ਜਲੰਧਰ(ਸਤੀਸ਼ ਜੌੜਾ)
ਵੱਖ ਵੱਖ ਸੰਸਥਾਵਾਂ ਵੱਲੋਂ ਕੀਤਾ ਗਿਆ ਨਿੱਘਾ ਸਵਾਗਤ
ਪੰਜਾਬ ਭਵਨ ਸਰੀ ਕੈਨੇਡਾ ਦਾ ਮੁੱਖ ਟੀਚਾ ਵਿਦੇਸ਼ਾ ਵਿੱਚ ਪੰਜਾਬੀਅਤ ਦਾ ਝੰਡਾ ਬੁਲੰਦ ਰੱਖਣਾ ਅਤੇ ਵਿਦੇਸ਼ਾ ‘ਚ ਵੱਸਦੀ ਨੌਜਵਾਨ ਪੀੜ੍ਹੀ ਨੂੰ ਪੰਜਾਬੀ ਨਾਲ ਜੋੜਨ ਦੇ ਯਤਨ ਕਰਨਾ ਤਾਂ ਕਿ ਪੰਜਾਬੀ ਨੌਜਵਾਨ ਪੀੜ੍ਹੀ ਅਗਰੇਜ਼ੀ ਤੇ ਹੋਰ ਭਸ਼ਾਵਾਂ ਦੀ ਗੁਲਾਮ ਬਣਕੇ ਨਾ ਰਹਿ ਜਾਵੇ : ਸੁੱਖੀ ਬਾਠ
15 ਜੂਨ : ਪੰਜਾਬ ਭਵਨ ਸਰੀ ਕੈਨੇਡਾ ਦੇ ਸੰਸਥਾਪਕ ਅਤੇ ਸਰੀ ਦੇ ਪ੍ਰਸਿੱਧ ਵਿਜ਼ਨਸਮੈਨ ਸ਼੍ਰੀ ਸੁੱਖੀ ਬਾਠ ਆਪਣੇ ਕੁਝ ਦਿਨਾਂ ਦੇ ਪੰਜਾਬ ਦੌਰੇ ਤੇ ਹਨ।ਬੀਤੇ ਦਿਨੀਂ ਉਨ੍ਹਾ ਦਾ ਭੋਗਪੁਰ ਪੁੱਜਣ ਤੇ ਸਮਾਜਿਕ ਅਤੇ ਸਾਹਿਤਕ ਸ਼ਖਸੀਅਤਾ ਵੱਲੋਂ ਨਿੱਘਾ ਸਵਾਗਤ ਕੀਤਾ ਗਿਆ।
ਇਸ ਮੌਕੇ ਤੇ ਉਨ੍ਹਾ ਨੇ ਪ੍ਰੈਸ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਸਿਰਜਣਾ ਕੇਂਦਰ (ਰਜਿ:) ਕਪੂਰਥਲਾ ਵਲੋਂ 18 ਜੂਨ ਨੂੰ ਵਿਰਸਾ ਬਿਹਾਰ ਕਪੂਰਥਲਾ ਵਿਖੇ ਸਿਰਜਣਾ ਕੇਂਦਰ ਦੇ ਮਰਹੂਮ ਕਲਮਕਾਰਾਂ ਦੀ ਯਾਦ ਨੂੰ ਸਮਰਪਿਤ ਵਿਸ਼ੇਸ਼ ਸਾਹਿਤਕ ਸਮਾਗਮ ਪੰਜਾਬ ਭਵਨ ਸਰੀ ਕੈਨੇਡਾ ਦੇ ਸਹਿਯੋਗ ਨਾਲ ਕਰਵਾਇਆ ਜਾ ਰਿਹਾ ਹੈ ਜਿੱਥੇ ਉਹ ਬਤੌਰ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕਰਨਗੇ। ਉਨ੍ਹਾ ਦੱਸਿਆ ਕਿ ਪੰਜਾਬ ਭਵਨ ਸਰੀ ਕੈਨੇਡਾ ਪੂਰੀ ਦੁਨੀਆਂ ‘ਚ ਕੰਮ ਕਰ ਰਹੀਆਂ ਉਨ੍ਹਾ ਸਾਹਿਤਕ ਸੰਸਥਾਵਾਂ ਨੂੰ ਸਮਰਪਿਤ ਹੈ ਜਿਨ੍ਹਾਂ ਨੇ ਵੱਖ ਵੱਖ ਦੇਸ਼ਾਂ ਵਿੱਚ ਪੰਜਾਬੀਅਤ ਦਾ ਝੰਡਾ ਬੁਲੰਦ ਰੱਖਣ ਅਤੇ ਮਾਂ ਬੋਲੀ ਪੰਜਾਬੀ ਦੇ ਪ੍ਰਸਾਰ ਤੇ ਪ੍ਰਚਾਰ ਲਈ ਯਤਨਸ਼ੀਲ ਹਨ।
