ਬਟਾਲਾ, 26 ਅਗਸਤ (ਅਵਿਨਾਸ਼ ਸ਼ਰਮਾ):

: ਬਟਾਲਾ ਵਿੱਚ ਅਚਾਨਕ ਹੋਈ ਭਾਰੀ ਬਾਰਸ਼ ਨਾਲ ਸ਼ਹਿਰ ਦੀਆਂ ਮੁੱਖ ਸੜਕਾਂ ਅਤੇ ਗਲੀਆਂ ਵਿੱਚ ਪਾਣੀ ਹੀ ਪਾਣੀ ਨਜ਼ਰ ਆਇਆ। ਕਈ ਘਰਾਂ ਵਿੱਚ ਸੀਵਰੇਜ ਦਾ ਗੰਦਾ ਪਾਣੀ ਵੜ ਗਿਆ, ਜਦਕਿ ਦੁਕਾਨਾਂ ਦੇ ਅੰਦਰ ਵੀ ਪਾਣੀ ਦਾਖਲ ਹੋਣ ਕਾਰਨ ਲੋਕਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ।

ਜ਼ਿਆਦਾ ਬਾਰਸ਼ ਕਾਰਨ ਸ਼ਹਿਰ ਦੇ ਬੀਚੋਂ ਲੰਘਣ ਵਾਲੇ ਹਸਲੀ ਨਾਲੇ ਦਾ ਪਾਣੀ ਪੁਲ ਦੇ ਉੱਪਰੀ ਹਿੱਸੇ ਤੱਕ ਪਹੁੰਚ ਗਿਆ। ਇਸ ਨਾਲ ਲੋਕਾਂ ਵਿਚ ਖੌਫ ਪੈਦਾ ਹੋ ਗਿਆ ਕਿਉਂਕਿ ਜੇ ਪਾਣੀ ਦਾ ਵਹਾਅ ਹੋਰ ਤੇਜ਼ ਹੁੰਦਾ ਤਾਂ ਬਟਾਲਾ ਸ਼ਹਿਰ ਨੂੰ ਵੱਡਾ ਨੁਕਸਾਨ ਪਹੁੰਚ ਸਕਦਾ ਸੀ।

ਇਸ ਦੌਰਾਨ ਕਾਫੀ ਲੋਕ ਹਸਲੀ ਪੁਲ ਜਲੰਧਰ ਰੋਡ ’ਤੇ ਇਕੱਠੇ ਹੋ ਕੇ ਸਥਿਤੀ ਦੇਖ ਰਹੇ ਸਨ। ਇਸ ਸੰਕਟਮਈ ਵੇਲੇ ਵਿੱਚ ਟਰੈਫ਼ਿਕ ਇੰਚਾਰਜ ਸੁਰਿੰਦਰ ਸਿੰਘ ਗੁਰਾਇਆ ਆਪਣੀ ਟੀਮ ਸਮੇਤ ਉੱਥੇ ਮੌਜੂਦ ਰਹੇ। ਉਹਨਾਂ ਨੇ ਲੋਕਾਂ ਨੂੰ ਮੋਟੀਵੇਟ ਕਰਦੇ ਹੋਏ ਕਿਹਾ ਕਿ, “ਕੋਈ ਡਰਣ ਵਾਲੀ ਗੱਲ ਨਹੀਂ। ਤੁਸੀਂ ਆਪਣੇ ਘਰਾਂ ਵਿੱਚ ਰਹੋ। ਪਾਣੀ ਦਾ ਵਹਾਅ ਕੰਟਰੋਲ ਵਿੱਚ ਹੈ ਅਤੇ ਹੌਲੀ-ਹੌਲੀ ਨੀਵੇਂ ਵਹਿੰਦਾ ਜਾ ਰਿਹਾ ਹੈ। ਪ੍ਰਸ਼ਾਸਨ ਹਰ ਵੇਲੇ ਤੁਹਾਡੇ ਨਾਲ ਕੰਧੇ ਨਾਲ ਕੰਧਾ ਮਿਲਾ ਕੇ ਖੜਾ ਹੈ।”

ਗੁਰਾਇਆ ਦੇ ਭਰੋਸੇਮੰਦ ਬਿਆਨ ਨਾਲ ਲੋਕਾਂ ਦੇ ਚਿਹਰਿਆਂ ’ਤੇ ਰਾਹਤ ਨਜ਼ਰ ਆਈ। ਪ੍ਰਸ਼ਾਸਨ ਵੱਲੋਂ ਵੀ ਪੂਰੀ ਸਥਿਤੀ ’ਤੇ ਨਜ਼ਰ ਰੱਖੀ ਜਾ ਰਹੀ ਹੈ।