ਗੜ੍ਹਸ਼ੰਕਰ, (ਜਤਿੰਦਰ ਪਾਲ ਸਿੰਘ ਕਲੇਰ )–

ਅਰਣਿਆ ਠਾਕੁਰ ਨੇ ਵਿਸ਼ਵ ਤਾਇਕਵਾਂਡੋ ਚੈਂਪੀਅਨਸ਼ਿਪ ‘ਚ ਤਗਮਾ ਜਿੱਤ ਕੇ ਦੇਸ਼ ਦਾ ਨਾਂਅ ਕੀਤਾ ਰੌਸ਼ਨ

4 ਅਗਸਤ– ਗੜ੍ਹਸ਼ੰਕਰ ਦੀ ਦੋਹਤਰੀ ਤੇ ਸਮਾਜ ਸੇਵੀ ਰਾਜੀਵ ਰਾਣਾ ਦੀ ਭਾਣਜੀ ਅਰਣਿਆ ਠਾਕੁਰ ਨੇ ਵਿਸ਼ਵ ਤਾਇਕਵਾਂਡੋ ਚੈਪੀਅਨਸ਼ਿੱਪ ਵਿਚ ਚਾਂਦੀ ਦਾ ਤਗਮਾ ਜਿੱਤਕੇ ਪੰਜਾਬ ਦਾ ਹੀ ਨਹੀਂ ਸਗੋਂ ਦੇਸ਼ ਦਾ ਨਾਮ ਰੌਸ਼ਨ ਕੀਤਾ ਹੈ | ਸਮਾਜ ਸੇਵੀ ਰਾਜੀਵ ਰਾਣਾ ਨੇ ਦੱਸਿਆ ਕਿ ਉਨ੍ਹਾਂ ਦੀ ਭਾਣਜੀ ਅਰਣਿਆ ਠਾਕੁਰ ਜੋ ਕਿ ਪੰਚਕੂਲਾ ਦੇ ਤਾਉ ਦੇਵੀ ਲਾਲ ਸੈਂਟਰ ਤੋਂ ਤਾਇਕਵਾਂਡੋ ਦੀ ਟ੍ਰੇਨਿੰਗ ਪ੍ਰਾਪਤ ਕਰ ਰਹੀ ਹੈ ਨੇ 14 ਸਾਲ ਦੀ ਉਮਰ ਵਿਚ ਹੀ ਵਲਰਡ ਤਾਇਕਵਾਂਡੋ ਚੈਂਪੀਅਨਸ਼ਿੱਪ ਵਿਚ ਸਿਲਵਰ ਮੈਡਕਲ ਜਿੱਤਕੇ ਦੇਸ਼ ਦਾ ਨਾਮ ਉੱਚਾ ਕੀਤਾ ਹੈ | ਉਨ੍ਹਾਂ ਦੱਸਿਆ ਕਿ ਅਰਣਿਆ ਠਾਕੁਰ ਨੇ ਇਸ ਚੈਂਪੀਅਨਸ਼ਿੱਪ ਵਿਚ ਰਾਉਂਡ 16 ਵਿਚ ਚੀਨੀ ਖਿਡਾਰੀ ਨੂੰ ਚਿੱਤ ਕੀਤਾ ਤੇ ਰਾਉਂਡ 32 ਵਿਚ ਆਸਟ੍ਰੇਲੀਆ ਦੇ ਖਿਲਾਫ਼ ਜਿੱਤ ਹਾਸਿਲ ਕੀਤੀ | ਇਸੇ ਤਰ੍ਹਾਂ ਉਸਨੇ ਕੁਆਟਰ ਫਾਈਨਲ ਵਿਚ ਕੈਨੇਡਾ ਤੇ ਸੈਮੀ ਫਾਈਨਲ ਵਿਚ ਗਰੀਸ ਦੇ ਖਿਲਾਫ਼ ਜਿੱਤ ਦਰਜ ਕੀਤੀ | ਉਨ੍ਹਾਂ ਦੱਸਿਆ ਕਿ ਅਰਣਿਆ ਠਾਕੁਰ ਨੇ ਕੋਰੀਅਨ ਖਿਡਾਰੀ ਤੋਂ ਹਾਰਨ ਦੇ ਬਾਵਜੂਦ ਵੀ ਦੇਸ਼ ਲਈ ਪਹਿਲਾ ਸਿਲਵਰ ਮੈਡਲ ਜਿੱਤ ਕੇ ਇਤਿਹਾਸ ਰਚਿਆ ਹੈ | ਉਨ੍ਹਾਂ ਕਿਹਾ ਕਿ ਅਰਣਿਆ ਠਾਕੁਰ ਇਸਤੋਂ ਪਹਿਲਾ ਵੀ ਦੁਬਈ ਵਿਚ ਹੋਈ ਵਿਸ਼ਵ ਚੈਂਪੀਅਨਸ਼ਿੱਪ ਵਿਚ ਸੋਨ ਤਗਮੇ ਜਿੱਤਕੇ ਦੇਸ਼ ਦਾ ਨਾਮ ਰੌਸ਼ਨ ਕਰ ਚੁੱਕੀ ਹੈ | ਉਨ੍ਹਾਂ ਦੱਸਿਆ ਕਿ ਕੋਚ ਹਰਜਿੰਦਰ ਸਿੰਘ ਦੀ ਸਖ਼ਤ ਮਿਹਨਤ ਸਦਕਾ ਅਰਣਿਆ ਦੀ ਇਸ ਉਪਲੱਬਧੀ ਨਾਲ ਪਰਿਵਾਰ ਅਤੇ ਇਲਾਕੇ ਦੇ ਲੋਕਾਂ ਵਿਚ ਵੱਡੀ ਖੁਸ਼ੀ ਪਾਈ ਜਾ ਰਹੀ ਹੈ |