ਗੜ੍ਹਦੀਵਾਲਾ 7 ਮਾਰਚ (ਚੌਧਰੀ ) : ਹੁਸ਼ਿਆਰਪੁਰ ਦੇ ਕਸਬਾ ਗੜ੍ਹਦੀਵਾਲਾ ਦੇ ਨਜ਼ਦੀਕ ਪੈਂਦੇ ਪਿੰਡ ਬਰਾਂਡਾ ਦੀ ਜੰਮਪਲ ਰਵਨੀਤ ਕੌਰ, ਜੋ ਕਿ 2016 ਨੂੰ ਐੱਮ.ਬੀ.ਬੀ.ਐੱਸ . ਦੀ ਪੜ੍ਹਾਈ ਕਰਨ ਵਾਸਤੇ ਖਾਰਕੀਵ ਨੈਸ਼ਨਲ ਮੈਡੀਕਲ ਯੂਨੀਵਰਸਿਟੀ ਯੂਕੋਨ ਗਈ ਹੋਈ ਸੀ, ਉਸਦੇ ਰੂਸ ਅਤੇ ਯੂਕੋਨ ਵਿਚਕਾਰ ਲੜਾਈ ‘ਚ ਫਸ ਜਾਣ ਉਪਰੰਤ ਅੱਜ ਉਸਦਾ ਆਪਣੇ ਪਿੰਡ ਬਰਾਂਡਾ ਵਿਖੇ ਪਹੁੰਚਣ ‘ਤੇ ਪਰਿਵਾਰ, ਰਿਸ਼ਤੇਦਾਰਾਂ ਅਤੇ ਪਿੰਡ ਵਾਸੀਆਂ ਵੱਲੋਂ ਖੁਸ਼ੀ ਦੇ ਮਾਹੌਲ ਵਿਚ ਨਿੱਘਾ ਸਵਾਗਤ ਕੀਤਾ ਗਿਆ। ਰਵਨੀਤ ਕੌਰ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਉਹ ਯੂਕ੍ਰੇਨ ਵਿਚ ਐੱਮ.ਬੀ.ਬੀ ਐੱਸ. ਕੋਰਸ ਦੀ 6 ਸਾਲ ਦੀ ਪੜ੍ਹਾਈ ਕਰ ਰਹੀ ਸੀ ਅਤੇ ਉਸਦਾ ਕੋਰਸ ਪੂਰੇ ਹੋਣ ਦੇ ਕੇਵਲ 2 ਮਹੀਨੇ ਹੀ ਬਚੇ ਸਨ।

ਉਸਨੇ ਦੱਸਿਆ ਕਿ 24 ਫਰਵਰੀ ਨੂੰ ਤੜਕੇ 4:30 ਵਜੇ ਜ਼ੋਰਦਾਰ ਧਮਾਕੇ ਦੀ ਆਵਾਜ਼ ਆਈ ਤਾਂ ਅਸੀਂ ਉੱਠ ਕੇ ਵੇਖਿਆ ਅਤੇ ਆਲੇ-ਦੁਆਲੇ ਫੋਨ ‘ਤੇ ਪਤਾ ਕੀਤਾ ਤਾਂ ਪਤਾ ਲੱਗਾ ਕਿ ਰੂਸ ਨੇ ਯੂਕ੍ਰੇਨ ਦੇ ਏਅਰਪੋਰਟ ‘ਤੇ ਬੌਬ ਬਲਾਸਟ ਕਰ ਦਿੱਤਾ ਹੈ। ਸਾਰੇ ਖਾਰਕੀਵ ਸ਼ਹਿਰ ਵਿਚ ਹਫੜਾ-ਦਫੜੀ ਮਚ ਗਈ। ਅਸੀਂ ਆਪਣਾ ਖਾਣ ਪੀਣ ਵਾਲਾ ਅਤੇ ਹੋਰ ਲੋੜੀਂਦਾ ਸਾਮਾਨ ਲੈ ਕੇ ਮੈਟਰੋ ਅੰਡਰ ਗਰਾਊਂਡ ‘ਚ ਚਲੇ ਗਏ ਅਤੇ ਕਾਫੀ ਦਿਨ ਅਸੀਂ ਸਹਿਮੇ ਹੋਏ ਬੰਕਰ ਵਿਚ ਹੀ ਮੁਸ਼ਕਿਲ ਦੀਆਂ ਘੜੀਆਂ ਵਿਚ ਸਮਾਂ ਬਤੀਤ ਕਰ ਰਹੇ ਸੀ। ਉਸਨੇ ਦੱਸਿਆ ਕਿ ਸਾਡੇ ਦੇਸ਼ ਦੀ ਅੰਬੈਸੀ ਨੇ ਜੇਕਰ ਲੜਾਈ ਲੱਗਣ ਤੋਂ ਪਹਿਲਾ ਹੀ ਯੂਕ੍ਰੇਨ-ਰੂਸ ਦੀ ਲੜਾਈ ਹੋਣ ਬਾਰੇ ਦੱਸ ਦਿੱਤਾ ਹੁੰਦਾ ਤਾਂ ਅਸੀਂ ਸਮੇਂ ਨਾਲ ਆਪਣੇ ਦੇਸ਼ ਆ ਜਾਂਦੇ ਅਤੇ ਸਾਨੂੰ ਮੁਸ਼ਕਿਲਾਂ ਦਾ ਸਾਹਮਣਾ ਨਹੀਂ ਕਰਨਾ ਪੈਣਾ ਸੀ। ਉਸਨੇ ਦੱਸਿਆ ਕਿ ਸਾਡੀ ਫਲਾਈਟ ਵਿਚ 150 ਤੋਂ ਜ਼ਿਆਦਾ ਵਿਅਕਤੀ ਆ ਚੁੱਕੇ ਹਨ। ਉਸਨੇ ਦੱਸਿਆ ਕਿ ਯੂਕ੍ਰੇਨ ਦੇਸ਼ ਦਾ ਨੁਕਸਾਨ ਬਹੁਤ ਹੋ ਚੁੱਕਾ ਅਤੇ ਅਜੇ ਵੀ ਲੋਕ ਗਮ ਅਤੇ ਸਹਿਮੇ ਹੋਏ ਮਾਹੌਲ ਵਿਚ ਫਸੇ ਹੋਏ ਹਨ। ਇਸ ਮੌਕੇ ਸਾਬਕਾ ਸਰਪੰਚ ਕਰਨੈਲ ਸਿੰਘ, ਗੁਰਮੀਤ ਕੌਰ, ਹਰਬੰਸ ਕੌਰ, ਸਾਬਕਾ ਸਰਪੰਚ ਜਸਵਿੰਦਰ ਕੌਰ, ਕੁਲਵਿੰਦਰ ਕੌਰ, ਜੁਗਿੰਦਰ ਕੌਰ ਆਦਿ ਹਾਜ਼ਰ ਸਨ।