ਵੱਡੀ ਖਬਰ.. ਗਰੀਬ ਕਿਸਾਨ ਦੇ ਘਰ ਦੇ ਅੰਦਰ ਦਾਖਲ ਹੋ ਕੇ ਅਣਪਛਾਤੇ ਵਿਅਕਤੀਆਂ ਨੇ ਕੀਤੇ ਹਵਾਈ ਫਾਈਰ

ਬਲਾਚੌਰ 7 ਅਪ੍ਰੈਲ (ਜਤਿੰਦਰ ਪਾਲ ਸਿੰਘ ਕਲੇਰ )- ਨਜ਼ਦੀਕ ਪੈਂਦੇ ਪਿੰਡ ਅਟਾਲ ਮਜਾਰਾ ਵਿਖੇ ਅਣਪਛਾਤੇ ਵਿਅਕਤੀਆਂ ਵਲੋਂ ਇਕ ਗਰੀਬ ਕਿਸਾਨ ਦੇ ਘਰ ਅੰਦਰ ਦਾਖਲ ਹੋ ਕੇ ਹਵਾਈ ਫਾਇਰ ਕਰਨ ਨਾਲ ਪਿੰਡ ਵਿਚ ਸਹਿਮ ਦਾ ਮਾਹੌਲ ਪਾਇਆ ਜਾ ਰਿਹਾ ਹੈ | ਘਰ ਦੇ ਮੁਖੀ ਬਾਂਕਾ ਸਿੰਘ ਪੁੱਤਰ ਹੁਕਮਾ ਸਿੰਘ ਵਾਸੀ ਪਿੰਡ ਅਟਾਲ ਮਜਾਰਾ ਨੇ ਦੱਸਿਆ ਕਿ ਮੈਂ ਤੇ ਮੇਰਾ ਭਰਾ ਆਪਣੇ ਘਰ ਦੇ ਵਿਹੜੇ ਵਿਚ ਸੁੱਤੇ ਪਏ ਸੀ | ਰਾਤ ਦੇ ਕਰੀਬ ਇਕ ਵਜੇ ਕੁਝ ਅਣਪਛਾਤੇ ਵਿਅਕਤੀਆਂ ਨੇ ਜਿਨ੍ਹਾਂ ਦੇ ਹੱਥਾਂ ਵਿਚ ਅਸਲਾ ਸੀ, ਨੇ ਸਾਡੇ ਭਤੀਜੇ ਗੋਪਾ ਦਾ ਨਾਮ ਲੈ ਕੇ ਆਵਾਜ਼ ਮਾਰੀ | ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਵਿਚੋਂ ਇਕ ਨੇ ਮੈਨੂੰ ਮੰਜੇ ‘ਤੇ ਲੰਮੇ ਪਏ ਨੂੰ ਪੈਰ ਤੇ ਫੜ ਕੇ ਗੋਪੇ ਬਾਰੇ ਪੁੱਛਿਆ, ਤਾਂ ਨੇ ਕਿਹਾ ਕਿ ਗੋਪਾ ਤਾਂ ਕਿਧਰੇ ਹੁਸ਼ਿਆਰਪੁਰ ਵੱਲ ਰਹਿੰਦਾ ਹੈ, ਸਾਨੂੰ ਪਤਾ ਨਹੀਂ, ਇੰਨੇ ਨੂੰ ਅਣਪਛਾਤੇ ਵਿਅਕਤੀਆਂ ਨੇ ਆਪਣੇ ਅਸਲੇ ਨਾਲ ਸਾਡੇ ਘਰ ਵੱਲ ਨੂੰ ਦੋ ਫਾਇਰ ਕਰ ਦਿੱਤੇ, ਜਿਸ ਨਾਲ ਅਸੀ ਦੋਨੋਂ ਭਰਾ ਬਾਲ-ਬਾਲ ਬਚ ਗਏ | ਇੰਨੀ ਦੇਰ ਨੂੰ ਉਹ ਅਣਪਛਾਤੇ ਵਿਅਕਤੀ ਘਰ ਦੇ ਬਾਹਰ ਖੜੀ ਕਿਸੇ ਗੱਡੀ ਵਿਚ ਸਵਾਰ ਹੋ ਕੇ ਚਲੇ ਗਏ | ਉਨ੍ਹਾਂ ਦੱਸਿਆ ਕਿ ਅਸੀ ਘਟਨਾ ਸਬੰਧੀ ਸੂਚਨਾ ਪੁਲਿਸ ਥਾਣਾ ਪੋਜੇਵਾਲ ਨੂੰ ਦੇਣ ਤੋਂ ਬਾਅਦ ਪੋਜੇਵਾਲ ਦੀ ਪੁਲਿਸ ਬਲਵੀਰ ਸਿੰਘ ਇਨਕੁਆਰੀ ਅਫਸਰ ਦੀ ਹਾਜ਼ਰੀ ਵਿਚ ਘਟਨਾ ਦੇ ਸਾਰੇ ਪਹਿਲੂਆਂ ਬਾਰੇ ਜਾਣਕਾਰੀ ਪ੍ਰਾਪਤ ਕਰਨ ਉਪਰੰਤ ਘਰ ਵਿਚੋਂ ਦੋ ਚੱਲੇ ਹੋਏ ਕਾਰਤੂਸਾਂ ਦੇ ਖੋਲ੍ਹ ਲੈ ਕੇ ਵਾਪਸ ਚਲੀ ਗਈ | ਪੁਲਿਸ ਥਾਣਾ ਪੋਜੇਵਾਲ ਵਲੋਂ ਘਟਨਾ ਸਬੰਧੀ ਕਾਰਵਾਈ ਨੂੰ ਅਮਲ ਵਿਚ ਲਿਆ ਕੇ ਅਣਪਛਾਤੇ ਵਿਅਕਤੀਆਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ |