ਗੜ੍ਹਦੀਵਾਲਾ (ਚੌਧਰੀ) 

8 ਮਈ : ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ, ਸ੍ਰੀ ਅੰਮ੍ਰਿਤਸਰ ਸਾਹਿਬ ਦੇ ਪ੍ਰਬੰਧ ਅਧੀਨ ਚੱਲ ਰਹੇ ਅਦਾਰੇ ਖ਼ਾਲਸਾ ਕਾਲਜ, ਗੜ੍ਹਦੀਵਾਲਾ ਵਿਖੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ, ਸ੍ਰੀ ਅੰਮ੍ਰਿਤਸਰ ਦੇ ਪ੍ਰਧਾਨ ਮਾਨਯੋਗ ਸ. ਹਰਜਿੰਦਰ ਸਿੰਘ ਧਾਮੀ, ਸਕੱਤਰ (ਸਿੱਖਿਆ) ਸ. ਸੁਖਮਿੰਦਰ ਸਿੰਘ ਦੀ ਪ੍ਰੇਰਨਾ ਸਦਕਾ ਅਤੇ ਪ੍ਰਿੰਸੀਪਲ ਡਾ. ਜਸਪਾਲ ਸਿੰਘ ਦੀ ਅਗਵਾਈ ਹੇਠ ਰਾਜਨੀਤੀ-ਸ਼ਾਸਤਰ ਵਿਭਾਗ ਵਲੋਂ “75 ਸਾਲਾਂ ਉਪਰੰਤ : ਆਜ਼ਾਦ ਭਾਰਤ ਵਿੱਚ ਅੋਰਤ ਦੀ ਸਥਿਤੀ ( ਉੱਤਰੀ ਪੱਛਮੀ ਰਾਜਾਂ ਦੀ ਵਿਸ਼ੇਸ਼ ਸੰਦਰਭ ਵਿੱਚ) “ਵਿਸ਼ੇ ਉੱਪਰ ਇੱਕ ਰੋਜ਼ਾ ਸੈਮੀਨਾਰ ਕਰਵਾਇਆ ਗਿਆ। ਸੈਮੀਨਾਰ ਦੇ ਆਰੰਭ ਵਿੱਚ ਸ੍ਰੀਮਤੀ ਮਲਿਕਾ ਮੰਡ (ਅਸਿਸਟੈਂਟ ਪ੍ਰੋਫੈਸਰ, ਅੰਗਰੇਜ਼ੀ) ਨੇ ਸਰੋਤਿਆਂ ਨਾਲ ਕਾਲਜ ਬਾਰੇ ਜਾਣਕਾਰੀ ਸਾਂਝੀ ਕੀਤੀ।ਇਸ ਉਪਰੰਤ ਸ੍ਰੀ ਜਗਦੀਪ ਕੁਮਾਰ (ਅਸਿਸਟੈਂਟ ਪ੍ਰੋਫੈਸਰ, ਰਾਜਨੀਤੀ ਸ਼ਾਸਤਰ) ਨੇ ਆਏ ਹੋਏ ਮਹਿਮਾਨਾ ਦਾ ਰਸਮੀ ਸਵਾਗਤ ਕੀਤਾ । ਉਹਨਾਂ ਨੇ ਸੈਮੀਨਾਰ ਦੇ ਵਿਸ਼ੇ ਸੰਬੰਧੀ ਆਪਣੇ ਸੰਖੇਪ ਵਿਚਾਰ ਵੀ ਸਾਂਝੇ ਕੀਤੇ।