ਟਾਂਡਾ ਉੜਮੁੜ / ਹੁਸ਼ਿਆਰਪੁਰ,6 ਜਨਵਰੀ (PPT BUREAU ਸੂਦ) – ਟਾਂਡਾ ਪੁਲਸ ਨੇ ਵੱਡੀ ਸਫਲਤਾ ਹਾਸਲ ਕਰਦੇ ਹੋਏ ਦੋ ਮੁਲਜਮਾਂ ਨੂੰ ਦੇਸੀ ਅਤੇ ਵਿਦੇਸ਼ੀ ਅਸਲੇ ਸਮੇਤ ਕਾਬੂ ਕਰਨ ਵਿਚ ਸਫਲਤਾ ਹਾਸਲ ਕੀਤੀ ਹੈ। ਜਿਨ੍ਹਾਂ ਨੇ ਵਿਦੇਸ਼ ਵਿੱਚ ਬੈਠੇ ਇਕ ਵਿਅਕਤੀ ਦੇ ਕਹਿਣ ਤੇ ਉਸਦੇ ਵਿਰੋਧੀ ਧੜੇ ਗਿਰੋਹ ਦੇ ਵਿਅਕਤੀ ਦਾ ਕਤਲ ਕਰਨਾ ਸੀ। ਡੀ.ਐੱਸ.ਪੀ. ਟਾਂਡਾ ਰਾਜ ਕੁਮਾਰ ਨੇ ਦੱਸਿਆ ਕਿ ਟਾਂਡਾ ਪੁਲਸ ਦੀ ਟੀਮ ਨੇ ਜੁਰਮ ਕਰਨ ਤੋਂ ਪਹਿਲਾ ਹੀ ਮੁਲਜਮਾਂ ਨੂੰ ਕਾਬੂ ਕਰਕੇ ਵੱਡੀ ਸਫਲਤਾ ਹਾਸਲ ਕੀਤੀ ਹੈ। ਉਨ੍ਹਾਂ ਦੱਸਿਆ ਕਿ ਜ਼ਿਲ੍ਹਾ ਪੁਲਸ ਮੁਖੀ ਕੁਲਵੰਤ ਸਿੰਘ ਹੀਰ ਦੇ ਦਿਸ਼ਾ ਨਿਰਦੇਸ਼ਾਂ ਅਧੀਨ ਐੱਸ.ਆਈ. ਦਿਲਬਾਗ ਸਿੰਘ,ਥਾਣੇਦਾਰ ਜਸਪਾਲ ਸਿੰਘ,ਪੁਨੀਤ ਕੁਮਾਰ ਅਤੇ ਅਮ੍ਰਿਤਪਾਲ ਦੀ ਟੀਮ ਨੇ ਇਹ ਸਫਲਤਾ ਹਾਸਲ ਕੀਤੀ ਹੈ। ਉਨ੍ਹਾਂ ਦੱਸਿਆ ਕਿ ਕਾਬੂ ਆਏ ਮੁਲਜਮਾਂ ਦੀ ਪਛਾਣ ਸੁਖਜੀਤ ਸਿੰਘ ਸੁੱਖਾ ਪੁੱਤਰ ਕੁਲਜੀਤ ਸਿੰਘ ਵਾਸੀ ਪਿੰਡ ਕੁਰਾਲਾ ਅਤੇ ਗੁਰਜੀਤ ਸਿੰਘ ਮਿੰਟੂ ਪੁੱਤਰ ਨਰਿੰਦਰ ਸਿੰਘ ਵਾਸੀ ਮੂਨਕਾ ਦੇ ਰੂਪ ਵਿੱਚ ਹੋਈ ਹੈ। ਉਨ੍ਹਾਂ ਦੱਸਿਆ ਕਿ ਜਦੋ ਪੁਲਸ ਦੀ ਟੀਮ ਭੈੜੇ ਅਨਸਰਾਂ ਨੂੰ ਨੱਥ ਪਾਉਣ ਲਈ ਗਸ਼ਤ ਕਰ ਰਹੀ ਸੀ ਤਾਂ ਕਿਸੇ ਮੁਖਬਰ ਨੇ ਸੂਚਨਾ ਦਿੱਤੀ ਕਿ ਇਹ ਮੁਲਜ਼ਮ ਆਲਟੋ ਕਾਰ ਤੇ ਖੁੱਡਾ ਤੋਂ ਸਰਾਂ ਵੱਲ ਜਾ ਰਹੇ ਹਨ ਅਤੇ ਉਨ੍ਹਾਂ ਕੋਲ ਦੇਸੀ ਵਿਦੇਸ਼ੀ ਅਸਲਾ ਹੈ ਜੋ ਇਨ੍ਹਾਂ ਨੂੰ ਕਨੇਡਾ ਰਹਿੰਦੇ ਜੰਗ ਬਹਾਦਰ ਸਿੰਘ ਉਰਫ ਜੰਗ ਪੁੱਤਰ ਸੰਪੂਰਨ ਸਿੰਘ ਵਾਸੀ ਖੁਰਦਾਂ ਨੇ ਮੁਹਈਆ ਕਰਵਾਇਆ ਹੈ। ਜਿਸ ਨਾਲ ਇਨ੍ਹਾਂ ਨੇ ਜੰਗ ਬਹਾਦਰ ਦੇ ਵਿਰੋਧੀ ਧੜੇ ਦੇ ਗਿਰੋਹ ਦੇ ਵਿਅਕਤੀਆਂ ਨੂੰ ਮਾਰਨਾ ਸੀ ਅਤੇ ਇਸ ਕੰਮ ਲਈ ਜੰਗ ਬਹਾਦਰ ਇਨ੍ਹਾਂ ਮੁਲਜਮਾਂ ਨੂੰ ਮਾਲੀ ਮਦਦ ਵੀ ਕਰ ਰਿਹਾ ਸੀ। ਪੁਲਸ ਦੀ ਟੀਮ ਨੇ ਸੂਚਨਾ ਦੇ ਅਧਾਰ ਤੇ ਬੁੱਢੀਪਿੰਡ ਨਜ਼ਦੀਕ ਨਾਕਾਬੰਦੀ ਕਰਕੇ ਇਨ੍ਹਾਂ ਮੁਲਜਮਾਂ ਨੂੰ ਵਿੱਚ 1 ਪਿਸਟਲ 9 ਐਮ.ਐਮ ਮੇਡ ਇੰਨ ਤੁਰਕੀ,ਸਮੇਤ ਮੈਗਜੀਨ 7 ਰੋਦ ਜਿੰਦਾ 9 ਐਮ.ਐਮ ਲੋਡਡ,ਇਕ ਰਿਵਾਲਵਰ 32 ਬੋਰ ਸਮੇਤ 5 ਰੋਂਦ ਲੋਡਡ ਅਥੇ, 2 ਮੋਬਾਇਲ ਫੋਨ ਤੇ ਇੱਕ ਸਪ੍ਰੇਅ ਦੀ ਬੋਤਲ ਸਮੇਤ ਕਾਬੂ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਗੈਂਗਵਾਰ ਨਾਲ ਜੁੜੇ ਇਨ੍ਹਾਂ ਮੁਲਜਮਾਂ ਨੂੰ ਕਾਬੂ ਕਰਕੇ ਪੁਲਸ ਦੇ ਹੱਥ ਵੱਡੀ ਸਫਲਤਾ ਲੱਗੀ ਹੈ ਅਤੇ ਪੁੱਛਗਿੱਛ ਦੌਰਾਨ ਇਨ੍ਹਾਂ ਮੁਲਜਮਾਂ ਕੋਲੋਂ ਕਈ ਖੁਲਾਸੇ ਹੋਣ ਦੀ ਸੰਭਾਵਨਾ ਹੈ।

ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਮੁਲਜ਼ਮ ਸੁਖਜੀਤ ਸਿੰਘ ਸੁੱਖਾ ਪੁੱਤਰ ਕੁਲਜੀਤ ਸਿੰਘ ਵਾਸੀ ਪਿੰਡ ਕੁਰਾਲਾ ਗੜ੍ਹਦੀਵਾਲਾ ਦੇ ਇੱਕ ਨਿਜੀ ਕਾਲਜ ‘ਚ ਪਿਛਲੇ 8/9 ਸਾਲ ਤੋਂ ਬਤੌਰ ਜੇ ਐਲ ਏ ਦੀ ਪੋਸਟ ਤੇ ਤੈਨਾਤ ਹੈ। ਮਿਲੀ ਜਾਣਕਾਰੀ ਅਨੁਸਾਰ ਸੁਖਜੀਤ ਸਿੰਘ ਸੁੱਖਾ ਲਗਭਗ 6 ਮਹੀਨੇ ਕਨੇਡਾ ਵੀ ਰਹਿ ਕੇ ਆਇਆ ਹੈ। ਇਹ ਟੁਰਿਸਟ ਵੀਜੇ ਤੇ ਕਨੇਡਾ ਗਿਆ ਸੀ।