ਹਾਜੀਪੁਰ / ਦਸੂਹਾ 5 ਜਨਵਰੀ (ਚੌਧਰੀ) 

: ਪੁਲਸ ਸਟੇਸ਼ਨ ਹਾਜੀਪੁਰ ਦੇ ਅਧੀਨ ਪੈਂਦੇ ਪਿੰਡ ਰਣਸੋਤਾ ਵਿਖੇ ਇੱਕ ਪੋਲਟਰੀ ਫਾਰਮ ਤੇ ਕੰਮ ਕਰਦੇ ਪ੍ਰਵਾਸੀ ਪਰਿਵਾਰ ਦੇ ਇੱਕ 6 ਸਾਲਾ ਬੱਚੇ ਨੂੰ ਅਵਾਰਾ ਕੁੱਤਿਆਂ ਵਲੋਂ ਗੰਭੀਰ ਰੂਪ ਵਿੱਚ ਜਖਮੀ ਕਰ ਦਿੱਤਾ।ਮਿਲੀ ਜਾਣਕਾਰੀ ਦੇ ਮੁਤਾਬਿਕ ਪ੍ਰਵਾਸੀ ਮਜਦੂਰ ਰਾਮ ਨਾਥ ਪਿੰਡ ਰਣਸੋਤਾ ਵਿਖੇ ਮਸੰਦਰ ਕੁਮਾਰ ਪੁੱਤਰ ਜੀਤ ਦੇ ਪੋਲਟਰੀ ਫਾਰਮ ਤੇ ਕੰਮ ਕਰਦਾ ਤੇ ਪਰਿਵਾਰ ਸਮੇਤ ਰਹਿੰਦਾ ਹੈ।ਐਤਵਾਰ ਨੂੰ ਕਰੀਬ ਦਿਨ ਦੇ ਤਿੰਨ ਵਜੇ ਰਾਮ ਨਾਥ ਦਾ 6 ਸਾਲਾ ਲੜਕਾ ਚੰਦਨ ਕੁਮਾਰ ਪੋਲਟਰੀ ਫਾਰਮ ਦੇ ਕੋਲ ਹੀ ਖੇਲ ਰਿਹਾ ਸੀ। ਜਿਸ ਦੌਰਾਨ ਉਸ ਤੇ ਅਵਾਰਾ ਕੁੱਤਿਆਂ ਨੇ ਅਚਾਨਕ ਹਮਲਾ ਕਰਕੇ ਉਸ ਨੂੰ ਗੰਭੀਰ ਰੂਪ ਵਿੱਚ ਜਖਮੀ ਕਰ ਦਿੱਤਾ I ਬੱਚੇ ਦੇ ਰੋਣ ਦੀ ਆਵਾਜ ਸੁਣ ਕੇ ਨੇੜੇ ਪੈਂਦੇ ਖੇਤਾਂ’ਚ ਕੰਮ ਕਰ ਰਹੇ ਇਕ ਵਿਅਕਤੀ ਵੱਲੋਂ ਉਸ ਬੱਚੇ ਨੂੰ ਕੁੱਤਿਆਂ ਤੋ ਬਹੁਤ ਵੱਡਾ ਖਤਰਾ ਮੁੱਲ ਲੈ ਕੇ ਬਚਾਇਆ ਗਿਆ,ਪਰ ਚੰਦਨ ਕੁਮਾਰ ਗੰਭੀਰ ਰੂਪ ਵਿੱਚ ਜਖਮੀ ਹੋ ਗਿਆ ਅਤੇ ਉਸਨੂੰ ਨਾਜ਼ੁਕ ਹਾਲਾਤ’ਚ ਸਿਵਲ ਹਸਪਤਾਲ ਦਸੂਹਾ ਵਿਖੇ ਦਾਖਿਲ ਕਰਵਾਇਆ ਗਿਆ ਹੈ,ਜਿੱਥੇ ਉਹ ਜਿੰਦਗੀ ਅਤੇ ਮੌਤ ਦੀ ਲੜਾਈ ਲੜ ਰਿਹਾ ਹੈ। ਪਿੰਡ ਦੇ ਸਰਪੰਚ ਦਿਲਾਵਰ ਸਿੰਘ ਨੇ ਸਰਕਾਰ ਤੋਂ ਇਸ ਗਰੀਬ ਪ੍ਰਵਾਸੀ ਮਜਦੂਰ ਦੀ ਬੱਚੇ ਦੇ ਇਲਾਜ’ਚ ਸਹਾਇਤਾ ਦੀ ਮੰਗ ਅਤੇ ਇਲਾਕੇ’ਚ ਅਵਾਰਾ ਕੁੱਤਿਆਂ ਦੇ ਆਤੰਕ ਤੋਂ ਛੁਟਕਾਰਾ ਦੁਆਉਣ ਦੀ ਮੰਗ ਕੀਤੀ ਹੈ।

ਫੋਟੋ – ਬੱਚੇ ਦੇ ਸ਼ਰੀਰ ਤੇ ਕੁੱਤਿਆਂ ਵੱਲੋਂ ਕੱਟਣ ਨਾਲ ਹੋਏ ਗੰਭੀਰ ਜਖਮ।