ਫਗਵਾੜਾ (ਲਾਲੀ ਦਾਦਰ) 

25 ਜੁਲਾਈ : ਫਗਵਾੜਾ ਦੇ ਪੇਂਡੂ ਇਲਾਕਿਆਂ ‘ਚ ਇਕ ਤੋਂ ਬਾਅਦ ਇੱਕ ਸਾਹਮਣੇ ਆ ਰਹੀਆਂ ਚੋਰੀ ਦੀਆਂ ਵਾਰਦਾਤਾਂ ਨਾਲ ਆਮ ਲੋਕਾਂ ‘ਚ ਚੋਰਾਂ ਦਾ ਖੌਫ ਪੈਦਾ ਹੋ ਗਿਆ ਹੈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਸ ਵਾਰ ਅਣਪਛਾਤੇ ਚੋਰਾਂ ਨੇ ਪਿੰਡ ਬੋਹਾਨੀ ਦੇ ਮੋਜੂਦਾ ਸਰਪੰਚ ਹਰਜੀਤ ਸਿੰਘ ਲਾਡੀ ਦੀ ਹਵੇਲੀ ਨੂੰ ਨਿਸ਼ਾਨਾ ਬਣਾਇਆ ਅਤੇ ਨੌਕਰ ਨੂੰ ਬੰਧਕ ਬਣਾ ਕੇ ਲੱਖਾਂ ਰੁਪਏ ਕੀਮਤ ਦੀਆਂ ਤਿੰਨ ਦੁਧਾਰੂ ਮੱਝਾਂ ਚੋਰੀ ਕਰ ਲਈਆਂ ਹਨ। ਇੱਥੇ ਜਿਕਰਯੋਗ ਹੈ ਕਿ ਬੀਤੇ ਐਤਵਾਰ ਦੀ ਰਾਤ ਥਾਣਾ ਸਤਨਾਮਪੁਰਾ ਦੇ ਅਧੀਨ ਪਿੰਡ ਨਵੀਂ ਆਬਾਦੀ ਨਾਰੰਗਸ਼ਾਹਪੁਰ ਵਿਖੇ ਸ਼ਾਤਿਰ ਚੋਰਾਂ ਵਲੋਂ ਐਤਵਾਰ ਦੀ ਰਾਤ ਘਾਤ ਲਗਾ ਕੇ ਐਨ.ਆਰ.ਆਈਜ. ਨਾਲ ਸਬੰਧਤ ਦੋ ਘਰਾਂ ‘ਚ ਸੇਂਧਮਾਰੀ ਕਰਕੇ ਕਰੀਬ 26 ਤੋਲੇ ਸੋਨੇ ਦੇ ਗਹਿਣੇ ਸਮੇਤ ਲੱਖਾਂ ਰੁਪਏ ਦੀ ਵਿਦੇਸ਼ੀ ਤੇ ਭਾਰਤੀ ਕਰੰਸੀ ਤੇ ਹੱਥ ਸਾਫ ਕੀਤਾ ਸੀ। ਚੋਰੀ ਦੀ ਸਾਹਮਣੇ ਆਈ ਤਾਜਾ ਵਾਰਦਾਤ ਦੇ ਪੀੜ੍ਹਤ ਪਿੰਡ ਬੋਹਾਨੀ ਦੇ ਸਰਪੰਚ ਹਰਜੀਤ ਸਿੰਘ ਲਾਡੀ ਨੇ ਦੱਸਿਆ ਕਿ ਇਹ ਘਟਨਾ 22/23 ਜੁਲਾਈ ਰਾਤ ਦੀ ਹੈ। ਵਾਰਦਾਤ ਸਮੇਂ ਉਸਦਾ ਨੌਕਰ ਸ਼ਾਮ ਲਾਲ ਹਵੇਲੀ ‘ਚ ਸੌਂ ਰਿਹਾ ਸੀ ਤਾਂ ਰਾਤ ਕਰੀਬ 2 ਵਜੇ ਅਚਾਨਕ 5/6 ਅਣਪਛਾਤੇ ਨੌਜਵਾਨ ਜਿਹਨਾਂ ਦੇ ਮੂੰਹ ਕਪੜੇ ਨਾਲ ਢਕੇ ਹੋਏ ਸਨ, ਹਵੇਲੀ ਦੀ ਖਿੜਕੀ ਦੇ ਸਰੀਏ ਤੋੜ ਕੇ ਅੰਦਰ ਦਾਖਲ ਹੋਏ ਅਤੇ ਉਸਦੇ ਨੌਕਰ ਨੂੰ ਕਾਬੂ ਕਰਕੇ ਕਪੜੇ ਨਾਲ ਉਸ ਦੀਆਂ ਬਾਹਾਂ ਬੰਨ ਦਿੱਤੀਆਂ ਅਤੇ ਤਿੰਨ ਮੱਝਾ ਖੋਲ੍ਹ ਕੇ ਆਪਣੇ ਨਾਲ ਲੈ ਗਏ। ਘਟਨਾ ਦੇ ਚਸ਼ਮਦੀਦ ਨੌਕਰ ਅਨੁਸਾਰ ਚੋਰਾਂ ਨੇ ਉਸਦਾ ਮੋਬਾਇਲ ਫੋਨ ਅਤੇ ਕੁਝ ਨਗਦੀ ਵੀ ਖੋਹ ਲਈ ਅਤੇ ਹਵੇਲੀ ‘ਚ ਖੜੇ ਟਰੈਕਟਰ ਦੀ ਚਾਬੀ ਮੰਗੀ ਪਰ ਉਸਨੇ ਚਾਬੀ ਮਾਲਿਕ ਦੇ ਕੋਲ ਹੋਣ ਦੀ ਗੱਲ ਕਹੀ। ਜਿਸ ਤੇ ਚੋਰ ਉਸਨੂੰ ਰੋਲਾ ਪਾਉਣ ‘ਤੇ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦਿੰਦੇ ਹੋਏ ਫਰਾਰ ਹੋ ਗਏ। ਸਰਪੰਚ ਲਾਡੀ ਅਨੁਸਾਰ ਉਸਦੀਆਂ ਮੱਝਾਂ ਦੀ ਕੀਮਤ ਕਰੀਬ ਤਿੰਨ ਲੱਖ ਰੁਪਏ ਹੈ। ਇਸ ਘਟਨਾ ਦੀ ਸੂਚਨਾ ਮਿਲਣ ਤੇ ਥਾਣਾ ਰਾਵਲਪਿੰਡੀ ਦੇ ਐਸ.ਐਚ.ਓ. ਹਰਜਿੰਦਰ ਸਿੰਘ ਪੁਲਿਸ ਪਾਰਟੀ ਸਮੇਤ ਮੌਕੇ ਤੇ ਪੁੱਜੇ ਅਤੇ ਹਾਲਾਤ ਦਾ ਜਾਇਜਾ ਲਿਆ। ਐਸ.ਆਈ. ਹਰਜਿੰਦਰ ਸਿੰਘ ਅਨੁਸਾਰ ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਸੀਸੀਟੀਵੀ ਕੈਮਰੇ ਖੰਗਾਲੇ ਜਾ ਰਹੇ ਹਨ। ਉਹਨਾਂ ਕਿਹਾ ਕਿ ਅਜਿਹੀਆਂ ਵਾਰਦਾਤਾਂ ਕਰਨ ਵਾਲੇ ਦੋਸ਼ੀ ਬਖਸ਼ੇ ਨਹੀਂ ਜਾਣਗੇ।