚਨਾ ਮਿਲਣ ਤੇ ਟਾਂਡਾ ਪੁਲਿਸ ਨੇ ਮੌਕੇ ਤੇ ਪਹੁੰਚ ਮ੍ਰਿਤਕ ਦੀ ਲਾਸ਼ ਆਪਣੇ ਕਬਜੇ ਚ ਲੈਣ ਤੋਂ ਬਾਅਦ ਆਪਣੀ ਅਗਲੀ ਕਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ।
ਫੋਟੋ : ਮ੍ਰਿਤਕ ਦੀ ਪ੍ਰੋਫਾਇਲ ਫੋਟੋ