ਕਨੇਡਾ ਭੇਜਣ ਦੇ ਨਾਂ ਤੇ 30 ਲੱਖ ਦੀ ਠੱਗੀ ਦੇ ਦੋਸ਼ ਵਿਚ 4 ਵਿਅਕਤੀਆਂ ਵਿਰੁੱਧ ਮਾਮਲਾ ਦਰਜ 

ਗੁਰਦਾਸਪੁਰ 11 ਅਪ੍ਰੈਲ ( ਅਸ਼ਵਨੀ ) – ਕਨੇਡਾ ਭੇਜਣ ਦੇ ਨਾ ਤੇ 30 ਲੱਖ ਦੀ ਠੱਗੀ ਮਾਰਣ ਦੇ ਦੋਸ਼ ਵਿੱਚ ਪੁਲਿਸ ਸਟੇਸ਼ਨ ਦੋਰਾਂਗਲਾ ਦੀ ਪੁਲਿਸ ਵੱਲੋਂ ਚਾਰ ਵਿਅਕਤੀ ਦੇ ਵਿਰੁੱਧ ਮਾਮਲਾ ਦਰਜ ਕੀਤਾ ਗਿਆ ਹੈ । ਨਰਿੰਜਨ ਸਿੰਘ ਪੁੱਤਰ ਭਜਨ ਸਿੰਘ ਵਾਸੀ ਦੋਰਾਂਗਲਾ ਨੇ ਪੁਲਿਸ ਨੂੰ ਕੀਤੀ ਸ਼ਿਕਾਇਤ ਰਾਹੀ ਦੱਸਿਆ ਕਿ ਅਮਨਦੀਪ ਸਿੰਘ ਪੁੱਤਰ ਸਰਵਨ ਸਿੰਘ ਵਾਸੀ ਬਰਿਆਰ , ਵਿਸ਼ਾਲ ਪੁੱਤਰ ਅਜੈ ਕੁਮਾਰ , ਰੋਹਿਤ ਕੁਮਾਰ ਉਰਫ ਰਾਣਾ ਪੁੱਤਰ ਗੁਰਨਾਮ ਦਾਸ ਅਤੇ ਬਿਕਰਮ ਸਿੰਘ ਪੁੱਤਰ ਬ੍ਰਹਮ ਦਾਸ ਵਾਸੀਆਨ ਗੁਰਦਾਸਪੁਰ ਨੇ ਉਸ ਨੂੰ ਕਨੇਡਾ ਭੇਜਣ ਦੇ ਨਾ ਤੇ 30 ਲੱਖ ਰੁਪਏ ਲਏ ਸਨ ।ਪਰ ਉਸ ਨੂੰ ਕਨੇਡਾ ਭੇਜਣ ਦੀ ਬਜਾਏ ਅਰਮੀਨੀਆ ਅਤੇ ਜੋਰਜੀਆ ਭੇਜ ਦਿੱਤਾ ਜਿੱਥੇ ਉਹ ਅੱਠ ਮਹੀਨੇ ਖੱਜਲ ਖ਼ੁਆਰ ਹੋ ਕੇ ਵਾਪਿਸ ਭਾਰਤ ਆ ਗਿਆ । ਸਹਾਇਕ ਸਬ ਇੰਸਪੈਕਟਰ ਭੁਪਿੰਦਰ ਸਿੰਘ ਨੇ ਦੱਸਿਆ ਕਿ ਨਰਿੰਜਨ ਸਿੰਘ ਵੱਲੋਂ ਕੀਤੀ ਸ਼ਿਕਾਇਤ ਦੀ ਜਾਂਚ ਉਪ ਪੁਲਿਸ ਕਪਤਾਨ ( ਸਥਾਨਿਕ ) ਗੁਰਦਾਸਪੁਰ ਵੱਲੋਂ ਕਰਨ ਉਪਰਾਂਤ ਉਕਤ ਚਾਰ ਵਿਅਕਤੀਆਂ ਦੇ ਵਿਰੁੱਧ ਮਾਮਲਾ ਦਰਜ ਕਰਕੇ ਅੱਗੇ ਕਾਰਵਾਈ ਕੀਤੀ ਜਾ ਰਹੀ ਹੈ ।