ਦਸੂਹਾ 8 ਫਰਵਰੀ (ਚੌਧਰੀ) : ਸੀਨੀਅਰ ਸਿਟੀਜ਼ਨਜ਼ ਵੈਲਫੇਅਰ ਐਸੋਸੀਏਸ਼ਨ ਰਜਿ. ਦਸੂਹਾ ਦੇ ਸਕੱਤਰ ਜਰਨਲ ਚੌ. ਕੁਮਾਰ ਸੈਣੀ ਨੇ ਗੱਲਬਾਤ ਕਰਦਿਆ ਦੱਸਿਆ ਕਿ ਆਉਣ ਵਾਲੀਆਂ ਪੰਜਾਬ ਵਿਧਾਨ ਸਭਾ ਚੋਣਾਂ ਵਿੱਚ ਰਾਜਨੀਤੀਕ ਉਮੀਦਵਾਰਾਂ ਨੂੰ ਬਹੁਤ ਭਖਵੇਂ ਮਸਲਿਆਂ ਤੇ ਆਮ ਲੋਕਾਂ ਵੱਲੋ ਪੁੱਛੇ ਜਾਣ ਵਾਲੇ ਸਵਾਲਾਂ ਤੇ ਬਹੁਤ ਦਿੱਕਤ ਆ ਰਹੀ ਹੈ। ਆਮ ਲੋਕਾਂ ਵੱਲੋ ਉਹਨਾ ਤੋ ਪੁੱਛਿਆ ਜਾ ਰਿਹਾ ਹੈ ਕਿ ਉਹ ਪੰਜਾਬ ਦੀ ਵਿਗੜੀ ਹੋਈ ਆਰਥਿਕ ਸਥਿਤੀ (ਜਿਸ ਵਿਚ 3 ਲੱਖ ਕਰੋੜ ਦੇ ਲਗਭਗ ਕਰਜਾ ਹੈ) ਨੂੰ ਕਿਵੇਂ ਸੁਧਾਰਨਗੇ। ਉਹ ਕਿਵੇਂ ਪੰਜਾਬ ਅੰਦਰ ਡਰੱਗ ਮਾਫੀਆ, ਲੈਂਡ ਮਾਫੀਆ, ਮਾਈਨਿੰਗ ਮਾਫੀਆ ਅਤੇ ਕੁਦਰਤੀ ਵਸੀਲਿਆਂ ਜਿਵੇਂ ਕਿ ਪੰਜਾਬ ਵਿੱਚ ਘਟ ਰਹੇ ਪਾਣੀ ਦਾ ਸਤਰ ਅਤੇ ਪ੍ਰਦੂਸ਼ਿਤ ਵਾਤਾਵਰਨ ਨੂੰ ਕਿਵੇਂ ਸੁਧਾਰਨਗੇ। ਉਹਨਾਂ ਨੇ ਇਹ ਵੀ ਕਿਹਾ ਕਿ ਲੋਕ ਪੁੱਛਦੇ ਹਨ ਕਿ ਉਮੀਦਵਾਰ ਦਾ ਅਤੇ ਉਹਨਾਂ ਦੀ ਪਾਰਟੀ ਦਾ ਇਸ ਇਲਾਕੇ ਦੇ ਵਿਕਾਸ ਲਈ ਕੀ ਰੋਡ ਮੈਪ ਹੈ। ਇਹ ਸਾਰੇ ਸਵਾਲਾਂ ਦਾ ਉਮੀਦਵਾਰਾਂ ਵੱਲੋਂ ਕੋਈ ਰਚਨਾਤਮਕ ਜਵਾਬ ਨਹੀ ਦਿੱਤਾ ਜਾ ਰਿਹਾ। ਆਮ ਵੋਟਰ ਅਜੇ ਤੱਕ ਵੋਟ ਕਰਨ ਦੇ ਫੈਸਲੇ ਬਾਰੇ ਸੋਚ ਰਹੇ ਹਨ। ਇਹ ਪਹਿਲੀ ਵਾਰ ਹੈ ਜਦੋਂ ਹਰ ਵਿਧਾਨ ਸਭਾ ਵਿਚ ਪਾਰਟੀਆਂ ਦੇ ਪੰਜ ਤੋਂ ਵੱਧ ਉਮੀਦਵਾਰਾਂ ਦੇ ਨਾਲ ਨਾਲ ਅਜਾਦ ਉਮੀਦਵਾਰ ਵੀ ਹਨ। ਇਸ ਕਰਕੇ ਇਸ ਵਾਰ ਚੋਣ ਮੁਕਾਬਲਾ ਬੜਾ ਸਖ਼ਤ ਹੋਣ ਜਾ ਰਿਹਾ ਹੈ ਅਤੇ ਜਿੱਤ ਹਾਰ ਦਾ ਨਤੀਜਾ ਚੰਦ ਵੋਟਾਂ ਨਾਲ ਹੋ ਸਕਦਾ ਹੈ। ਇਸ ਕਰਕੇ ਇਸ ਵਾਰ ਸਾਰੇ ਪੰਜਾਬੀਆਂ ਨੂੰ ਬਹੁਤ ਸੋਚ ਸਮਝ ਨਾਲ ਫੈਸਲਾ ਕਰਨਾ ਚਾਹੀਦਾ ਹੈ ਕਿਉਂਕਿ ਉਹਨਾਂ ਦੀ ਇਕ ਵੋਟ ਨਾਲ ਵੀ ਵਿਧਾਨ ਸਭਾ ਹਲਕੇ ਦੀ ਤਕਦੀਰ ਬਦਲ ਸਕਦੀ ਹੈ। ਇਸ ਮੌਕੇ ਤੇ ਹੋਰਨਾਂ ਤੋਂ ਇਲਾਵਾ ਰਿਟਾਇਰ ਪ੍ਰਿੰਸੀਪਲ ਸਤੀਸ਼ ਕਾਲੀਆ, ਅਨਿਲ ਕੁਮਾਰ, ਬ੍ਰਹਮ ਰੱਲ੍ਹਣ ਅਤੇ ਭੁਪਿੰਦਰ ਰੰਜਨ ਆਦਿ ਹਾਜ਼ਰ ਸਨ।