ਗੜ੍ਹਸ਼ੰਕਰ (ਜਤਿੰਦਰ ਪਾਲ ਸਿੰਘ ਕਲੇਰ )

ਪੀਣ ਵਾਲੇ ਪਾਣੀ ਤੋਂ ਪਿਆਸੇ ਬੀਤ ਵਾਸੀਆਂ ਨੇ ਮਲਕੋਵਾਲ ਵਾਟਰ ਸਪਲਾਈ ਸਕੀਮ ਅਗੇ ਕੀਤੀ ਨਾਰੇਬਾਜੀ

4 ਅਗਸਤ : ਅਜ ਇਥੇ ਤਹਿਸੀਲ ਗੜ੍ਹਸ਼ੰਕਰ ਅਧੀਨ ਪੈਂਦੇ ਇਲਾਕਾ ਬੀਤ ਦੇ ਪਿੰਡ ਮਲਕੋਵਾਲ, ਨਾਨੋਵਾਲ, ਕਾਣੇਵਾਲ, ਰਤਨਪੁਰ, ਭਵਾਨੀਪੁਰ ਭਗਤਾਂ, ਗੱਦੀਵਾਲ, ਝੋਨੋਵਾਲ ਦੇ ਵਾਸੀਆਂ ਵਲੋਂ ਪਿਛਲੇ ਨੋਂ ਦਿਨਾਂ ਤੋਂ ਪੀਣ ਵਾਲੇ ਪਾਣੀ ਨਾਂ ਮਿਲਣ ਕਾਰਨ ਜਲ ਸਪਲਾਈ ਸਕੀਮ ਮਲਕੋਵਾਲ ਵਿਖੇ ਪਹੁੰਚ ਕੇ ਮਹਿਕਮੇ ਦੇ ਅਧਿਕਾਰੀਆਂ ਅਤੇ ਪੰਜਾਬ ਸਰਕਾਰ ਖਿਲਾਫ਼ ਜਬਰਦਸਤ ਨਾਅਰੇਵਾਜੀ ਕੀਤੀ ਗਈ। ਇਸ ਮੌਕੇ ਤੇ ਸੰਬੋਧਨ ਕਰਦਿਆਂ ਕਾਮਰੇਡ ਰਾਮਜੀ ਦਾਸ ਚੌਹਾਨ, ਅਜੈਬ ਸਿੰਘ ਬੋਪਾਰਾਏ ਜੱਟ ਮਹਾ ਸਭਾ, ਸਰਪੰਚ ਪਰਵੇਸ ਕੁਮਾਰ, ਅਕਾਲੀ ਦਲ ਆਗੂ ਅਵਤਾਰ ਸਿੰਘ, ਸਰਪੰਚ ਜਸਪਾਲ, ਸਰਪੰਚ ਸੁਰਿੰਦਰ ਪਾਲ ਨੇ ਦਸਿਆ ਕਿ ਪਿੰਡ ਮਲਕੋਵਾਲ ਦੀ ਇਹ ਵਾਟਰ ਸਪਲਾਈ ਦੀ ਸਕੀਮ ਜੋ ਲਗਭਗ 8 ਪਿੰਡਾਂ ਨੂੰ ਪਾਣੀ ਦੀ ਸਪਲਾਈ ਕਰਦੀ ਹੈ ਪਿਛਲੇ ਮਹੀਨੇ ਦੀ 28 ਤਾਰੀਕ ਤੋਂ ਖਰਾਬ ਪਈ ਹੈ 27 ਜੁਲਾਈ ਤੋਂ ਬਾਅਦ ਉਕਤ ਪਿੰਡਾਂ ਨੂੰ ਪੀਣ ਵਾਲਾ ਪਾਣੀ ਨਸੀਬ ਨਹੀਂ ਹੋਇਆ ਲੋਕ ਪਾਣੀ ਦੀ ਬੂੰਦ ਬੂੰਦ ਨੂੰ ਤਰਸ ਰਹੇ ਹਨ। ਪੰਜਾਬ ਸਰਕਾਰ ਦੀ ਬੇਧਿਆਨੀ ਅਤੇ ਮਹਿਕਮੇ ਦੇ ਅਧਿਕਾਰੀਆਂ ਦੀ ਘਟੀਆ ਕਾਰਗੁਜ਼ਾਰੀ ਦਾ ਸੰਤਾਪ ਇਲਾਕਾ ਬੀਤ ਦੇ ਉਕਤ ਪਿੰਡਾਂ ਦੇ ਲੋਕ ਭੋਗ ਰਹੇ ਹਨ ਜਲ ਸਪਲਾਈ ਦੇ ਅਧਿਕਾਰੀਆਂ ਵਲੋਂ ਟਿਊਬਵੈਲ ਨੂੰ ਜਲਦੀ ਠੀਕ ਕਰਵਾ ਕੇ ਚਾਲੂ ਕਰਵਾਉਣ ਲਈ ਨਾ ਤਾਂ ਸੰਜੀਦਾ ਯਤਨ ਕੀਤੇ ਜਾ ਰਹੇ ਹਨ ਅਤੇ ਨਾ ਹੀ ਪਿੰਡਾਂ ਵਿੱਚ ਟੈਕਰਾ ਰਾਹੀਂ ਪਾਣੀ ਦੀ ਸਪਲਾਈ ਦਿੱਤੀ ਜਾ ਰਹੀ ਉਕਤ ਆਗੂਆਂ ਨੇ ਚਿੰਤਾਵਨੀ ਦਿੰਦਿਆਂ ਕਿਹਾ ਕਿ ਜੇਕਰ ਕਲ ਮਿਤੀ 5 ਅਗਸਤ ਤਕ ਪਾਣੀ ਦੀ ਸਪਲਾਈ ਨਾ ਚਾਲੂ ਕੀਤੀ ਗਈ ਤਾਂ ਗੜ੍ਹਸ਼ੰਕਰ ਵਿਖੇ ਜਾਮ ਲਗਾਇਆ ਜਾਵੇਗਾ ਅਤੇ ਵਿਭਾਗ ਦੇ ਅਧਿਕਾਰੀਆਂ ਦਾ ਘਿਰਾਓ ਕੀਤਾ ਜਾਵੇਗਾ ।