ਸ੍ਰੀਮਤੀ ਅਰਚਨਾ ਠਾਕੁਰ (ਅਸਿਸਟੈਂਟ ਪ੍ਰੋਫੈਸਰ, ਰਾਜਨੀਤੀ ਸ਼ਾਸਤਰ) ਨੇ ਸੈਮੀਨਾਰ ਦੇ ਮੁੱਖ-ਬੁਲਾਰੇ ਡਾ. ਅਮੀਰ ਸੁਲਤਾਨਾ ( ਪ੍ਰੋਫੈਸਰ, ਸੈਂਟਰ ਫਾਰ ਵੂਮੈਨ ਸਟੱਡੀਜ਼, ਪੰਜਾਬ ਯੂਨੀਵਰਸਿਟੀ, ਚੰਡੀਗੜ), ਰਿਸੋਰਸ ਪਰਸਨ ਡਾ. ਸ਼ਿਵਾਨੀ ਸਰਮਾ (ਪ੍ਰੋ., ਡਿਪਾਰਟਮੈਂਟ ਆਫ਼ ਫਿਲਾਸਫ਼ੀ, ਪੰਜਾਬ ਯੂਨੀਵਰਸਿਟੀ, ਚੰਡੀਗੜ੍ਹ) ਅਤੇ ਡਾ. ਨਮਿਤਾ ਸ਼ਰਮਾ (ਸੈਂਟਰ ਫ਼ਾਰ ਹਿਊਮਨ ਰਾਈਟਸ ਐਂਡ ਡਿਊਟੀਜ਼, ਪੰਜਾਬ ਯੂਨੀਵਰਸਿਟੀ, ਚੰਡੀਗੜ੍ਹ) ਦੀਆਂ ਅਕਾਦਮਿਕ ਪ੍ਰਾਪਤੀਆਂ ਬਾਰੇ ਸੰਖੇਪ ਜਾਣਕਾਰੀ ਦਿੱਤੀ।ਸੈਮੀਨਾਰ ਦੇ ਮੁੱਖ ਬੁਲਾਰੇ ਡਾ. ਅਮੀਰ ਸੁਲਤਾਨਾ ਨੇ ਸਮਾਜ ਦੇ ਵੱਖ-ਵੱਖ ਖ਼ੇਤਰਾਂ ਵਿੱਚ ਔਰਤ ਦੀ ਹਿੱਸੇਦਾਰੀ, ਔਰਤ ਦੀ ਸਾਖ਼ਰਤਾ, ਗਰੀਬੀ ਕਾਰਨ ਲੜਕੀਆਂ ਅਤੇ ਲੜਕਿਆਂ ਦੇ ਡਰਾਪ-ਆਊਟ ਦਰ, ਲੜਕੀਆਂ ਵਿੱਚ ਨਸ਼ੇ ਦੀ ਦੁਰਵਰਤੋਂ ਦਰ ਅਤੇ ਸਾਈਬਰ ਕਰਾਈਮ ਆਦਿ ਵਿਸ਼ਿਆਂ ਉੱਪਰ ਵਿਸਥਾਰ ਵਿੱਚ ਚਰਚਾ ਕੀਤੀ। ਉਹਨਾਂ ਕਿਹਾ ਕਿ ਔਰਤ ਦੀ ਸਥਿਤੀ ਵਿੱਚ ਸੁਧਾਰ ਲਈ ਦੇਸ਼ ਅੰਦਰ ਬਹੁਤ ਸਾਰੀਆਂ ਤਬਦੀਲੀਆਂ ਦੀ ਜ਼ਰੂਰਤ ਹੈ। ਰਿਸੋਰਸ ਪਰਸਨ ਡਾ. ਸਿਵਾਨੀ ਸ਼ਰਮਾ ਨੇ “ਆਜ਼ਾਦ ਭਾਰਤ ਵਿੱਚ ਔਰਤ : ਇੱਕ ਨਜ਼ਰ” ਵਿਸ਼ੇ ਉੱਪਰ ਚਰਚਾ ਕਰਦਿਆਂ ਕਿਹਾ ਕਿ ਭਾਰਤ ਵਿੱਚ ਔਰਤ ਦੀ ਸਥਿਤੀ ਵਿੱਚ ਕਦੋਂ ਤੇ ਕਿਵੇਂ ਗਿਰਾਵਟ ਆਉਣੀ ਸ਼ੁਰੂ ਹੋਈ ਇਸ ਬਾਰੇ ਡੂੰਘਾਈ ਬਾਰੇ ਸੋਚਣ ਦੀ ਜ਼ਰੁਰਤ ਹੈ। ਉਹਨਾਂ ਕਿਹਾ ਕਿ ਔਰਤ-ਮਰਦ ਦੀ ਬਰਾਬਰੀ ਬਾਰੇ ਸਵਾਲ ਪੈਦਾ ਕਰਨ ਦੀ ਥਾਂ ਜੇਕਰ ਇਹ ਸਵੀਕਾਰ ਕਰ ਲਿਆ ਜਾਵੇ ਕਿ ਔਰਤ ਵੀ ਮਰਦ ਦੀ ਤਰਾਂ ਇੱਕ ਸਮਾਜਿਕ ਪ੍ਰਾਣੀ ਹੈ ਤਾਂ ਇਸ ਨਾਲ ਬਹੁਤ ਸਾਰੀਆਂ ਸਮੱਸਿਆਵਾਂ ਖੁਦ ਹੱਲ ਹੋ ਜਾਣਗੀਆਂ।ਡਾ. ਹਰਸ਼ਿੰਦਰ ਕੌਰ ਨੇ ਆਨ-ਲਾਈਨ ਮੋਡ ਰਾਹੀਂ ਸਰੋਤਿਆਂ ਨੂੰ ਦੱਸਿਆ ਕਿ ਅਜੋਕੇ ਸਮੇਂ ਵਿੱਚ ਸਭ ਕੁਝ ਹਾਸਲ ਕਰ ਚੁੱਕੀ ਔਰਤ ਅੱਜ ਵੀ ਸਰੀਰਕ, ਮਾਨਸਿਕ ਅਤੇ ਘਰੇਲੂ ਹਿੰਸਾ ਦਾ ਸ਼ਿਕਾਰ ਹੁੰਦੀ ਹੈ।ਡਾ. ਹਰਲੀਨ ਕੌਰ, ਮਿਸ ਮਿਨਾਕਸ਼ੀ , ਸ਼੍ਰੀਮਤੀ ਸ਼ਾਇਨਾ ਪਰਮਾਰ, ਸ੍ਰੀਮਤੀ ਮਲਿਕਾ, ਸ੍ਰੀ ਪੰਕਜ਼ ਸ਼ਰਮਾ, ਸ੍ਰੀਮਤੀ ਅਮਰਿੰਦਰ ਕੋਰ, ਮਿਸ ਪੁਜਾ ਦੁੱਗਲ ਅਤੇ ਰਿਸ਼ਵ ਠਾਕੁਰ ਤੋਂ ਇਲਾਵਾ ਲੱਗਭੱਗ ਹੋਰ 42 ਅਧਿਆਪਕ ਅਤੇ ਰਿਸਰਚ ਸਕਾਲਰਾਂ ਨੇ ਆਨ-ਲਾਈਨ ਮੋਡ ਰਾਹੀਂ ਆਪਣੇ ਪੇਪਰ ਪੇਸ਼ ਕੀਤੇ।ਪ੍ਰਿੰਸੀਪਲ ਡਾ. ਜਸਪਾਲ ਸਿੰਘ ਨੇ ਆਏ ਹੋਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ ਅਤੇ ਸਨਮਾਨ ਚਿੰਨ੍ਹ ਦੇ ਕੇ ਸਨਮਾਨਿਤ ਕੀਤਾ।ਮੰਚ ਸੰਚਾਲਨ ਦੀ ਜ਼ਿੰਮੇਵਾਰੀ ਸ੍ਰੀਮਤੀ ਅਰਚਨਾ ਠਾਕੁਰ ਅਤੇ ਸ੍ਰੀਮਤੀ ਮਲਿਕਾ ਮੰਡ ਨੇ ਨਿਭਾਈ।ਇਸ ਮੌਕੇ ਕਾਲਜ ਦਾ ਸਮੂਹ ਸਟਾਫ਼ ਅਤੇ ਵਿਦਿਆਰਥੀ ਹਾਜ਼ਰ ਸਨ।।