ਦਸੂਹਾ 21 ਸਤੰਬਰ (ਚੌਧਰੀ) 

ਭੂਮੀ ਪੂਜਨ ਮੌਕੇ ਸ਼ਹਿਰ ਦੇ ਪਤਵੰਤਿਆਂ ਨੇ ਲਿਆ ਹਿੱਸਾ

: ਸਨਾਤਨ ਧਰਮ ਸਭਾ ਅਤੇ ਪਾਂਡਵ ਸਰੋਵਰ ਮੰਦਰ ਦਸੂਹਾ ਵੱਲੋਂ ਸ਼ਹਿਰ ਦੇ ਪਤਵੰਤਿਆਂ ਅਤੇ ਸੰਗਤ ਦੇ ਸਹਿਯੋਗ ਨਾਲ ਪਾਂਡਵ ਸਰੋਵਰ ਵਿਖੇ ਮਾਂ ਬਗਲਾ ਮੁਖੀ, ਮਾਂ ਗਾਇਤਰੀ ਅਤੇ ਸੂਰਜ ਭਗਵਾਨ ਦੇ ਮੰਦਰਾਂ ਦਾ ਨਵ ਨਿਰਮਾਣ ਕਰਵਾਇਆ ਜਾ ਰਿਹਾ ਹੈ। ਇਸ ਧਾਰਮਿਕ ਕਾਰਜ ਦੀ ਸ਼ੁਰੂਆਤ ਮੌਕੇ ਅੱਜ ਮੰਦਰ ਵਿਖੇ ਵਿਧੀਵਤ ਭੂਮੀ ਪੂਜਨ ਕਰਵਾਇਆ ਗਿਆ।
ਭੂਮੀ ਪੂਜਨ ਦੀਆਂ ਧਾਰਮਿਕ ਰਸਮਾਂ ਪੰਡਿਤ ਮਿਸ਼ਰਾ ਵੱਲੋਂ ਪੂਰੀਆਂ ਕਰਵਾਈਆਂ ਗਈਆਂ। ਇਸ ਮੌਕੇ ਸ਼ਰਧਾਲੂਆਂ ਨੇ ਪੂਰੀ ਸ਼ਰਧਾ ਅਤੇ ਭਾਵਨਾ ਨਾਲ ਪੂਜਾ ਵਿੱਚ ਭਾਗ ਲਿਆ ਅਤੇ ਮੰਦਰਾਂ ਦੇ ਨਵ ਨਿਰਮਾਣ ਲਈ ਮੰਗਲ ਕਾਮਨਾਵਾਂ ਕੀਤੀਆਂ।
ਇਸ ਮੌਕੇ ਸਨਾਤਨ ਧਰਮ ਸਭਾ ਦੇ ਪ੍ਰਧਾਨ ਰਵਿੰਦਰ ਰਵੀ ਸ਼ਿੰਗਾਰੀ ਨੇ ਭੂਮੀ ਪੂਜਨ ਸਮਾਗਮ ਵਿੱਚ ਪਹੁੰਚੇ ਸ਼ਹਿਰ ਦੇ ਪਤਵੰਤਿਆਂ ਅਤੇ ਸਹਿਯੋਗੀਆਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਇਹ ਕਾਰਜ ਸਮੂਹ ਸੰਗਤ ਦੇ ਸਹਿਯੋਗ ਨਾਲ ਨੇਪਰੇ ਚਾੜ੍ਹਿਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਪਾਂਡਵ ਸਰੋਵਰ ਧਾਰਮਿਕ ਅਤੇ ਆਸਥਾ ਦਾ ਮਹੱਤਵਪੂਰਨ ਕੇਂਦਰ ਹੈ ਅਤੇ ਮੰਦਰਾਂ ਦੇ ਨਵ ਨਿਰਮਾਣ ਨਾਲ ਇੱਥੇ ਆਉਣ ਵਾਲੇ ਸ਼ਰਧਾਲੂਆਂ ਨੂੰ ਹੋਰ ਸੁਵਿਧਾ ਮਿਲੇਗੀ।
ਇਸ ਮੌਕੇ ਸਮਾਜ ਸੇਵੀ ਜੋਗਿੰਦਰ ਪਾਲ ਮਹਾਜਨ ਨੇ ਸਨਾਤਨ ਧਰਮ ਸਭਾ ਵੱਲੋਂ ਕੀਤੇ ਜਾ ਰਹੇ ਇਸ ਧਾਰਮਿਕ ਕਾਰਜ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਧਾਰਮਿਕ ਸਥਾਨਾਂ ਦੀ ਸੇਵਾ-ਸੰਭਾਲ ਅਤੇ ਵਿਕਾਸ ਸਮਾਜ ਦੀ ਸਾਂਝੀ ਜ਼ਿੰਮੇਵਾਰੀ ਹੈ। ਉਨ੍ਹਾਂ ਇਸ ਕਾਰਜ ਵਿੱਚ ਸਹਿਯੋਗ ਦੇਣ ਵਾਲੇ ਸਾਰੇ ਸਹਿਯੋਗੀਆਂ ਦੀ ਪ੍ਰਸ਼ੰਸਾ ਕੀਤੀ।
ਭੂਮੀ ਪੂਜਨ ਮੌਕੇ ਧਰਮਪਾਲ ਨਾਇਰ, ਵਿਜੇ ਸ਼ਰਮਾ, ਇੰਦਰ ਮੋਹਨ ਸ਼ਰਮਾ, ਸਤੀਸ਼ ਕਾਲੀਆ, ਚੰਦਨ ਕੌਸ਼ਲ, ਮਦਨ ਮੋਹਨ, ਵਿਵੇਕ ਰਿੰਕਾ, ਬਿੱਟੂ, ਰਜਨੀ ਕੌਸ਼ਲ, ਮੀਨਾਕਸ਼ੀ ਨਈਅਰ, ਪਵਨ ਕੁਮਾਰ, ਸ਼ਾਮ ਮੁਰਾਰੀ, ਜੋਗੇਸ਼ ਵਰਮਾ, ਪ੍ਰਦੀਪ ਸ਼ਰਮਾ ਸਮੇਤ ਹੋਰ ਪਤਵੰਤੇ ਅਤੇ ਸ਼ਰਧਾਲੂ ਹਾਜ਼ਰ ਸਨ।