ਫਗਵਾੜਾ  (ਲਾਲੀ ਦਾਦਰ )

20 ਮਈ : ਫਗਵਾੜਾ ਦੇ ਨਜਦੀਕੀ ਪਿੰਡ ਅਕਾਲਗੜ੍ਹ ਦੇ ਵਸਨੀਕ ਇਕ ਨੌਜਵਾਨ ਦੀ ਅੱਜ ਸਵੇਰੇ ਸੜਕ ਹਾਦਸੇ ਵਿਚ ਮੌਤ ਹੋਣ ਦਾ ਸਮਾਚਾਰ ਮਿਲਿਆ ਹੈ। ਮਿ੍ਰਤਕ ਦੀ ਪਹਿਚਾਣ ਸੁਖਵਿੰਦਰ ਪਾਲ ਉਰਫ ਲਾਡੀ (45) ਪੁੱਤਰ ਮੋਹਨ ਲਾਲ ਵਾਸੀ ਪਿੰਡ ਅਕਾਲਗੜ੍ਹ ਤਹਿਸੀਲ ਫਗਵਾੜਾ ਜਿਲ੍ਹਾ ਕਪੂਰਥਲਾ ਵਜੋਂ ਹੋਈ ਹੈ। ਮੌਕੇ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਹਾਦਸੇ ਦਾ ਸ਼ਿਕਾਰ ਹੋਇਆ ਨੌਜਵਾਨ ਪਿੰਡ ਸੰਗਤਪੁਰ ਸਾਈਡ ਤੋਂ ਆਪਣੇ ਘਰ ਪਿੰਡ ਅਕਾਲਗੜ੍ਹ ਨੂੰ ਪੈਦਲ ਆ ਰਿਹਾ ਸੀ ਤਾਂ ਉਸਨੇ ਇਕ ਮੋਟਰਸਾਇਕਲ ਸਵਾਰ ਤੋਂ ਲਿਫਟ ਲੈ ਲਈ। ਜਦੋਂ ਮੋਟਰਸਾਇਕਲ ਸੰਗਤਪੁਰ-ਵਰਿਆਹਾਂ ਰੋਡ ਸਥਿਤ ਇਕ ਜੈਡ ਮੋੜ ਤੋਂ ਨਿਕਲ ਰਿਹਾ ਸੀ ਤਾਂ ਮੋਟਰਸਾਇਕਲ ਦੇ ਪਿੱਛੇ ਬੈਠਾ ਸੁਖਵਿੰਦਰ ਪਾਲ ਉਰਫ ਲਾਡੀ ਸੰਤੁਲਨ ਵਿਗੜਨ ਨਾਲ ਮੋਟਰਸਾਇਕਲ ਤੋਂ ਡਿੱਗਦੇ ਹੋਏ ਨਜਦੀਕ ਤੋਂ ਲੰਘ ਰਹੀ ਇਕ ਪ੍ਰਾਈਵੇਟ ਸਕੂਲ ਦੀ ਬੱਸ ਨੰਬਰ ਪੀਬੀ 07 ਏ ਐਸ 4917 ਦੇ ਬੰਪਰ ਨਾਲ ਟਕਰਾ ਗਿਆ। ਜਿਸ ਨਾਲ ਉਸਦੇ ਸਿਰ ਵਿਚ ਸੱਟ ਲੱਗੀ ਅਤੇ ਮੌਕੇ ਤੇ ਹੀ ਮੌਤ ਹੋ ਗਈ। ਪੁਲਿਸ ਨੇ ਦੋਹਾਂ ਧਿਰਾਂ ਦੇ ਬਿਆਨ ਹਾਸਲ ਕਰਕੇ 174 ਦੀ ਕਾਰਵਾਈ ਕਰ ਦਿੱਤੀ ਹੈ।