ਗੜਦੀਵਾਲਾ 27 ਮਾਰਚ(ਚੌਧਰੀ) : ਭਾਰਤ ਨਿਰਮਾਣ ਮਿਸਤਰੀ  ਮਜ਼ਦੂਰ ਯੂਨੀਅਨ ਸੀਟੂ ਵੱਲੋਂ  ਉਸਾਰੀ ਕਿਰਤੀਆਂ ਨੂੰ ਮਿਲ ਰਹੀਆਂ ਸਹੂਲਤਾਂ ਨਾ ਮਿਲਣ ਬਾਰੇ ਮਨਜੀਤ ਕੌਰ ਭੱਟੀਆਂ ਜ਼ਿਲ੍ਹਾ ਪ੍ਰਧਾਨ ਦੀ ਅਗਵਾਈ ਹੇਠ  ਹਲਕਾ ਟਾਂਡਾ ਦੇ ਵਿਧਾਇਕ ਜਸਬੀਰ ਸਿੰਘ ਰਾਜਾ ਨੂੰ ਮੈਮੋਰੰਡਮ ਦਿੱਤਾ । ਜਿਸ ਵਿਚ ਕੁਲਦੀਪ ਕੌਰ, ਅਜੈਬ ਸਿੰਘ, ਮਲਕੀਤ ਸਿੰਘ ਅਤੇ ਚੈਂਚਲ ਸਿੰਘ ਪੰਮਾ ਹਾਜ਼ਰ ਸਨ । ਇਸ ਮੰਗ ਪੱਤਰ ਬਾਰੇ ਬੋਲਦਿਆਂ ਮਨਜੀਤ ਕੌਰ ਭੱਟੀਆਂ ਨੇ ਕਿਹਾ ਕਿ ਉਸਾਰੀ ਕਿਰਤੀਆਂ ਦੀਆਂ ਦੋ ਹਜਾਰ ਚੌਦਾਂ ਤੋਂ ਦੋ ਹਜਾਰ ਸਤਾਰਾਂ ਤੱਕ ਆਫਲਾਈਨ ਸਕੀਮਾਂ ਦਾ ਬਕਾਇਆ  ਅਜੇ ਤੱਕ ਨਹੀਂ ਮਿਲਿਆ।  ਬੋਰਡ ਵੱਲੋਂ ਸੱਠ ਸਾਲ ਦੀ ਉਮਰ ਭੋਗ ਰਹੇ ਉਸਾਰੀ ਕਿਰਤੀਆਂ ਨੂੰ ਬੁਢਾਪਾ ਪੈਨਸ਼ਨ ਮਿਲਣੀ ਸੀ ਪਰ ਤਹਿਸੀਲ ਦਸੂਹਾ ਦੇ    ਬੁਢਾਪਾ ਪੈਨਸ਼ਨ ਦੇ ਕੇਸ ਜੋ ਕਿ ਪਾਸ ਕਰਕੇ ਮੁਹਾਲੀ ਲੇਬਰ   ਦਫ਼ਤਰ ਭੇਜੇ ਹੋਏ ਹਨ , ਅਜੇ ਤਕ ਕਿਸੇ ਨੂੰ ਕੋਈ ਲਾਭ ਪ੍ਰਾਪਤ ਨਹੀਂ ਹੋਇਆ । ਕਿਰਤੀਆਂ ਨੂੰ ਆਪਣੀ ਰਜਿਸਟ੍ਰੇਸ਼ਨ  ਕਰਾਉਣ ਲਈ ਬਹੁਤ ਖੱਜਲ ਖੁਆਰ ਹੋਣਾ ਪੈਂਦਾ ਹੈ,  ਸੇਵਾ ਕੇਂਦਰਾਂ ਵਿਚ ਸਟਾਫ ਅਣਟਰੇਂਡ ਹੋਣ ਕਰਕੇ ਕਿਰਤੀਆਂ ਨੂੰ ਬਾਰ ਬਾਰ ਦਫ਼ਤਰ ਦੇ ਗੇੜੇ ਮਾਰਨੇ ਪੈਂਦੇ ਹਨ । ਆਨਲਾਈਨ ਦੇ ਨਾਲ ਨਾਲ ਆਫਲਾਈਨ ਵੀ ਕੰਮ ਹੋਣੇ ਚਾਹੀਦੇ ਹਨ ਕਿਉਂਕਿ ਮਹਿਕਮੇ ਦਾ ਸਰਵਰ ਹਰ ਵੇਲੇ ਡਾਊਨ ਹੀ ਰਹਿੰਦਾ ਹੈ । ਹਰ ਸੇਵਾ ਕੇਂਦਰ ਵਿਚ ਲੇਬਰ ਦਾ ਕੰਮ ਕਰਵਾਉਣ ਲਈ ਇਕ ਸਪੈਸ਼ਲ ਕਾਊਂਟਰ ਹੋਣਾ ਚਾਹੀਦਾ ਹੈ , ਸਕੂਲੀ ਵਿਦਿਆਰਥੀਆਂ ਦੀਆਂ ਵਜ਼ੀਫ਼ੇ ਦੀਅਾਂ ਸਕੀਮਾਂ  ਲੇਬਰ ਦਫ਼ਤਰਾਂ ਵਿੱਚ ਜਮ੍ਹਾਂ ਹਨ ਤੇ ਬਾਰਬਰ ਅਬਜੈਕਸ਼ਨ ਲਗਾਏ ਜਾ ਰਹੇ ਹਨ,  ਲੇਬਰ ਇੰਸਪੈਕਟਰ ਹੁਸ਼ਿਆਰਪੁਰ ਤੋਂ ਪਿਛਲੇ ਛੇ  ਸਾਲ ਦੀ  ਰਜਿਸਟ੍ਰੇਸ਼ਨ ਦੀ ਪੂਰੀ ਪੁੱਛ ਪਡ਼ਤਾਲ ਕੀਤੀ ਜਾਵੇ । ਉਸਾਰੀ ਕਿਰਤੀਆਂ ਲਈ ਬਣੀਆਂ  ਸਕੀਮਾਂ ਦਾ ਲੇਬਰ ਨੂੰ ਪੂਰਾ ਲਾਭ ਨਹੀਂ ਮਿਲ ਰਿਹਾ । ਇਸ ਵਿੱਚ ਸਰਕਾਰ ਨੂੰ ਬੇਨਤੀ ਕੀਤੀ ਗਈ ਹੈ ਕਿ ਇਨ੍ਹਾਂ ਸਕੀਮਾਂ ਦੇ ਲਾਭਪਾਤਰੀਆਂ ਲਈ   ਪਾਰਦਰਸ਼ਤਾ ਲਿਆਂਦੀ  ਜਾਵੇ।