ਸੁੱਖੀ ਬਾਠ ਨੇ ਦੱਸਿਆ ਕਿ ਦੁਨੀਆ ਦੇ ਕਿਸੇ ਵੀ ਕੋਨੇ ਵਿੱਚ ਵੱਸਦੇ ਪੰਜਾਬੀ ਭਾਈਚਾਰੇ ਦੇ ਲੋਕਾਂ ਵੱਲੋਂ ਸਾਹਿਤਕ ਸੰਸਥਾਵਾਂ ਰਾਹੀਂ ਕਰਵਾਏ ਜਾਂਦੇ ਪ੍ਰੋਗਰਾਮਾਂ ਲਈ ਸਹਿਯੋਗ ਦੀ ਮੰਗ ਕੀਤੀ ਜਾਂਦੀ ਹੈ ਤਾਂ ਉਹ ਕਦੇ ਵੀ ਪਿੱਛੇ ਨਹੀਂ ਹਟਦੇ ਸਗੋਂ ਜਦੋਂ ਵੀ ਸਾਹਿਤਕ ਆਗੂਆਂ ਵੱਲੋਂ ਉਨ੍ਹਾ ਨੂੰ ਯਾਦ ਕੀਤਾ ਜਾਂਦਾ ਹੈ ਤਾਂ ਉਹ ਉਚੇਚੇ ਤੌਰ ਤੇ ਪੁੱਜਦੇ ਹਨ।ਸੁੱਖੀ ਬਾਠ ਦਾ ਕਹਿਣਾ ਹੈ ਕਿ ਵਿਦੇਸ਼ਾਂ ਵਿੱਚ ਵੱਸਦੀ ਨੌਜਵਾਨ ਪੀੜ੍ਹੀ ਨੂੰ ਪੰਜਾਬੀ ਨਾਲ ਜੋੜੀ ਰੱਖਣ ਲਈ ਸਾਹਿਤਕ ਸਮਾਗਮਾਂ ਦੀ ਮੁੱਖ ਲੋੜ ਹੈ ਤਾਂ ਕਿ ਸਾਡੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਵਿਦੇਸ਼ਾਂ ਵਿੱਚ ਇੰਗਲਿਸ਼ ਅਤੇ ਹੋਰ ਭਸ਼ਾਵਾਂ ਦੀਆਂ ਗੁਲਾਮ ਬਣ ਕੇ ਨਾ ਰਹਿ ਜਾਣ।
ਉਨ੍ਹਾ ਦੱਸਿਆ ਕਿ ਸਰੀ (ਕੈਨੇਡਾ) ‘ਚ ਪੰਜਾਬ ਭਵਨ ਨੂੰ ਸਥਾਪਿਤ ਕਰਨ ਦਾ ਮੁੱਖ ਟੀਚਾ ਹੀ ਇਹ ਹੈ ਕਿ ਵਿਦੇਸ਼ਾਂ ਵਿੱਚ ਸਾਡੀ ਨੌਜਵਾਨ ਪੀੜੀ ਅੰਗਰੇਜ਼ੀ ਤਾਂ ਜੀ ਸਦਕੇ ਬੋਲੇ ਪਰ ਪੰਜਾਬੀ ਭੁੱਲਣ ਦਾ ਯਤਨ ਨਾ ਕਰੇ।
ਸੁੱਖੀ ਬਾਠ ਨੇ ਵਿਦੇਸ਼ਾਂ ਵਿੱਚ ਵਸਦੇ ਪੰਜਾਬੀ ਭਾਈਚਾਰੇ ਦੇ ਲੋਕਾਂ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਉਹ ਆਪਣੇ ਬੱਚਿਆਂ ਨੂੰ ਭਾਵੇਂ ਉਹ ਪੰਜਾਬ ਤੋਂ ਆਏ ਹਨ ਜਾਂ ਵਿਦੇਸ਼ਾ ਵਿੱਚ ਜਨਮ ਰਹੇ ਹਨ ਉਨ੍ਹਾਂ ਨੂੰ ਪੰਜਾਬੀ ਨਾਲ ਜੋੜਨ ਲਈ ਉਚੇਚੇ ਯਤਨ ਕਰਨ।
ਇਸ ਮੌਕੇ ਤੇ ਭੋਗਪੁਰ ਪੁੱਜਣ ਤੇ ਸਤੀਸ਼ ਜੌੜਾ , ਹਰਦੀਪ ਸਿੰਘ ਮਾਨ, ਅੰਗਰੇਜ ਸਿੰਘ ਅਤੇ ਹੋਰ ਕਈ ਆਗੂਆਂ ਵੱਲੋਂ ਸੁੱਖੀ ਬਾਠ ਜੀ ਨੂੰ ਨਿੱਘੀ ਜੀ ਆਇਆ ਆਖਿਆ ਅਤੇ ਉਨ੍ਹਾ ਦਾ ਭਰਪੂਰ ਸਵਾਗਤ ਕੀਤਾ।
