ਗੜ੍ਹਦੀਵਾਲਾ (ਚੌਧਰੀ / ਯੋਗੇਸ਼ ਗੁਪਤਾ )12 ਦਸੰਬਰ 

*ਅਮਰੀਕ ਡੋਗਰਾ ਦੀ ਪੁਸਤਕ ਦਾ ਲੋਕ ਅਰਪਨ ਸਮਾਗਮ 15 ਦਸੰਬਰ ਨੂੰ*

: ਸਾਹਿਤ ਸਭਾ ਦਸੂਹਾ ਗੜ੍ਹਦੀਵਾਲਾ(ਰਜਿ.) ਦੀ ਮਾਸਿਕ ਮੀਟਿੰਗ ਜਰਨੈਲ ਸਿੰਘ ਘੁੰਮਣ ਦੀ ਪ੍ਰਧਾਨਗੀ ਹੇਠ ਹੋਈ । ਮੀਟਿੰਗ ਵਿੱਚ ਫੈਸਲਾ ਕੀਤਾ ਗਿਆ ਕਿ ਸ਼ਾਇਰ ਅਮਰੀਕ ਡੋਗਰਾ ਦੀ ਪੁਸਤਕ “ ਮੇਰੀਆਂ ਧੁੱਪਾਂ ਮੇਰੀਆਂ ਛਾਵਾਂ “ ਦਾ ਲੋਕ ਅਰਪਨ ਸਮਾਗਮ ਅਤੇ ਵਿਚਾਰ ਚਰਚਾ 15 ਦਸੰਬਰ 2023 ਨੂੰ ਖਾਲਸਾ ਕਾਲਜ ਗੜ੍ਹਦੀਵਾਲਾ ਵਿਖੇ ਕਰਵਾਇਆ ਜਾਵੇਗਾ । ਇਸ ਸਮਾਗਮ ਦੇ ਪ੍ਰਧਾਨਗੀ ਮੰਡਲ ਵਿੱਚ ਡਾ.ਜਸਪਾਲ ਸਿੰਘ,ਡਾ.ਹਰਜਿੰਦਰ ਸਿੰਘ ਅਟਵਾਲ, ਡਾ.ਗੋਪਾਲ ਸਿੰਘ ਬੁੱਟਰ, ਸਰਜੀਤ ਜੱਜ ,ਬਲਦੇਵ ਬੱਧਣ ਅਤੇ ਪ੍ਰੋ. ਜੇ.ਬੀ.ਸੇਖੋਂ ਸ਼ਾਮਲ ਹੋਣਗੇ । ਇਸ ਸਮਾਗਮ ਸਹਿਤ ਸਭਾ ਦਸੂਹਾ-ਗੜ੍ਹਦੀਵਾਲਾ (ਰਜਿ.), ਪੋਸਟ ਗਰੈਜੂਏਟ ਪੰਜਾਬੀ ਵਿਭਾਗ ਖਾਲਸਾ ਕਾਲਜ ਗੜ੍ਹਦੀਵਾਲਾ ਅਤੇ ਪ੍ਰਗਤੀਸ਼ੀਲ ਲੇਖਕ ਸੰਘ ਵੱਲੋਂ ਮਿਲ ਕੇ ਉਲੀਕਿਆ ਗਿਆ ਹੈ । ਮੀਟਿੰਗ ਵਿੱਚ ਹੋਈ ਵਿਚਾਰ ਚਰਚਾ ਵਿੱਚ ਭਾਗ ਲੈਂਦਿਆਂ ਕਹਾਣੀਕਾਰ ਲਾਲ ਸਿੰਘ ਨੇ ਕਿਹਾ ਕਿ ਅਮਰੀਕ ਡੋਗਰਾ ਦੀ ਗ਼ਜ਼ਲ ਦੀ ਸੂਖਮਤਾ, ਰੂਪਕ ਪੱਖ, ਜ਼ੁਬਾਨ ਦੀ ਸੁਹਜਤਾ, ਕਵਿਤਾ ਵਿਚਲੀ ਸੰਗੀਤਾਮਿਕਤਾ ਅਤੇ ਭਾਸ਼ਾ ਦਾ ਗਿਆਨ ਬਾਕਮਾਲ ਹੈ । ਸਮੁੱਚੇ ਸਾਹਿਤ ਵਿੱਚ ਗਜ਼ਲ ਦੇ ਸਥਾਨ ਸਰੋਤਿਆਂ ਦੀ ਸਭ ਤੋਂ ਨੇੜੇ ਦੀ ਸਿਨਫ ਹੈ ਅਤੇ ਅਮਰੀਕ ਡੋਗਰਾ ਪੰਜਾਬੀ ਗਜ਼ਲ ਦੇ ਸੰਦਰਭ ਵਿੱਚ, ਉੱਤਮ ਸ਼ਾਇਰਾਂ ਵਿੱਚ ਸ਼ਾਮਿਲ ਹੈ । ਉਹਨਾ ਕਿਹਾ ਕਿ ਅਮਰੀਕ ਡੋਗਰਾ ਨੇ ਗ਼ਜ਼ਲ ਦੀ ਰਚਨਾ ਕਰਨ ਦੇ ਕਾਰਜ ਨੂੰ ਇੱਕ ਚੈਲਿੰਜ ਵਜੋਂ ਕਬੂਲ ਕਰਕੇ ਇਸ ਖੇਤਰ ਵਿਚ ਲਗਨ, ਮਿਹਨਤ ਅਤੇ ਦ੍ਰਿੜਤਾ ਨਾਲ ਸ਼ਾਹਕਾਰ ਰਚਨਾਵਾਂ ਪੇਸ਼ ਕੀਤੀਆਂ ਹਨ । ਪ੍ਰੋ.ਬਲਦੇਵ ਸਿੰਘ ਬੱਲੀ, ਨਵਤੇਜ ਗੜ੍ਹਦੀਵਾਲਾ ਅਤੇ ਸੁਰਿੰਦਰ ਸਿੰਘ ਨੇਕੀ ਵੀ ਇਸ ਵਿਚਾਰ ਚਰਚਾ ਵਿੱਚ ਭਾਗ ਲਿਆ ਅਤੇ ਸ਼ਾਇਰ ਅਮਰੀਕ ਡੋਗਰਾ ਦੀ ਸਮੁੱਚੀ ਸ਼ਾਇਰੀ ਬਾਰੇ ਆਪਣੇ ਵਿਚਾਰ ਪੇਸ਼ ਕੀਤੇ ।ਇਸ ਮੀਟਿੰਗ ਵਿੱਚ ਪਿਛਲੇ ਦਿਨੀ ਨਵਤੇਜ ਗੜ੍ਹਦੀਵਾਲਾ ਦੀ ਪੁਸਤਕ “ਅੰਮ੍ਰਿਤ ਕਾਲ ਤੱਕ” ਲੋਕ ਅਰਪਨ ਤੇ ਨਵਤੇਜ ਗੜ੍ਹਦੀਵਾਲਾ ਨੂੰ ਵਧਾਈ ਦਿੱਤੀ ਗਈ ।ਰਚਨਾਵਾਂ ਦੇ ਦੌਰ ਵਿੱਚ ਅਮਰੀਕ ਡੋਗਰਾ, ਨਵਤੇਜ ਗੜ੍ਹਦੀਵਾਲਾ , ਬਲਦੇਵ ਸਿੰਘ ਬੱਲੀ ਅਤੇ ਜਰਨੈਲ ਸਿੰਘ ਘੁੰਮਣ ਨੇ ਆਪਣੀਆਂ ਕਾਵਿਮਈ ਰਚਨਾਵਾਂ ਪੇਸ਼ ਕੀਤੀਆਂ ।