ਗੜ੍ਹਸ਼ੰਕਰ, 11 ਅਗਸਤ (ਅਸ਼ਵਨੀ ਸ਼ਰਮਾ)

-ਗੜ੍ਹਸ਼ੰਕਰ ਦੇ ਨਜ਼ਦੀਕੀ ਪਿੰਡ ਸਤਨੌਰ ਵਿਖੇ ਰਾਤ ਸਮੇਂ ਇਕ ਅਲਟੋ ਕਾਰ ‘ਚੋਂ ਦੋ ਲਾਸ਼ਾਂ ਬਰਾਮਦ ਹੋਈਆਂ। ਪਿੰਡ ਸਤਨੌਰ ਵਿਖੇ ਹਲਟੀ ਵਾਲਾ ਚੌਂਕ ਕੋਲ ਦੇਰ ਸ਼ਾਮ ਇਕ ਅਲਟੋ ਕਾਰ ਨੰਬਰ ਪੀ.ਬੀ. 11 ਬੀ.ਆਰ. 6250 ਖੜ੍ਹੀ ਵੇਖੀ ਗਈ। ਕਰੀਬ 2 ਘੰਟੇ ਦੇ ਕਰੀਬ ਖੜ੍ਹੀ ਰਹੀ ਕਾਰ ਨੂੰ ਦੇਖ ਕੇ ਜਦੋਂ ਪਿੰਡ ਦੇ ਲੋਕਾਂ ਨੂੰ ਸ਼ੱਕ ਹੋਇਆ ਤਾਂ ਦੇਖਣ ‘ਤੇ ਕਾਰ ਵਿਚ ਡਰਾਈਵਰ ਸੀਟ ‘ਤੇ ਇਕ ਵਿਅਕਤੀ ਤੇ ਨਾਲ ਦੀ ਸੀਟ ‘ਤੇ ਇਕ ਔਰਤ ਨੂੰ ਗੁੰਮਸੁੰਮ ਹਾਲਤ ‘ਚ ਦੇਖਣ ਤੋਂ ਬਾਅਦ ਪਿੰਡ ਦੇ ਲੋਕਾਂ ਨੇ ਪੁਲਿਸ ਨੂੰ ਸੂਚਿਤ ਕੀਤਾ। ਇਸ ਦੌਰਾਨ ਐੱਸ.ਐੱਚ.ਓ. ਗੜ੍ਹਸ਼ੰਕਰ ਇੰਸਪੈਕਟਰ ਗਗਨਦੀਪ ਸਿੰਘ ਸੇਖੋਂ ਵਲੋਂ ਜਦੋਂ ਮੌਕੇ ‘ਤੇ ਪਹੁੰਚ ਕੇ ਦੇਖਿਆ ਤਾਂ ਲੜਕੇ ਤੇ ਔਰਤ ਦੋਵੇਂ ਮਰੇ ਪਏ ਸਨ। ਦੋਵੇਂ ਗੜ੍ਹਸ਼ੰਕਰ ਦੇ ਪਿੰਡ ਪਦਰਾਣਾ ਨੇ ਵਸਨੀਕ ਦੱਸੇ ਜਾ ਰਹੇ ਹਨ, ਜਿਨ੍ਹਾਂ ‘ਚ ਵਿਅਕਤੀ ਦੀ ਪਛਾਣ ਦਲਵੀਰ ਸਿੰਘ (35) ਪੁੱਤਰ ਅਵਤਾਰ ਸਿੰਘ ਤੇ ਔਰਤ ਦੀ ਪਛਾਣ ਰਜਨੀ (36) (ਵਿਆਹੁਤਾ) ਵਜੋਂ ਦੱਸੀ ਜਾ ਰਹੀ ਹੈ। ਦੋਵਾਂ ਦੀ ਮੌਤ ਪਿੱਛੇ ਹੋਰ ਕੀ ਕਾਰਨ ਹਨ, ਇਹ ਪੋਸਟਮਾਰਟਮ ਦੀ ਰਿਪੋਰਟ ਆਉਣ ਤੋਂ ਬਾਅਦ ਹੀ ਸਪੱਸ਼ਟ ਕੀਤਾ ਜਾਵੇਗਾ। ਮਾਮਲਾ ਨਾਜਾਇਜ਼ ਸਬੰਧਾਂ ਨਾਲ ਜੁੜੇ ਹੋਣ ਦਾ ਸ਼ੱਕ ਜਤਾਇਆ ਜਾ ਰਿਹਾ ਹੈ। ਫਿਲਹਾਲ ਪੁਲਿਸ ਵਲੋਂ ਲਾਸ਼ਾਂ ਨੂੰ ਕਬਜ਼ੇ ‘ਚ ਲੈ ਕੇ ਜਾਂਚ ਕੀਤੀ ਜਾ ਰਹੀ ਹੈ।