ਸਰਕਾਰੀ ਪ੍ਰਾਇਮਰੀ ਸਮਾਰਟ ਸਕੂਲ ਰੈਲਮਾਜਰਾ ਦੇ ਗੇਟ ਅੱਗੇ ਜਮ੍ਹਾਂ ਗੰਦਗੀ ਅਤੇ ਗੰਦੇ ਪਾਣੀ ਤੋਂ ਬੱਚੇ ਤੇ ਅਧਿਆਪਕ ਪਰੇਸ਼ਾਨ 

ਕਾਠਗਡ਼੍ਹ, 19 ਜੁਲਾਈ (ਜਤਿੰਦਰ ਪਾਲ ਸਿੰਘ ਕਲੇਰ ) ਪੰਜਾਬ ‘ਚ ਪਿਛਲੀ ਕਾਂਗਰਸ ਸਰਕਾਰ ਨੇ ਆਪਣੇ ਕਾਰਜਕਾਲ ਦੌਰਾਨ  ਸਿੱਖਿਆ ਦੇ ਖੇਤਰ ‘ਚ ਸੁਧਾਰ ਕਰਨ ਦੇ ਮੰਤਵ ਨਾਲ ਸਰਕਾਰੀ ਸਕੂਲਾਂ ਨੂੰ ਸਮਾਰਟ ਸਕੂਲ ਵਜੋਂ ਵਿਕਸਤ  ਕਰਨਾ ਸ਼ੁਰੂ ਕੀਤਾ ਸੀ ਜਿਸ ਦੇ ਤਹਿਤ ਪਿੰਡ ਰੈਲਮਾਜਰਾ ਦੇ ਸਰਕਾਰੀ ਪ੍ਰਾਇਮਰੀ ਸਕੂਲ ਨੂੰ ਵੀ ਸਮਾਰਟ ਸਕੂਲ ਦਾ ਦਰਜਾ ਦਿੱਤਾ ਗਿਆ ਸੀ ਪਰੰਤੂ ਇਸ ਸਮਾਰਟ ਸਕੂਲ ਦੇ ਮੇਨ ਗੇਟ ਦੇ ਨਾਲ -ਨਾਲ ਲੱਗਦੇ ਰਸਤੇ ਉੱਤੇ ਜਮ੍ਹਾਂ ਰਹਿੰਦੇ  ਗੋਬਰ ਮਿਕਸ ਗੰਦੇ ਪਾਣੀ ਤੇ ਗੰਦਗੀ ਨੇ ਸਕੂਲੀ ਬੱਚਿਆਂ ਤੇ ਅਧਿਆਪਕਾਂ ਨੂੰ ਕਾਫੀ ਪਰੇਸ਼ਾਨ ਕੀਤਾ ਹੋਇਆ  । ਭਾਰੀ ਮਾਤਰਾ ਵਿਚ ਗੋਬਰ ਅਤੇ  ਗੰਦੇ ਪਾਣੀ ਨੂੰ ਦੇਖ ਕੇ ਸਮਾਰਟ ਸਕੂਲ ਦੀ ਹਾਲਤ ‘ਤੇ ਸਵਾਲੀਆ ਨਿਸ਼ਾਨ ਵੀ ਲਗਦਾ ਹੈ ।

ਸੂਤਰਾਂ ਮੁਤਾਬਕ ਰੈਲਮਾਜਰਾ ਚ ਸਰਕਾਰੀ ਪ੍ਰਾਇਮਰੀ ਸਮਾਰਟ ਸਕੂਲ ਦੇ ਮੇਨ ਗੇਟ ਦੇ ਬਿਲਕੁਲ ਨਾਲ ਲੋਕਾਂ ਵੱਲੋਂ ਜਿਥੇ ਗੰਦਗੀ ਆਦਿ ਸੁੱਟੀ ਜਾਂਦੀ  ਹੈ ਉੱਥੇ ਹੀ ਪਸ਼ੂਆਂ ਦਾ ਗੋਬਰ ਵੀ ਵੱਡੀ ਮਾਤਰਾ ਵਿੱਚ ਸੁੱਟਿਆ ਜਾ ਰਿਹਾ ਹੈ ਤੇ ਨਾਲ ਹੀ ਘਰਾਂ ਦਾ ਗੰਦਾ ਪਾਣੀ ਅਤੇ ਬਰਸਾਤੀ ਪਾਣੀ ਇਸ ਤਰ੍ਹਾਂ ਜਮ੍ਹਾ ਰਹਿੰਦਾ ਹੈ ਜਿਵੇਂ ਛੱਪੜ ਬਣਿਆ ਹੋਵੇ । ਸਕੂਲ ਦੇ ਨਾਲ ਜਮ੍ਹਾਂ ਰਹਿੰਦੀ ਇਸ ਗੰਦਗੀ ਦੇ ਚਲਦਿਆਂ ਸਕੂਲੀ ਵਾਤਾਵਰਨ ਗੰਧਲਾ ਬਣਿਆ ਰਹਿੰਦਾ ਹੈ ਅਤੇ ਖਾਸ ਕਰਕੇ ਬਰਸਾਤ ਦਾ ਮੌਸਮ ਹੋਣ ਨਾਲ ਬੱਚਿਆਂ ਨੂੰ ਡੇਂਗੂ ਤੇ ਹੋਰ ਬਿਮਾਰੀਆਂ ਦਾ ਖ਼ਤਰਾ ਵਧੇਰੇ ਰਹਿੰਦਾ ਹੈ  ।  ਇਸ ਗੰਦਗੀ ਤੇ ਗੰਦੇ ਪਾਣੀ ਨੂੰ ਲੈ ਕੇ ਪਿੰਡ ਦੇ ਇੱਕ ਪਤਵੰਤੇ ਨੇ ਦੱਸਿਆ ਕਿ ਪਿੰਡ ਦੀ ਪੰਚਾਇਤ ਨੇ ਇਸ ਮੁੱਦੇ ਨੂੰ  ਪ੍ਰਸ਼ਾਸਨ ਦੇ ਧਿਆਨ ਵਿੱਚ ਲਿਆਂਦਾ ਸੀ ਜਿਸ ਤੋਂ ਬਾਅਦ ਪ੍ਰਸ਼ਾਸਨ ਦੇ ਅਧਿਕਾਰੀਆਂ ਨੇ ਮੌਕਾ ਵੀ ਦੇਖਿਆ ਸੀ ਪਰੰਤੂ ਹੱਲ ਕੋਈ ਵੀ ਨਾ ਹੋ ਸਕਿਆ ।

ਪਿੰਡ ਵਾਸੀਆਂ ਨੇ ਸਿੱਖਿਆ ਵਿਭਾਗ ਨੇ ਜ਼ਿਲ੍ਹੇ ਦੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਤੋਂ ਮੰਗ ਕੀਤੀ ਹੈ ਕਿ ਸਕੂਲ ਦੇ ਨੇੜੇ ਫੈਲੇ ਗੋਬਰ, ਗੰਦਗੀ ਤੇ ਗੰਦੇ ਪਾਣੀ ਦੇ ਹੱਲ ਲਈ ਠੋਸ ਕਦਮ ਚੁੱਕੇ ਜਾਣ ਤਾਂ ਜੋ ਸਕੂਲੀ ਬੱਚਿਆਂ ਨੂੰ ਸਾਫ਼ ਸੁਥਰਾ ਮਾਹੌਲ ਮਿਲ ਸਕੇ ਅਤੇ ਸਹੀ ਅਰਥਾਂ  ‘ਚ ਸਕੂਲ ਸਮਾਰਟ ਬਣ ਸਕੇ