ਗੜ੍ਹਦੀਵਾਲਾ 23 ਮਈ (ਯੋਗੇਸ਼ ਗੁਪਤਾ,ਚੌਧਰੀ)

: ਗੜ੍ਹਦੀਵਾਲਾ ਦੇ ਅਧੀਨ ਪੈਂਦੇ ਪਿੰਡ ਮੱਲ਼ੇਵਾਲ ਦੇ ਨੌਜਵਾਨ ਦੀ ਕਰੋਸ਼ੀਆ ਦੇ ਕਾਰਲੋਵਾ ਸਿਟੀ ਦੇ ਹਸਪਤਾਲ ਤੋਂ ਇੱਕ ਵੀਡੀਓ ਸਾਹਮਣੇ ਆਈ ਹੈ। ਮਿਲੀ ਜਾਣਕਾਰੀ ਅਨੁਸਾਰ ਪਿੰਡ ਮੱਲ਼ੇਵਾਲ ਦੇ ਨੌਜਵਾਨ ਵਿਸ਼ਾਲ ਦੀਪ ਜੋ ਕਿ 15 ਜਨਵਰੀ ਨੂੰ ਰੋਜ਼ਗਾਰ ਦੇ ਲਈ ਕਰੋਸ਼ੀਆ ਗਿਆ ਸੀ ਦੀ 15 ਮਈ 2024 ਨੂੰ ਕੰਮ ਤੇ ਸੱਟ ਲੱਗਣ ਨਾਲ ਬਾਂਹ ਕਈ ਜਗ੍ਹਾ ਤੋਂ ਟੁੱਟ ਗਈ । ਜਿਸ ਦਾ ਇਲਾਜ ਕਰੋਸ਼ੀਆ ਦੇ ਕਾਰਲੋਵਾ ਸ਼ਹਿਰ ਦੇ ਇੱਕ ਹਸਪਤਾਲ ਵਿਚ ਚੱਲ ਰਿਹਾ ਹੈ। ਪੀੜਤ ਨੌਜਵਾਨ ਵਿਸ਼ਾਲ ਦੀਪ ਨੇ ਆਪਣੀ ਫੇਸਬੁੱਕ ਪੇਜ ਤੋਂ ਇਲਾਜ ਦੌਰਾਨ ਇੱਕ ਵੀਡੀਓ ਸ਼ੇਅਰ ਕਰਦਿਆਂ ਭਾਰਤ ਸਰਕਾਰ ਅਤੇ ਪੰਜਾਬ ਸਰਕਾਰ ਨੂੰ ਗੁਹਾਰ ਲਗਾਈ ਹੈ ਕਿ ਉਸ ਨੂੰ ਜਲਦ ਪੰਜਾਬ ਲਿਆਉਣ ਵਿਚ ਮਦਦ ਕੀਤੀ ਜਾਵੇ। ਉਸ ਰੋਂਦੇ ਕੁਰਲਾਉਂਦੇ ਹੋਏ ਕਿਹਾ ਕਿ ਕਰੋਸ਼ੀਆ ਦੇ ਵਿਚ ਉਸ ਦਾ ਇਲਾਜ ਸਹੀ ਨਹੀਂ ਹੋ ਰਿਹਾ ਹੈ। ਉਸਨੇ ਦੱਸਿਆ ਕਿ ਉਸ ਦੇ ਕਈ ਆਪ੍ਰੇਸ਼ਨ ਹੋ ਚੁੱਕੇ ਹਨ ਪਰ ਕੋਈ ਵੀ ਸੁਧਾਰ ਨਹੀਂ ਆ ਰਿਹਾ। ਇਸ ਕਰਕੇ ਉਸਨੇ ਭਾਰਤ ਸਰਕਾਰ ਤੇ ਪੰਜਾਬ ਸਰਕਾਰ ਨੂੰ ਗੁਹਾਰ ਲਗਾਈ ਹੈ ਕਿ ਉਸ ਜਲਦ ਤੋਂ ਜਲਦ ਭਾਰਤ ਲਿਆਉਣ ਵਿਚ ਮਦਦ ਕੀਤੀ ਜਾਵੇ ਤਾਂਕਿ ਉਸ ਇੱਥੇ ਆਪਣਾ ਇਲਾਜ ਚੰਗੀ ਤਰਾਂ ਕਰਵਾ ਸਕੇ।

