ਫਗਵਾੜਾ 9 ਅਕਤੂਬਰ ( ਲਾਲੀ )

*190 ਸਰਪੰਚ ਅਤੇ 1872 ਪੰਚ ਬਿਨ੍ਹਾਂ ਮੁਕਾਬਲਾ ਚੁਣੇ ਗਏ
*ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਸ਼ਾਂਤੀਪੂਰਨ ਤੇ ਨਿਰਪੱਖ ਚੋਣਾਂ ਕਰਵਾਉਣ ਲਈ ਕੀਤੇ ਢੁੱਕਵੇਂ ਪ੍ਰਬੰਧ

: ਪੰਚਾਇਤੀ ਚੋਣਾਂ-2024 ਲਈ ਨਾਮਜ਼ਦਗੀਆਂ ਵਾਪਸ ਲੈਣ ਪਿੱਛੋਂ ਹੁਣ ਸਰਪੰਚੀ ਲਈ 863 ਅਤੇ ਪੰਚੀ ਲਈ 2705 ਉਮੀਦਵਾਰ ਚੋਣ ਮੈਦਾਨ ਵਿੱਚ ਰਹਿ ਗਏ ਹਨ। ਡਿਪਟੀ ਕਮਿਸ਼ਨਰ-ਕਮ-ਜ਼ਿਲ੍ਹਾ ਚੋਣ ਅਫਸਰ ਅਮਿਤ ਕੁਮਾਰ ਪੰਚਾਲ ਨੇ ਦੱਸਿਆ ਕਿ ਪੜਤਾਲ ਅਤੇ ਨਾਮਜ਼ਦਗੀਆਂ ਵਾਪਸ ਲੈਣ ਪਿੱਛੋਂ ਸਰਪੰਚੀ ਅਤੇ ਪੰਚੀ ਦੇ ਉਮੀਦਵਾਰਾਂ ਨੂੰ ਚੋਣ ਨਿਸ਼ਾਨ ਵੀ ਅਲਾਟ ਕਰ ਦਿੱਤੇ ਗਏ ਹਨ l ਚੋਣ ਮੈਦਾਨ ਵਿੱਚ ਢਿਲਵਾਂ ਬਲਾਕ ‘ਚ ਸਰਪੰਚੀ ਲਈ 154 ਅਤੇ ਪੰਚੀ ਲਈ 525, ਕਪੂਰਥਲ਼ਾ ਬਲਾਕ ਵਿੱਚ ਸਰਪੰਚੀ ਲਈ 228 ਤੇ ਪੰਚੀ ਲਈ 691, ਨਡਾਲਾ ਬਲਾਕ ਵਿੱਚ ਸਰਪੰਚੀ ਲਈ 122 ਤੇ ਪੰਚੀ ਲਈ 412, ਫਗਵਾੜਾ ਬਲਾਕ ਵਿੱਚ ਸਰਪੰਚੀ ਲਈ 183 ਤੇ ਪੰਚੀ ਲਈ 629 ਜਦਕਿ ਸੁਲਤਾਨਪੁਰ ਲੋਧੀ ਬਲਾਕ ਵਿੱਚ ਸਰਪੰਚੀ ਲਈ 176 ਅਤੇ ਪੰਚੀ ਲਈ 448 ਉਮੀਦਵਾਰ ਚੋਣ ਮੈਦਾਨ ਵਿੱਚ ਰਹਿ ਗਏ ਹਨ।
ਉਨ੍ਹਾਂ ਦੱਸਿਆ ਕਿ 190 ਸਰਪੰਚ ਅਤੇ 1872 ਪੰਚ ਬਿਨ੍ਹਾਂ ਮੁਕਾਬਲਾ ਚੁਣੇ ਗਏ ਹਨ। ਇਨ੍ਹਾਂ ਵਿੱਚ ਢਿਲਵਾਂ ਬਲਾਕ ‘ਚ 25 ਸਰਪੰਚ ਤੇ 263 ਪੰਚ, ਕਪੂਰਥਲ਼ਾ ਬਲਾਕ ਵਿੱਚ 39 ਸਰਪੰਚ ਤੇ 421 ਪੰਚ, ਨਡਾਲਾ ਬਲਾਕ ਵਿੱਚ 37 ਸਰਪੰਚ ਤੇ 322 ਪੰਚ, ਫਗਵਾੜਾ ਬਲਾਕ ਵਿੱਚ 18 ਸਰੰਪਚ ਤੇ 287 ਪੰਚ ਜਦਿਕ ਸੁਲਤਾਨਪੁਰ ਲੋਧੀ ਬਲਾਕ ਵਿੱਚ 71 ਸਰਪੰਚ ਅਤੇ 579 ਪੰਚ ਸ਼ਾਮਲ ਹਨ l ਡਿਪਟੀ ਕਮਿਸ਼ਨਰ ਨੇ ਦੱਸਿਆ ਕਿ ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ 15 ਅਕਤੂਬਰ ਨੂੰ ਹੋਣ ਵਾਲੀਆਂ ਵੋਟਾਂ ਨੂੰ ਸ਼ਾਂਤੀਪੂਰਵਕ ਤੇ ਨਿਰਪੱਖ ਤਰੀਕੇ ਨਾਲ ਕਰਵਾਉਣ ਲਈ ਪੁਖਤਾ ਪ੍ਰਬੰਧ ਕੀਤੇ ਗਏ ਹਨ l ਉਨ੍ਹਾਂ ਦੱਸਿਆ ਕਿ ਚੋਣ ਅਮਲੇ ਦੀ ਪਹਿਲੀ ਰਿਹਰਸਲ ਹੋ ਚੁੱਕੀ ਹੈ ਜਦਿਕ ਬਲਾਕ ਪੱਧਰ ’ਤੇ ਚੋਣ ਅਮਲੇ ਨੂੰ ਵੋਟਿੰਗ ਪ੍ਰਕਿਰਿਆ ਬਾਰੇ ਚੰਗੀ ਤਰ੍ਹਾਂ ਜਾਣੂ ਕਰਵਾਉਣ ਲਈ ਹੋਰ ਰਿਹਰਸਲਾਂ ਵੀ ਕਰਵਾਈਆਂ ਜਾ ਰਹੀਆਂ ਹਨ l ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣੇ ਜ਼ਮਹੂਰੀ ਹੱਕ ਦਾ ਵੱਧ ਚੜ੍ਹ ਕੇ ਇਸਤੇਮਾਲ ਕਰਨ ਤਾਂ ਜੋ ਲੋਕਤੰਤਰ ਨੂੰ ਜ਼ਮੀਨੀ ਪੱਧਰ ’ਤੇ ਹੋਰ ਮਜ਼ਬੂਤ ਕੀਤਾ ਜਾ ਸਕੇ l