ਗੁਰਦਾਸਪੁਰ(ਅਸ਼ਵਨੀ)

9 ਜਨਵਰੀ – ਪਾਕਿਸਤਾਨ ਦੇ ਨਾਪਾਕ ਮਨਸੂਬਿਆਂ ਨੂੰ ਇੱਕ ਵਾਰ ਫਿਰ ਬੀਐਸਐਫ ਜਵਾਨਾਂ ਨੇ ਅਸਫਲ ਕਰ ਦਿਤਾ। ਜਾਣਕਾਰੀ ਅਨੁਸਾਰ ਪੁਲਿਸ ਸਟੇਸ਼ਨ ਦੋਰਾਂਗਲਾ ਅਧੀਨ ਭਾਰਤ-ਪਾਕਿਸਤਾਨ ਸਰਹੱਦ ‘ਤੇ ਬੀ.ਐਸ.ਐਫ ਦੀ 58 ਬਟਾਲੀਅਨ ਦੀ ਬੀਓਪੀ ਆਦੀਆਂ ਚੌਕੀ ਨੇੜੇ ਰਾਤ ਨੂੰ ਦੋ ਵਾਰ ਪਾਕਿਸਤਾਨੀ ਡਰੋਨ ਦੀ ਮੂਵਮੈਂਟ ਦੇਖੀ ਗਈ। ਜਦੋਂ ਪਾਕਿਸਤਾਨੀ ਡਰੋਨ ਭਾਰਤੀ ਖੇਤਰ ਵਿੱਚ ਦਾਖਲ ਹੋਇਆ ਤਾਂ ਬੀਐਸਐਫ ਦੇ ਜਵਾਨਾਂ ਨੇ 76 ਰਾਉਂਡ ਫਾਇਰ ਕੀਤੇ ਅਤੇ 2 ਇਲੂ ਬੰਬ (ਰੋਸ਼ਨੀ ਵਾਲੇ ਬੰਬ) ਦਾਗੇ, ਜਿਸ ਕਾਰਨ ਇਹ ਡਰੋਨ ਮੁੜ ਪਾਕਿਸਤਾਨ ਵੱਲ ਚਲੇ ਗਏ। ਇਸ ਸਬੰਧੀ ਬੀ.ਐਸ.ਐਫ ਦੇ ਬੁਲਾਰੇ ਨੇ ਦੱਸਿਆ ਕਿ ਭਾਰਤ-ਪਾਕਿਸਤਾਨ ਸਰਹੱਦ ‘ਤੇ ਬੀ.ਪੀ.ਪੀ ਨੰਬਰ 21-23 ਵਿਖੇ ਬੀ.ਐਸ.ਐਫ 58 ਬਟਾਲੀਅਨ ਦੀ ਬੀ.ਓ.ਪੀ ਆਦੀਆਂ ਨੇੜੇ ਜਵਾਨਾਂ ਨੇ ਬੀਤੀ ਰਾਤ ਕਰੀਬ 9.35 ਤੋਂ 9.55 ਵਜੇ ਪਾਕਿਸਤਾਨ ਵਾਲੇ ਪਾਸਿਓਂ ਡਰੋਨ ਆਉਣ ਦੀ ਆਵਾਜ਼ ਸੁਣੀ ਅਤੇ ਇਹ ਆਵਾਜ਼ ਕਰੀਬ 300 ਮੀਟਰ ਦੀ ਉਚਾਈ ਤੋਂ ਆ ਰਹੀ ਸੀ, ਜਿਸ ‘ਤੇ ਜਵਾਨਾਂ ਨੇ ਪਹਿਲਾਂ 42 ਰਾਉਂਡ ਫਾਇਰ ਕੀਤੇ ਅਤੇ ਇਕ ਇਲੂ ਬੰਬ ਦਾਗਿਆ, ਜਿਸ ਤੋਂ ਬਾਅਦ ਡਰੋਨ ਪਾਕਿਸਤਾਨ ਵੱਲ ਚਲਾ ਗਿਆ। ਇਸ ਤੋਂ ਬਾਅਦ ਦੂਸਰੀ ਵਾਰ ਬੀਤੀ ਰਾਤ 10:20 ਤੋਂ 10-52 ਦੇ ਦਰਮਿਆਨ ਸੈਨਿਕਾਂ ਨੇ ਡਰੋਨ ਆਉਣ ਦੀ ਆਵਾਜ਼ ਸੁਣੀ, ਜਿਸ ‘ਤੇ ਜਵਾਨਾਂ ਨੇ 44 ਰਾਉਂਡ ਫਾਇਰਿੰਗ ਅਤੇ 1 ਇਲੂ ਬੰਬ ਦਾਗਿਆ, ਜਿਸ ਤੋਂ ਬਾਅਦ ਇਹ ਡਰੋਨ ਫਿਰ ਤੋਂ ਵਾਪਿਸ ਪਾਕਿਸਤਾਨ ਵੱਲ ਚਲਾ ਗਿਆ।ਪੁਲਿਸ ਅਤੇ ਬੀ.ਐਸ.ਐਫ ਦੇ ਜਵਾਨਾਂ ਵੱਲੋਂ ਇਸ ਇਲਾਕੇ ਵਿੱਚ ਸਵੇਰ ਤੋਂ ਹੀ ਤਲਾਸ਼ੀ ਮੁਹਿੰਮ ਚਲਾਈ ਗਈ ਪਰ ਕਿਸੇ ਵੀ ਤਰ੍ਹਾਂ ਦੀ ਸ਼ੱਕੀ ਵਸਤੂ ਨਹੀਂ ਮਿਲੀ ।