ਉਸ ਨੇ ਇਹ ਵੀ ਦੱਸਿਆ ਕਿ ਉਹ ਜਿਲਾ ਹੁਸ਼ਿਆਰਪੁਰ ਦੇ ਹਲਕਾ ਗੜ੍ਹਦੀਵਾਲਾ ਚ ਨਾਈ ਦਾ ਕੰਮ ਕਰਦਾ ਸੀ ਅਤੇ ਪਰਿਵਾਰ ਦੀ ਗਰੀਬੀ ਦੂਰ ਕਰਨ ਲਈ ਕਰੋਸ਼ੀਆ ਆਇਆ ਸੀ। ਉਸ ਨੇ ਦੱਸਿਆ ਕਿ ਉਸ ਨੂੰ ਕਰੋਸ਼ੀਆ ਦੇ ਵਿਚ ਕੰਮ ਮਿਲ ਗਿਆ ਸੀ ਅਤੇ ਸੈਲਰੀ ਵੀ ਚੰਗੀ ਮਿਲਦੀ ਸੀ। ਪਰ 15 ਮਈ 2024 ਨੂੰ ਨਾਈਟ ਡਿਊਟੀ ਦੌਰਾਨ ਉਹ ਪੌੜੀਆਂ ਤੋਂ ਡਿੱਗ ਪਿਆ। ਜਿਸ ਨਾਲ ਉਸ ਦੀ ਬਾਂਹ ਕਈ ਜਗ੍ਹਾ ਤੋਂ ਟੁੱਟ ਗਈ ਹੈ ਤੇ ਕਰੋਸ਼ੀਆ ਦੇ ਕਾਰਲੋਵਾ ਸ਼ਹਿਰ ਦੇ ਇੱਕ ਹਸਪਤਾਲ ਵਿੱਚ ਉਸ ਨੂੰ ਦਾਖਲ ਕਰਾਇਆ ਗਿਆ ਹੈ। ਜਿੱਥੇ ਉਸ ਦਾ ਇਲਾਜ ਸਹੀ ਨਹੀਂ ਹੋ ਰਿਹਾ ਹੈ। ਉਸ ਨੇ ਦੱਸਿਆ ਕਿ ਉਸ ਦੇ ਪਰਿਵਾਰ ਦਾ ਵੀ ਰੋ ਰੋ ਬੁਰਾ ਹਾਲ ਹੈ। ਉਸ ਨੇ ਭਾਰਤ ਤੇ ਪੰਜਾਬ ਸਰਕਾਰ ਤੋਂ ਭਾਰਤ ਲਿਆਉਣ ਲਈ ਗੁਹਾਰ ਲਗਾਈ ਹੈ।

ਬਾਬਾ ਦੀਪ ਸਿੰਘ ਸੇਵਾ ਦਲ ਐਡ ਵੈਲਫੇਅਰ ਸੋਸਾਇਟੀ ਗੜ੍ਹਦੀਵਾਲਾ ਨੇ ਵੀ ਇੱਕ ਪੋਸਟ ਨੂੰ ਸਾਂਝਾ ਕਰਦਿਆਂ ਕਿਹਾ ਕਿ ਵਿਸ਼ਾਲ ਦੀਪ ਵੀਰ ਦੀ ਮਦਦ ਲਈ ਯਤਨ ਜਾਰੀ ਹਨ। ਉਨ੍ਹਾਂ ਕਿਹਾ ਕਿ ਕਰੋਸ਼ੀਆ ਵਿਚ ਸੁਸਾਇਟੀ ਵਲੋਂ ਕੁਝ ਸਾਥੀਆਂ ਦੀ ਇਸ ਵੀਰ ਦੀ ਮਦਦ ਕਰਨ ਲਈ ਡਿਊਟੀ ਲਗਈ ਗਈ ਹੈ ਅਤੇ ਜਲਦ ਹੀ ਇਸ ਵੀਰ ਨੂੰ ਮਦਦ ਲਈ ਸੰਭਵ ਉਦਮ ਕੀਤਾ ਜਾਵੇਗਾ।